ഫീച്ചറുകള്‍

അവരാരും ഈ ഓണത്തിന് ഒറ്റയ്ക്കായില്ല; കൈയടിക്കാം കോഴിക്കോടിന്!

ഏവരും ഒത്തുകൂടി ആവേശപൂർവ്വം പൂക്കളമിട്ട്, വിഭവ സമൃദ്ധമായ സദ്യയൊരുക്കി ഊഞ്ഞാലാട്ടവും പാട്ടും നൃത്തവുമെല്ലാമായി വൈവിധ്യമാർന്ന ഓണക്കളികളോടെ ജാതി മത ഭേദമില്ലാതെ ആഘോഷിക്കുന്ന ഓണം. എന്നാൽ ഒത്തു കൂടാനും ആഘോഷിക്കുവാനും ആരുമില്ലാത്തവരും നമ്മുടെ സമൂഹത്തിലുണ്ട്. ഇത്തരത്തിൽ പല ജീവിത സാഹചര്യങ്ങൾ കൊണ്ട് ആരോരുമില്ലാതെ ഒറ്റപ്പെട്ട് പോയവർക്ക് അവിസ്മരണീയമായ ഒരു ഓണം ഒരുക്കി കുടുംബശ്രീ കോഴിക്കോട് ജില്ലാ മിഷൻ 'ഒറ്റയ്ക്കല്ല ഓണം' പരിപാടിയിലൂടെ.

ജില്ലയിലെ ഒറ്റപ്പെട്ടു കഴിയുന്ന 247 കുടുംബങ്ങളിലേക്ക്, 439 കുടുംബാംഗങ്ങളിലേക്ക് കോഴിക്കോട്ടെ കുടുംബശ്രീ പ്രവർത്തകർ ഉത്രാടം, തിരുവോണം, അവിട്ടം ദിനങ്ങളിലായി ഓണസദ്യയും ഓണസമ്മാനങ്ങളുമായി എത്തി. അവർക്കൊപ്പം പൂക്കളമിട്ടു, പാട്ടുപാടി, ഓണമുണ്ട് ഈ ഓണം ഒരോളമാക്കി മാറ്റി.

ആരും ഒറ്റയ്ക്കല്ല, ഒറ്റയ്ക്കാവില്ല ; കുടുംബശ്രീ ഒറ്റയ്ക്കാക്കില്ല, എന്നും കൂടെയുണ്ടാവും എന്ന വാക്കുകളെ അക്ഷരാർത്ഥത്തിൽ അന്വര്‍ത്ഥമാക്കിക്കൊണ്ട് ഈ കുടുംബങ്ങളെ കുടുംബശ്രീക്കൊപ്പം ചേർത്ത് നിർത്തുകയായിരുന്നു , കോഴിക്കോട്.

Content highlight

ottaykkalla onam by kudumbashree kozhikkod district mission

അതിരപ്പിള്ളിയില്‍ നിന്ന് വാഴച്ചാലിലേക്ക്‌ വിനോദസഞ്ചാരികള്‍ക്കായി കുടുംബശ്രീ 'സൈക്കിള്‍ ഓഫ് ഡ്രൈവ്‌സ്'

പ്രമുഖ വിനോദ സഞ്ചാര കേന്ദ്രങ്ങളായ അതിരപ്പിള്ളിയും വാഴച്ചാലും സന്ദര്‍ശിക്കാനെത്തത്തുന്ന വിനോദസഞ്ചാരികള്‍ക്ക് ഇനി സൈക്കിളില്‍ ഇവിടെ ചുറ്റിക്കറങ്ങാം. ഈ രണ്ട് കേന്ദ്രങ്ങളെയും കോര്‍ത്തിണക്കി കാടിന്റെ സൗന്ദര്യം ആസ്വദിക്കുന്നതിനുള്ള സൈക്കിള്‍ ടൂറിസം പദ്ധതി 'സൈക്കിള്‍ ഓഫ് ഡ്രൈവ്‌സു'മായി തൃശ്ശൂര്‍ കുടുംബശ്രീ ജില്ലാ മിഷന്‍. അതിരപ്പിള്ളി പഞ്ചായത്തുമായി സംയോജിച്ചാണ് പദ്ധതിയുടെ നടപ്പിലാക്കല്‍.

പഞ്ചായത്തിലെ പ്രാക്തന ഗോത്രവിഭാഗത്തില്‍പ്പെട്ട കാടര്‍ വിഭാഗത്തില്‍ ഉള്‍പ്പെടുന്നവര്‍ക്ക് സുസ്ഥിര വികസനം ലക്ഷ്യമിട്ട് കുടുംബശ്രീ മുഖേന നടപ്പിലാക്കുന്ന പ്രത്യേക പട്ടികവര്‍ഗ്ഗ പദ്ധതിയുടെ ഭാഗമായി നടപ്പിലാക്കുന്ന ഈ പദ്ധതി മുഖേന അവര്‍ക്ക് ഉപജീവനമാര്‍ഗ്ഗം കണ്ടെത്തി നല്‍കാനാണ് ലക്ഷ്യമിടുന്നത്. കൂടാതെ കാടിനുള്ളിലൂടെ സഞ്ചാരികളുടെ വാഹനങ്ങള്‍ സഞ്ചരിക്കുമ്പോഴുണ്ടാകുന്ന പരിസ്ഥിതി മലിനീകരണം പരമാവധി കുറച്ച് 'കാര്‍ബണ്‍ ന്യൂട്രല്‍ അതിരപ്പിള്ളി' എന്ന ലക്ഷ്യം കൈവരിക്കുകയും 'സൈക്കിള്‍ ഓഫ് ഡ്രൈവ്‌സ്' എന്ന പദ്ധതിയുടെ ലക്ഷ്യമാണ്.

