വാര്‍ത്തകള്‍

105.63 കോടി  രൂപയുടെ റെക്കോഡ് വിറ്റുവരവുമായി കുടുംബശ്രീ കേരള ചിക്കന്‍ പദ്ധതി.  2024-25 സാമ്പത്തിക വര്‍ഷത്തിലെ വിറ്റുവരവിലാണ് മികച്ച നേട്ടം കൈവരിച്ചു കൊണ്ട് പദ്ധതിയുടെ കുതിപ്പ്.  ഇതു കൂടി ചേര്‍ത്ത് നാളിതു വരെ ആകെ 357 കോടി രൂപയുടെ വിറ്റുവരവ് പദ്ധതി സ്വന്തമാക്കി.

നിലവില്‍ പതിനൊന്ന് ജില്ലകളിലാണ് പദ്ധതി നടപ്പാക്കുന്നത്.  ഇതിന്‍റെ ഭാഗമായി 450 ബ്രോയ്ലര്‍ ഫാമുകളും 139 ഔട്ട്ലെറ്റുകളും സംസ്ഥാനത്ത് പ്രവര്‍ത്തിക്കുന്നു. ഇതില്‍ അംഗങ്ങളായ എഴുനൂറോളം ഗുണഭോക്താക്കള്‍ക്കാണ് വിറ്റുവരവിന്‍റെ വരുമാനമത്രയും ലഭിക്കുക.

 2019-ലാണ് സംസ്ഥാനത്ത് കേരള ചിക്കന്‍ പദ്ധതി ആരംഭിച്ചത്. തുടക്കം മുതല്‍ ഗുണഭോക്താക്കള്‍ക്ക് ആകര്‍ഷകമായ വരുമാന  ലഭ്യത ഉറപ്പു വരുത്താന്‍ കഴിയുന്നു എന്നതാണ്  പദ്ധതിയെ ശ്രദ്ധേയമാക്കുന്നത്.  ഔട്ട്ലെറ്റ് നടത്തുന്ന ഒരു ഗുണഭോക്താവിന് ശരാശരി 89,000 രൂപയാണ് മാസവരുമാനമായി ലഭിക്കുന്നത്. നാളിതു വരെ ഈയിനത്തില്‍ 45.40 കോടി രൂപ ഗുണഭോക്താക്കള്‍ക്ക് വരുമാന ഇനത്തില്‍ ലഭിച്ചു.  

കോഴി വളര്‍ത്തല്‍ കര്‍ഷകര്‍ക്കും മികച്ച നേട്ടമാണ് കൈവരിക്കാന്‍ കഴിഞ്ഞത്. ഫാം ഇന്‍റഗ്രേഷന്‍ വഴി കര്‍ഷകര്‍ക്ക് രണ്ടു മാസത്തിലൊരിക്കല്‍ 50,000 രൂപയാണ് വരുമാനമായി ലഭിക്കുക. നാളിതു വരെ ഇന്‍റഗ്രേഷന്‍ വഴി മാത്രം കര്‍ഷകര്‍ക്ക് 33.19 കോടി രൂപ ലഭിച്ചിട്ടുണ്ട്.

ഉപഭോക്താവിന് ന്യായവിലയ്ക്ക് സംശുദ്ധമായ കോഴിയിറച്ചി ലഭ്യമാക്കുക എന്ന ലക്ഷ്യത്തോടെ സംസ്ഥാനത്ത് കുടുംബശ്രീ മുഖേന ആരംഭിച്ച പദ്ധതിയാണ് കേരള ചിക്കന്‍. കുടുംബശ്രീ വനിതകള്‍ക്ക് മെച്ചപ്പെട്ട തൊഴിലും വരുമാന ലഭ്യതയും ഉറപ്പു വരുത്തുകയാണ് പദ്ധതിയുടെ ലക്ഷ്യം. കൂടാതെ   ഉപഭോക്താക്കള്‍ക്ക് ന്യായവിലയില്‍ ഗുണമേന്‍മയുള്ള ചിക്കന്‍ ലഭ്യമാക്കുക, ആഭ്യന്തര ഉപഭോഗത്തിനാവശ്യമായ ചിക്കന്‍റെ പകുതിയെങ്കിലും ഉല്‍പാദിപ്പിക്കുക എന്നിവയും പദ്ധതിയുടെ ലക്ഷ്യങ്ങളാണ്.