അതിരപ്പിള്ളി വെള്ളച്ചാട്ടത്തിലേക്കുള്ള ജില്ലാ ടൂറിസം പ്രൊമോഷന്‍ കൗണ്‍സില്‍ കൗണ്ടറിലാണ് സൈക്കിള്‍ വാടകയ്‌ക്കെടുക്കാനുള്ള സംവിധാനം ഒരുക്കിയിരിക്കുന്നത്. രാവിലെ 9 മുതല്‍ വൈകുന്നേരം 5 വരെ സൈക്കിളുകള്‍ ലഭ്യമാണ്. ആദ്യത്തെ ഒരു മണിക്കൂറിന് 100 രൂപയും പിന്നീടുള്ള അരമണിക്കൂറിന് 30 രൂപ വീതവും നല്‍കി പൊതുജനങ്ങള്‍ക്ക് സൈക്കിള്‍ ഉപയോഗിക്കാനാകും. സുരക്ഷയ്ക്ക് ഹെല്‍മറ്റും നല്‍കും.

പദ്ധതിയുടെ ഉദ്ഘാടനം അതിരപ്പിള്ളി ഗ്രാമപഞ്ചായത്ത് പ്രസിഡന്റ് അഡ്വ. ആതിര ദേവരാജന്‍ അധ്യക്ഷത വഹിച്ച ചടങ്ങില്‍ ചാലക്കുടി എംഎല്‍എ സനീഷ്‌കുമാര്‍ ജോസഫ് ഓഗസ്റ്റ് 23ന് നിര്‍വഹിച്ചു. പഞ്ചായത്ത് വൈസ് പ്രസിഡന്റ് സൗമിനി മണിലാല്‍, ആരോഗ്യ വിദ്യാഭ്യാസ സ്ഥിരം സമിതി അദ്ധ്യക്ഷന്‍ കെ.കെ. റിജേഷ്, വാര്‍ഡ് മെമ്പര്‍ ജയചന്ദ്രന്‍, കുടുംബശ്രീ ജില്ലാ മിഷന്‍ കോ ഓര്‍ഡിനേറ്റര്‍ ഡോ. എ. കവിത, അസിസ്റ്റന്റ് ജില്ലാ മിഷന്‍ കോ ഓര്‍ഡിനേറ്റര്‍ കെ. രാധാകൃഷ്ണന്‍, കുടുംബശ്രീ ജില്ലാ പ്രോഗ്രാം മാേനജര്‍ വിജയകൃഷ്ണന്‍ എന്നിവര്‍ സംസാരിച്ചു. കുടുംബശ്രീ സി.ഡി.എസ് അംഗങ്ങള്‍, ഉദ്യോഗസ്ഥര്‍ എന്നിവര്‍ പങ്കെടുത്തു.

Content highlight

Kudumbashree Thrissur District Mission launches Kudumbashree School of Drives

പൊടിപൊടിക്കുകയാണ് കാസര്‍ഗോഡ് 'മഴപ്പൊലിമ' ആഘോഷം..

കുടുംബശ്രീ കാസര്‍ഗോഡ് ജില്ലാ മിഷന്‍ ആവിഷ്‌ക്കരിച്ച് നടപ്പിലാക്കുന്ന കാര്‍ഷിക പുനരാവിഷ്‌ക്കരണ പരിപാടിയായ മഴപ്പൊലിമ പുരോഗമിക്കുന്നു. കുട്ടികള്‍ മുതല്‍ മുതിര്‍ന്നവര്‍ വരെ ചേറിലിറങ്ങിയും ഞാറ് നട്ടും പാട്ടുപാടിയും നൃത്തം ചെയ്തുമെല്ലാമാണ് മഴപ്പൊലിമയെ നാടിന്റെ ഉത്സവമാക്കി മാറ്റിവരുന്നത്. കലാ, കായിക മത്സരങ്ങളും ഭക്ഷ്യമേള ഉള്‍പ്പെടെയുള്ള വൈവിധ്യമാര്‍ന്ന പരിപാടികളും മേളയുടെ ഭാഗമായി സംഘടിപ്പിച്ചുവരുന്നു.

'ചേറാണ് ചോറ്' എന്ന മുദ്രാവാക്യവുമായി തരിശ് ഭൂമി കൃഷിയോഗ്യമാക്കുക, ഭക്ഷ്യ സുരക്ഷ ഉറപ്പുവരുത്തുക, യുവതലമുറ ഉള്‍പ്പെടെയുള്ള ജനങ്ങളെ കൃഷിയിലേക്ക് ആകര്‍ഷിക്കുക, ജില്ലയുടെ കാര്‍ഷിക സംസ്‌കൃതി വീണ്ടെടുക്കുക എന്നീ ലക്ഷ്യങ്ങളോടെയാണ് ജില്ലാ മിഷന്‍ മഴപ്പൊലിമ സംഘടിപ്പിച്ചിരിക്കുന്നത്.

കഴിഞ്ഞ അഞ്ച് വര്‍ഷങ്ങളായി ജില്ലയില്‍ സംഘടിപ്പിച്ചുവരുന്ന മഴപ്പൊലിമ ക്യാമ്പെയിന്‍ ഈ വര്‍ഷം മുതല്‍ കൂടുതല്‍ വിപുലമാക്കിയാണ് സംഘടിപ്പിക്കുന്നത്. സി.ഡി.എസ്തലം കൂടാതെ എ.ഡി.എസ്തലത്തിലും ക്യാമ്പെയിന്‍ സംഘടിപ്പിക്കുന്നു. ജൂലൈ അഞ്ചിന് ആരംഭിച്ച ക്യാമ്പെയിന്റെ ഭാഗമായി ജില്ലയിലെ ആകെയുള്ള 42 സി.ഡി.എസുകളില്‍ 31 ലും ഇതുവരെ മഴപ്പൊലിമ സംഘടിപ്പിച്ചു കഴിഞ്ഞു. 6 എ.ഡി.എസുകളും മഴപ്പൊലിമ നടത്തി.

കഴിഞ്ഞവര്‍ഷം മഴപ്പൊലിമയുടെ ഭാഗമായി കുടുംബശ്രീയുടെ സംഘകൃഷി ഗ്രൂപ്പുകള്‍ മുഖേന 646.3 ഏക്കര്‍ തരിശുഭൂമി കൃഷിയോഗമാക്കുകയും അരിശ്രീ എന്ന ബ്രാന്‍ഡില്‍ 20.8 ടണ്‍ അരി വിപണിയിലെത്തിക്കുകയും ചെയ്തിരുന്നു.

Content highlight

Mazha Polima Programme of Kasaragod progressing ml

കേരള നോളജ് എക്കണോമി മിഷനും കുടുംബശ്രീയും സംയുക്തമായി നടപ്പിലാക്കുന്ന മൈക്രോ പ്ലാന്‍ - തൊഴില്‍ മേളകള്‍ പൂര്‍ണ്ണം

നാല് തദ്ദേശ സ്വയംഭരണ പ്രദേശങ്ങള്‍ കേന്ദ്രീകരിച്ച് കേരള നോളജ് എക്കണോമി മിഷനും കുടുംബശ്രീയും സംയുക്തമായി നടപ്പിലാക്കിയ മൈക്രോ പ്ലാന്‍ പ്രവര്‍ത്തനങ്ങളുടെ ഭാഗമായുള്ള തൊഴില്‍ മേളകള്‍ പൂര്‍ത്തിയായി. ഇടുക്കി ജില്ലയിലെ ബൈസണ്‍ വാലി, വയനാട് ജില്ലയിലെ സുല്‍ത്താന്‍ ബത്തേരി, മലപ്പുറം ജില്ലയിലെ പെരുമ്പടപ്പ്, കൊല്ലം ജില്ലയിലെ കൊല്ലം കോര്‍പ്പറേഷന്‍ എന്നീ പ്രദേശങ്ങളിലാണ് മൈക്രോപ്ലാന്‍ പ്രവര്‍ത്തനങ്ങള്‍ നടത്തിയത്.

ജൂലൈ 8,9,15 തീയതികളിലായി ഈ നാല് പ്രദേശങ്ങളില്‍ സംഘടിപ്പിച്ച തൊഴില്‍ മേളകളില്‍ 1800 തൊഴിലന്വേഷകരും 163 തൊഴില്‍ദാതാക്കളും ഭാഗമായി. 536 പേരെ തെരഞ്ഞെടുക്കുകയും ചെയ്തു.

ഈ പ്രദേശങ്ങളില്‍ ഡിജിറ്റല്‍ വര്‍ക്ക്‌ഫോഴ്‌സ് മാനേജ്‌മെന്റ് സിസ്റ്റം (DWMS) പ്ലാറ്റ്‌ഫോമില്‍ രജിസ്റ്റര്‍ ചെയ്തിരിക്കുന്ന അഭ്യസ്തവിദ്യരായ തൊഴിലന്വേഷകര്‍ക്ക് വിജ്ഞാന തൊഴിലുകള്‍ ലഭ്യമാക്കുന്നതിനുള്ള തീവ്രയജ്ഞ പരിപാടികളാണ് മൈക്രോ പ്ലാന്‍ പ്രവര്‍ത്തനങ്ങളുടെ ഭാഗമായി നടത്തിയത്.

അഭ്യസ്തവിദ്യരായ തൊഴില്‍രഹിതകര്‍ക്ക് വിജ്ഞാന തൊഴിലുകള്‍ ലഭ്യമാക്കണമെന്ന് തദ്ദേശ സ്വയംഭരണ സ്ഥാപനങ്ങള്‍ നോളജ് എക്കണോമി മിഷനോട് ആവശ്യപ്പെടുന്നത് അനുസരിച്ചാണ് മൈക്രോ പ്ലാനുകള്‍ തയാറാക്കി പ്രവര്‍ത്തനം നടത്തുന്നത്. വിവിധ വകുപ്പുകളില്‍പ്പെട്ട ഉദ്യോഗസ്ഥരുടെയും ജനപ്രതിനിധികളുടെയും സ്‌കില്ലിങ്/തൊഴില്‍ ഏജന്‍സികളിലെ പ്രതിനിധികളും ഉള്‍പ്പെടുന്ന സംഘാടക സമിതി രൂപീകരണമാണ് മൈക്രോ പ്ലാന്‍ കലണ്ടറിലെ ആദ്യ പരിപാടി.

തുടര്‍ന്ന് തദ്ദേശ സ്ഥാപനതല തൊഴിലന്വേഷകരുടെ യോഗവും വിജ്ഞാന തൊഴില്‍ വിശദീകരണവും, കമ്മ്യൂണിറ്റി അംബാസിഡര്‍മാര്‍ക്കുള്ള പരിശീലനവും ഇന്റര്‍വ്യൂകളും വര്‍ക്ക് റെഡിനസ് പ്രോഗ്രാമും തൊഴില്‍ പരിശീലനവും എല്ലാം ഉള്‍പ്പെടെ 11ഓളം പ്രവര്‍ത്തനങ്ങള്‍ ചെയ്യുന്നു. ഏറ്റവും അവസാനമായാണ് തൊഴില്‍മേളകള്‍ സംഘടിപ്പിക്കുന്നത്. ഭാവിയില്‍ കൂടുതല്‍ തദ്ദേശ സ്ഥാപനങ്ങള്‍ കേന്ദ്രീകരിച്ച് മൈക്രോ പ്ലാനുകള്‍ നടപ്പിലാക്കാനാണ് ലക്ഷ്യമിട്ടിരിക്കുന്നത്.

Content highlight

Job Fairs as part of Micro Plan Activities completed ml

പ്രതികൂല കാലാവസ്ഥയിലും പൊലിമ കുറയാതെ 'പൊലിമ പുതുക്കാട്'

വിഷഹരിതമായ, സുരക്ഷിത പച്ചക്കറികളുടെ ഉത്പാദനമെന്ന ലക്ഷ്യത്തോടെ തൃശ്ശൂരിലെ പുതുക്കാട് നിയോജകമണ്ഡലത്തില്‍ നടപ്പിലാക്കുന്ന പൊലിമ പുതുക്കാട് പദ്ധതിയുടെ മൂന്നാം ഘട്ടത്തിന് തുടക്കം. തദ്ദേശ സ്ഥാപനങ്ങള്‍, കുടുംബശ്രീ, കൃഷിവകുപ്പ്, സഹകരണ സ്ഥാപനങ്ങള്‍, തൊഴിലുറപ്പ് പദ്ധതി എന്നിവയുടെ ഫലപ്രദമായ സംയോജനം വഴി നടപ്പിലാക്കുന്ന പദ്ധതി ഭക്ഷ്യോത്പാദന രംഗത്ത് സ്വയംപര്യാപ്തത കൈവരിക്കാനുള്ള പദ്ധതികള്‍ ആവിഷ്‌ക്കരിച്ച് നടപ്പിലാക്കുകയെന്ന സംസ്ഥാന സര്‍ക്കാരിന്റെ ആശയം പ്രാവര്‍ത്തികമാക്കുന്നതിന് വേണ്ടിയാണ് തുടക്കമിട്ടത്. കുടുംബശ്രീയുടെ അഗ്രി ന്യൂട്രിഗാര്‍ഡന്‍ പദ്ധതി മുഖേനയുള്ള സഹായങ്ങളും പദ്ധതിയുടെ ഭാഗമാകുന്നവര്‍ക്ക് നല്‍കിവരുന്നു.

പുതുക്കാട് മണ്ഡലത്തിലെ എട്ട് പഞ്ചായത്തുകളിലെ 2411 അയല്‍ക്കൂട്ടങ്ങളില്‍ അംഗങ്ങളായ 40,000 കുടുംബശ്രീ വനിതകള്‍ മുഖേന 29 ഹെക്ടര്‍ സ്ഥലത്ത് 120 ടണ്‍ പച്ചക്കറിയാണ് പദ്ധതിയുടെ രണ്ടാം ഘട്ടത്തില്‍ വിളവെടുത്തത്. രണ്ടാം ഘട്ടത്തില്‍ മികച്ച രീതിയില്‍ കാര്‍ഷികവൃത്തിയിലേര്‍പ്പെട്ട അയല്‍ക്കൂട്ടങ്ങള്‍ക്കുള്ള പുരസ്‌ക്കാര വിതരണവും മൂന്നാം ഘട്ടത്തിന്റെ ഉദ്ഘാടനവും ജൂണ്‍ 27 ന് കൊടകര ബ്ലോക്ക് ഹാളില്‍ സംഘടിപ്പിച്ച ചടങ്ങില്‍ പുതുക്കാട് എം.എല്‍.എ കെ.കെ. രാമചന്ദ്രന്‍ നിര്‍വഹിച്ചു.

സി.ഡി.എസ്തല വിജയികളായ അയല്‍ക്കൂട്ടങ്ങള്‍

1. നന്മ (മറ്റത്തൂര്‍ പഞ്ചായത്ത്)

2. അനശ്വര (വല്ലച്ചിറ)

3. ദേവശ്രീ (അളഗപ്പാ നഗര്‍)

4. ഐശ്വര്യ ലക്ഷ്മി (പുതുക്കാട്)

5. പ്രതിഭ (നെന്മണിക്കര)

6. സൗഹൃദ (വരന്തരപ്പിള്ളി)

7. ഫ്രണ്ട്‌സ് കൂട്ടായ്മ (തൃക്കൂര്‍)

8. കരുണശ്രീ (പറപ്പൂക്കര)

കൊടകര ബ്ലോക്ക് പഞ്ചായത്ത് പ്രസിഡന്റ് എം.ആര്‍. രഞ്ജിത് അദ്ധ്യക്ഷത വഹിച്ച യോഗത്തില്‍ ചേര്‍പ്പ് ബ്ലോക്ക് പഞ്ചായത്ത് പ്രസിഡന്റ് എം.കെ. രാധാകൃഷ്ണന്‍ മാസ്റ്റര്‍, ഗ്രാമ പഞ്ചായത്ത് പ്രസിഡന്റുമാരായ ഇ.കെ. അനൂപ്, അജിത സുധാകരന്‍, സൈമണ്‍ നമ്പാടന്‍, കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ ഡോ. കവിത. എ, ബ്ലോക്ക് ഡെവലപ്പ്‌മെന്റ് ഓഫീസര്‍ പി.ആര്‍. അജയഘോഷ്, പുതുക്കാട് പഞ്ചായത്ത് കുടുംബശ്രീ സി.ഡി.എസ്. ചെയര്‍പേഴ്‌സണ്‍ അമ്പിളി ഹരി തുടങ്ങിയവര്‍ ആശംസകള്‍ നേര്‍ന്നു. മറ്റത്തൂര്‍ കൃഷി ഓഫീസര്‍ ഉണ്ണികൃഷ്ണന്‍ ശാസ്ത്രീയപച്ചക്കറി കൃഷിയെ കുറിച്ച് ക്ലാസ്സെടുത്തു.

Content highlight

polima puthukkad 3rd stage starts

പ്രകൃതി ദുരന്തങ്ങളുടെ ബോധവല്‍ക്കരണത്തിനായി ഒരു ലക്ഷം ബാലസഭാംഗങ്ങള്‍ 'സജ്ജ'മാകുന്നു

'സജ്ജം' ബില്‍ഡിങ്ങ് റെസിലിയന്‍സ്' പദ്ധതിയുടെ ഭാഗമായി സംസ്ഥാനത്തെ 152 ബ്ളോക്കുകളില്‍ പരിശീലന പരിപാടി ആരംഭിച്ചു

കുടുംബശ്രീ മുഖേന നടപ്പാക്കുന്ന'സജ്ജം' ബില്‍ഡിങ്ങ് റെസിലിയന്‍സ്' ബോധവല്‍ക്കരണ പരിശീലന പദ്ധതിയുടെ ഭാഗമായി ഒരു ലക്ഷം ബാലസഭാംഗങ്ങള്‍ക്കുള്ള ആദ്യഘട്ട പരിശീലനം ആരംഭിച്ചു. ദുരന്തസാധ്യതകളെ മനസിലാക്കി ആവശ്യമായ മുന്‍കരുതലുകള്‍ സ്വീകരിക്കാന്‍ വ്യക്തികള്‍ക്കും സമൂഹത്തിനും ബോധവല്‍ക്കരണം നല്‍കുന്നതിന് കുട്ടികളെ പ്രാപ്തരാക്കുകയാണ് പദ്ധതിയുടെ ലക്ഷ്യം. ഇന്നലെ(15-7-2023)യും ഇന്നു(16-7-2023)മായി ബ്ളോക്ക്തലത്തിലാണ് പരിശീലനം. അതത് സി.ഡി.എസുകളുടെ സഹകരണവും ഇതിനായി ഉറപ്പു വരുത്തിയിട്ടുണ്ട്.

തിരുവനന്തപുരം(8000), കൊല്ലം(7600), പത്തനംതിട്ട(3000), ആലപ്പുഴ(5000), കോട്ടയം(7700), ഇടുക്കി(6000), എറണാകുളം(10,000), തൃശൂര്‍(10,000), പാലക്കാട്(10,000), മലപ്പുറം(10600), കോഴിക്കോട്(8000), വയനാട്(2000), കണ്ണൂര്‍(8100), കാസര്‍കോട്(4100) എന്നിങ്ങനെയാണ് ഓരോ ജില്ലയിലും പരിശീലനം നല്‍കുന്ന കുട്ടികളുടെ എണ്ണം. സംസ്ഥാനത്ത് ഇതാദ്യമാണ് ഒരു ലക്ഷം കുട്ടികള്‍ക്ക് ഈ മേഖലയില്‍ പരിശീലനം നല്‍കുന്നത്.

മണ്ണിടിച്ചില്‍, ഉരുള്‍പൊട്ടല്‍, കടല്‍ക്ഷോഭം, തീപിടിത്തം എന്നിവയെ അതിജീവിക്കുന്നതിനും മുന്‍കരുതലുകള്‍ സ്വീകരിക്കുന്നതിനും വ്യക്തമായ അവബോധം ലഭിക്കുന്ന തരത്തിലുള്ള പരിശീലനമാണ് ഇവര്‍ക്ക് നല്‍കുന്നത്. ദുരന്ത ആഘാത ലഘൂകരണത്തിന്‍റെ ഭാഗമായി ദുരന്തങ്ങളെയും അപകടങ്ങളെയും വേര്‍തിരിച്ചു മനസിലാക്കുന്നതിനും ഇവരെ പരിശീലിപ്പിക്കുന്നുണ്ട്. കാലാവസ്ഥ, ദിനാന്തരീക്ഷ സ്ഥിതി, ഋതുഭേദങ്ങള്‍ എന്നിവ ഉള്‍പ്പെടെ ഭൗമശാസ്ത്ര വിജ്ഞാനവും കുട്ടികള്‍ക്ക് ലഭ്യമാക്കുന്നു. പ്രവര്‍ത്തനാധിഷ്ഠിത രീതിയിലാണ് എല്ലാ പരിശലന പരിപാടികളും ആസൂത്രണം ചെയ്തിട്ടുള്ളത്. ഇതോടൊപ്പം കുട്ടികളുടെ അവകാശങ്ങളായ അതിജീവനം, ഉന്നമനം, സംരക്ഷണം, പങ്കാളിത്തം എന്നിവയിലും പരിശീലനം നല്‍കുന്നുണ്ട്.

ദുരന്ത നിവാരണ അതോറിറ്റിയിലെ വിദഗ്ധര്‍, 28 സംസ്ഥാനതല റിസോഴ്സ് പേഴ്സണ്‍മാര്‍, 608 ജില്ലാതറിസോഴ്സ് പേഴ്സണ്‍മാര്‍ എന്നിവരാണ് പരിശീലനത്തിന് നേതൃത്വം നല്‍കുന്നത്. രണ്ടും മൂന്നും ഘട്ട പരിശീലനം യഥാക്രമം ആഗസ്റ്റ് 5,6, 12, 13 തീയതികളില്‍ ആരംഭിക്കും.

Content highlight

'Sajjam'- Building Resilience Programme: Training for Balasabha Members startsd

പ്രായത്തിന് ഇവിടെ സ്ഥാനം പടിക്ക് പുറത്ത് ആടിയും പാടിയും വയോജനങ്ങള്‍ ആഘോഷമാക്കിയ പാലക്കാട്ടെ നല്ലേപ്പള്ളിയുടെ 'നാട്ടരങ്ങ് 2023'

വയോജനങ്ങള്‍ക്ക് മാത്രമായി ഒരു കലോത്സവം. മത്സരബുദ്ധിയില്ലാതെ, വേദിയില്‍ കയറുന്ന ഏവരേയും പ്രോത്സാഹിപ്പിച്ചും അവരോട് ഒന്നു ചേര്‍ന്ന് ആടിയും പാടിയും ആഘോഷമാക്കിയ ഒരു സൂപ്പര്‍ കലോത്സവം. അതായിരുന്നു പാലക്കാട് ജില്ലയിലെ നല്ലേപ്പള്ളി ഗ്രാമപഞ്ചായത്ത് ഹാളില്‍ കുടുംബശ്രീ സി.ഡി.എസിന്റെ ആഭിമുഖ്യത്തില്‍ സംഘടിപ്പിച്ച 'നാട്ടരങ്ങ് 2023' കലോത്സവം. 60 മുതല്‍ 80 വയസ്സ് വരെ പ്രായമുള്ളവരാണ് ഈ വയോജന കലോത്സവത്തിന്റെ ഭാഗമായത്!

വയോജനങ്ങള്‍, ഭിന്നശേഷി വിഭാഗങ്ങള്‍, ട്രാന്‍സ്ജെന്‍ഡേഴ്സ് എന്നീ വിഭാഗങ്ങളുടെ മുഖ്യധാരാവത്ക്കരണം ലക്ഷ്യമിട്ട് കുടുംബശ്രീ നടപ്പിലാക്കുന്ന റിലേഷന്‍ഷിപ്പ് കേരള പദ്ധതിയുടെ ഭാഗമായാണ് നല്ലേപ്പള്ളി പഞ്ചായത്ത് കുടുംബശ്രീ സി.ഡി.എസ് ഇങ്ങനെയൊരു കലോത്സവം സംഘടിപ്പിച്ചത്. വയോജന അയല്‍ക്കൂട്ടങ്ങളുടെ ശാക്തീകരണം, കാര്യശേഷി വികസനം, അംഗങ്ങളുടെ കലാപരമായ കഴിവുകള്‍ പരിപോഷിപ്പിക്കുക എന്നീ ലക്ഷ്യങ്ങളാണ് കലോത്സവത്തിനുണ്ടായിരുന്നത്.

സിനിമാ ഗാനാലാപനം, സിനിമാ നൃത്തം, കൊള്ളിപ്പാട്ട് പോലെ പണ്ട് കാലങ്ങളില്‍ പഠിച്ച വിവിധ കലാരൂപങ്ങള്‍, സ്‌കിറ്റ്, പൊറാട്ട് നാടകം, ഭക്തിഗാനം എന്നീ ഇനങ്ങളെല്ലാമാണ് കലോത്സവത്തിന്റെ ഭാഗമായി അവതരിപ്പിച്ചത്. 170ഓളം വയോജനങ്ങള്‍ കലോത്സവത്തിന്റെ ഭാഗമായി. അവര്‍ക്ക് സമ്മാനങ്ങളും നല്‍കി. പുരുഷന്മാരും സ്ത്രീകളും ഉള്‍പ്പെടെ 450 പേരാണ് പഞ്ചായത്തിലെ വയോജന അയല്‍ക്കൂട്ടങ്ങളുടെ ഭാഗമായുള്ളത്.

നല്ലേപ്പള്ളി ഗ്രാമപഞ്ചായത്ത് പ്രസിഡന്റ് എസ്. അനിഷ കലോത്സവത്തിന്റെ ഉദ്ഘാടനം നിര്‍വഹിച്ചു. വൈസ് പ്രസിഡന്റ് സതീഷ് അധ്യക്ഷത വഹിച്ച ചടങ്ങില്‍ കുടുംബശ്രീ സി.ഡി.എസ് ചെയര്‍പേഴ്സണ്‍ അനിത സ്വാഗതം ആശംസിച്ചു. കുടുംബശ്രീ ബ്ലോക്ക് കോ-ഓര്‍ഡിനേറ്റര്‍ രഞ്ജിനി പദ്ധതി വിശദീകരണം നടത്തി. സി.ഡി.എസ് വൈസ് ചെയര്‍പേഴ്സണ്‍ ഷെല്‍വം നന്ദി പറഞ്ഞു. പഞ്ചായത്ത് ഭരണസമിതി അംഗങ്ങള്‍, സി.ഡി.എസ് അംഗങ്ങള്‍, കുടുംബശ്രീ ഉദ്യോഗസ്ഥര്‍ തുടങ്ങിയവര്‍ ചടങ്ങില്‍ പങ്കെടുത്തു.

Content highlight

Elderly NHG art art fest palakkad nallepilly

ആദിവാസി ഊരുകള്‍ കേന്ദ്രീകരിച്ച് ലഹരിക്കെതിരേ പടപൊരുതാന്‍ പാലക്കാടിന്റെ 'നമ്മ്ത്ത് ഉസ്റ്'

'നമ്മത്ത് ഉസ്റ്' അഥവാ നമ്മുടെ ജീവന്‍ എന്ന പേരില്‍ ആദിവാസി ഊരുകള്‍ കേന്ദ്രീകരിച്ച് ലഹരിവിരുദ്ധ ക്യാമ്പെയിന് തുടക്കമിട്ടിരിക്കുകയാണ് കുടുംബശ്രീ പാലക്കാട് ജില്ലാ മിഷന്‍. ജില്ലയിലെ പട്ടികവര്‍ഗ്ഗ മേഖലകളിലും വിദ്യാഭ്യാസ സ്ഥാപനങ്ങളിലും മറ്റ് പ്രദേശങ്ങളിലും എക്സൈസ് വകുപ്പുമായി സംയോജിപ്പിച്ചു കൊണ്ടാണ് ഒക്ടോബര്‍ രണ്ട് വരെ നീണ്ടു നില്‍ക്കുന്ന ഈ ക്യാമ്പെയിന്‍ സംഘടിപ്പിക്കുന്നത്.

ബോധവത്ക്കരണ ക്ലാസ്സുകള്‍, സിഗ്‌നേച്ചര്‍ ക്യാമ്പെയിന്‍, ലഹരി വിരുദ്ധ ഹ്രസ്വചിത്ര പ്രദര്‍ശനം, റാലികള്‍ തുടങ്ങിയ നിരവധി പ്രവര്‍ത്തനങ്ങള്‍ ആസൂത്രണം ചെയ്തിട്ടുണ്ട്. ക്യാമ്പെയിന്റെ ജില്ലാതല ഉദ്ഘാടനം ജൂലൈ മൂന്നിന്‌ വാളയാര്‍ നടുപ്പതി ഊരില്‍ വൈദ്യുത വകുപ്പ് മന്ത്രി ശ്രീ. കെ. കൃഷ്ണന്‍ കുട്ടി നിര്‍വഹിച്ചു.

ലഹരിയുടെ ഭവിഷ്യത്തുകളെക്കുറിച്ച് യുവാക്കള്‍ക്കും സമൂഹത്തിനും ബോധവത്ക്കരണം നല്‍കുകയെന്ന ലക്ഷ്യത്തോടെ ആവിഷ്‌ക്കരിച്ചിരിക്കുന്ന ക്യാമ്പെയിന്റെ ഭാഗമായി ലഹരിക്ക് അടിമയായ വ്യക്തികള്‍ക്ക് ഡി-അഡിക്ഷന്‍ കേന്ദ്രങ്ങളുടെ സേവനം ലഭ്യമാക്കല്‍, കുടുംബാംഗങ്ങള്‍ക്ക് മാനസിക പിന്തുണയും കൗണ്‍സിലിങ് സേവനങ്ങള്‍ ലഭ്യമാക്കുന്ന പ്രവര്‍ത്തനങ്ങളും സംഘടിപ്പിക്കും. കുടുംബശ്രീ സ്‌നേഹിത ജെന്‍ഡര്‍ ഹെല്‍പ്പ് ഡെസ്‌ക്ക് ഉദ്യോഗസ്ഥരും കമ്മ്യൂണിറ്റി കൗണ്‍സിലര്‍മാരും ചേര്‍ന്നാണ് ഈ പ്രവര്‍ത്തനങ്ങള്‍ നടത്തുക.

ഉദ്ഘാടന ചടങ്ങില്‍ മലമ്പുഴ എംഎല്‍എ എ. പ്രഭാകരന്‍ ചടങ്ങില്‍ അധ്യക്ഷനായി. മലമ്പുഴ ബ്ലോക്ക് പഞ്ചായത്ത് പ്രസിഡന്റ് വി. ബിജോയ് മുഖ്യാതിഥിയായി. കുടുംബശ്രീ പാലക്കാട് ജില്ലാ മിഷന്‍ കോ-ഓര്‍ഡിനേറ്റര്‍ കെ.കെ. ചന്ദ്രദാസ് സ്വാഗതവും സി.ഡി.എസ് ചെയര്‍പേഴ്സണ്‍ എം. സുശീല നന്ദിയും പറഞ്ഞു. ഊര് മൂപ്പന്മാരെയും ഉന്നതവിജയം നേടിയ ഊരിലെ വിദ്യാര്‍ത്ഥികളെയും ചടങ്ങില്‍ ആദരിച്ചു.

Content highlight

Kudumbashree Palakkad District Mission launches 'Namath Usr' to fight against addiction focusing on tribal villages

എ.ടി.എം എന്നാല്‍ എറണാകുളത്തിന് ഇനി എനി ടൈം മില്‍ക്ക്!

എറണാകുളം ജില്ലാ പഞ്ചായത്തുമായി സംയോജിച്ച് കുടുംബശ്രീ ജില്ലാ മിഷന്‍ നടപ്പിലാക്കുന്ന എനി ടൈം മില്‍ക്ക് (എ.ടി.എം) പദ്ധതി ശ്രദ്ധ നേടുന്നു. മൃഗപരിപാലന മേഖലയിലെ കുടുംബശ്രീ പദ്ധതിയായ 'ക്ഷീരസാഗര'ത്തിന്റെ ഭാഗമായ അയല്‍ക്കൂട്ടാംഗങ്ങളില്‍ നിന്നും ശേഖരിക്കുന്ന ഗുണമേന്മയുള്ള പശുവിന്‍ പാല്‍ ആവശ്യക്കാരിലേക്ക് എത്തിക്കുകയെന്ന ലക്ഷ്യത്തോടെയാണ് ജില്ല 'എനി ടൈം മില്‍ക്ക്' പദ്ധതിക്ക് തുടക്കമിട്ടിരിക്കുന്നത്.

ജില്ലയില്‍ കോട്ടപ്പടി, നെടുമ്പാശ്ശേരി, എളങ്കുന്നപ്പുഴ എന്നിവിടങ്ങളിലാണ് പദ്ധതി നടപ്പിലാക്കുന്നത്. പശുവളര്‍ത്തലിലൂടെ ഉപജീനം കണ്ടെത്തുന്ന 'ക്ഷീരസാഗരം' പദ്ധതി ഗുണഭോക്താക്കള്‍ക്ക് വേണ്ടി 2022-23 സാമ്പത്തിക വര്‍ഷം ജില്ലാ പഞ്ചായത്ത് നല്‍കിയ ധനസഹായം ഉപയോഗപ്പെടുത്തിയാണ് എനി ടൈം മില്‍ക്ക് പദ്ധതിക്ക് കുടുംബശ്രീ ജില്ലാ മിഷന്‍ രൂപം നല്‍കിയത്. ജില്ലയില്‍ 200ലേറെ ക്ഷീരസാഗരം യൂണിറ്റുകളാണുള്ളത്. അഞ്ച് പേരാണ് ഒരു യൂണിറ്റിലുള്ളത്.

ഗുണമേന്മയുള്ള പാല്‍ ലഭിക്കാന്‍ സാധ്യത കുറവുള്ള, പാലിന് ആവശ്യക്കാര്‍ ഏറെയുള്ള ഇടങ്ങളാണ് പദ്ധതി നടപ്പിലാക്കാന്‍ തെരഞ്ഞെടുത്തത്. 200 ലിറ്റര്‍ ശേഷിയുള്ള മില്‍ക്ക് വെന്‍ഡിങ് മെഷീന്‍ സ്ഥാപിച്ച് ആവശ്യക്കാര്‍ക്ക് 10 രൂപ മുതലുള്ള തുകയ്ക്ക് പാല്‍ ലഭ്യമാക്കുകയാണ് ചെയ്യുന്നത്. അതാത് മേഖലയിലെ ക്ഷീരസാഗരം യൂണിറ്റുകള്‍ക്കാണ് വെന്‍ഡിങ് മെഷീന്റെ നടത്തിപ്പ് ചുമതല. ക്ഷീരസാഗരം ഗുണഭോക്താക്കളില്‍ നിന്ന് പാല്‍ ശേഖരിച്ച് വെന്‍ഡിങ് മെഷീനില്‍ നിറയ്ക്കുന്നു. ചില്ലര്‍ സംവിധാനമുള്ള ഈ മെഷീനില്‍ പാസ്റ്ററൈസ് ചെയ്യാതെ തന്നെ പാല്‍ ശീതീകരിച്ച് സൂക്ഷിക്കാനാകും.

എടിഎം കാര്‍ഡ് മാതൃകയില്‍ റീച്ചാര്‍ജ് ചെയ്യാനാകുന്ന കാര്‍ഡ് മുഖേനയോ പണമോ ഉപയോഗിച്ച് വെന്‍ഡിങ് മെഷീനില്‍ നിന്ന് പാല്‍ ശേഖരിക്കാം. മെഷീനില്‍ ശേഷിക്കുന്ന പാലില്‍ നിന്ന് ഉപ ഉത്പന്നങ്ങളുണ്ടാക്കി വിപണനം നടത്താനുള്ള പരിശീലനവും ക്ഷീരസാഗരം ഗുണഭോക്താക്കള്‍ക്ക് നല്‍കിയിട്ടുണ്ട്.

പദ്ധതിയുടെ ജില്ലാതല ഉദ്ഘാടനം ജൂണ്‍ 24ന് കോട്ടപ്പടിയില്‍ ജില്ലാ പഞ്ചായത്ത് പ്രസിഡന്റ് ശ്രീ. ഉല്ലാസ് തോമസ് നിര്‍വഹിച്ചു. നെടുമ്പാശ്ശേരി എയര്‍പോര്‍ട്ട് റോഡിനോട് ചേര്‍ന്നുള്ള യൂണിറ്റും പ്രവര്‍ത്തനം ആരംഭിച്ചു. എളങ്കുന്നപ്പുഴയില്‍ ഉടന്‍ തന്നെ പ്രവര്‍ത്തനമാരംഭിക്കും. ഭാവിയില്‍ ജില്ലയിലെ വിവിധ മേഖലകളിലേക്ക് കൂടി പദ്ധതി വ്യാപിപ്പിക്കാനാണ് ലക്ഷ്യമിടുന്നത്.

കോട്ടപ്പടി പഞ്ചായത്തില്‍ തൈക്കാവുംപടിയിലും നെടുമ്പാശ്ശേരിയില്‍ നായത്തോടുമുള്ള എനി ടൈം മില്‍ക്ക് കേന്ദ്രങ്ങള്‍ രാവിലെ ആറ് മുതല്‍ വൈകുന്നേരം ഏഴ് വരെ പ്രവര്‍ത്തിക്കുന്നു.

Content highlight

Kudumbashree Ernakulam District Mission launches 'Any Time Milk' Projectml

ധനം ചെയ്ഞ്ച് മേക്കര്‍ അവാര്‍ഡ് കുടുംബശ്രീക്ക്

ധനം ബിസിനസ് മാസികയുടെ ചെയ്ഞ്ച് മേക്കര്‍ പുരസ്‌ക്കാരം കുടുംബശ്രീക്ക്. എറണാകുളത്ത് 22ന് സംഘടിപ്പിച്ച പതിനഞ്ചാമത് ധനം ബിസിനസ് സമ്മിറ്റ് ആന്‍ഡ് അവാര്‍ഡ് നൈറ്റ് 2023ല്‍ ധനകാര്യ വകുപ്പ് മന്ത്രി ശ്രീ കെ.എന്‍. ബാലഗോപാലില്‍ നിന്ന് കുടുംബശ്രീ എക്‌സിക്യൂട്ടീവ് ഡയറക്ടര്‍ അനു കുമാരി ഐ.എ.എസ് പുരസ്‌ക്കാരം ഏറ്റുവാങ്ങി.

സംസ്ഥാന ദാരിദ്ര്യ നിര്‍മ്മാര്‍ജ്ജന ദൗത്യമായ കുടുംബശ്രീ കഴിഞ്ഞ 25 വര്‍ഷങ്ങളില്‍ കേരള സമൂഹത്തില്‍ ശ്രദ്ധേയ മാറ്റങ്ങളാണ് ഉളവാക്കിയത്.

Content highlight

Kudumbashree bags 'Dhanam Change Maker Award' ML