പദ്ധതി വിപുലീകരിക്കുന്നതിന്‍റെ ഭാഗമായി മീറ്റ് പ്രോഡക്ട്സ് ഓഫ് ഇന്‍ഡ്യയുമായി സഹകരിച്ചു  കൊണ്ട് 'കുടുംബശ്രീ കേരള ചിക്കന്‍' എന്ന ബ്രാന്‍ഡില്‍ ഫ്രോസന്‍ ചിക്കന്‍ കറി കട്ട് വിപണിയിലെത്തിക്കാന്‍ കഴിഞ്ഞിരുന്നു. നിലവില്‍ തിരുവനന്തപുരം, തൃശൂര്‍, എറണാകുളം, കോട്ടയം, പത്തനംതിട്ട ജില്ലകളില്‍ ഉല്‍പന്നം ലഭ്യമാണ്. ഈ വര്‍ഷം ഇടുക്കി, വയനാട്, കാസര്‍കോട് ജില്ലകളില്‍ കൂടി പദ്ധതി വ്യാപിപ്പിക്കും. 

ഇരുനൂറ് രൂപ വാര്‍ഷിക പ്രമിയം നിരക്കില്‍ മികച്ച ഇന്‍ഷുറന്‍സ് പരിരക്ഷ ലഭ്യമാക്കുന്ന  ജീവന്‍ ദീപം ഒരുമ ഇന്‍ഷുറന്‍സ് പദ്ധതി വഴി സംസ്ഥാനത്തെ അയല്‍ക്കൂട്ട അംഗങ്ങള്‍ക്ക് ഇന്‍ഷുറന്‍സ് പരിരക്ഷയൊരുക്കാന്‍ കുടുംബശ്രീ. കേരള സംസ്ഥാന ഇന്‍ഷുറന്‍സ് വകുപ്പ്, കുടുംബശ്രീ, ലൈഫ് ഇന്‍ഷുറന്‍സ് കോര്‍പ്പറേഷന്‍ ഓഫ് ഇന്‍ഡ്യ എന്നിവ സംയുക്തമായാണ് പദ്ധതി നടപ്പാക്കുന്നത്. പദ്ധതിയുമായി ബന്ധപ്പെട്ട് പോളിസി ഉടമകളെ ചേര്‍ക്കുന്നതിനായി ക്യാമ്പയിന്‍ ആരംഭിച്ചു.ഏപ്രില്‍ 30 വരെയാണ് കാലാവധി.

  കുടുംബശ്രീ എക്സിക്യൂട്ടീവ് ഡയറക്ടര്‍ എച്ച് ദിനേശന്‍ ഐ.എ.എസ്, കേരള സംസ്ഥാന ഇന്‍ഷുറന്‍സ് വകുപ്പ് ജോയിന്‍റ് ഡയറക്ടര്‍ ബുഷറ എസ്.ദീപ, എല്‍.ഐ.സി പെന്‍ഷന്‍ ഗ്രൂപ്പ് സ്കീം വിഭാഗം ഡിവിഷണല്‍ മാനേജര്‍ എസ്.രാജ് കുമാര്‍ എന്നിവര്‍ പദ്ധതിയുടെ 2025-26 കാലയളവിലേക്കുള്ള ധാരണാപത്രം ഒപ്പു വച്ചു. 2025 ഏപ്രില്‍ ഒന്നു മുതല്‍ 2026 മാര്‍ച്ച് 31 വരെയാണ് പദ്ധതിയുടെ കാലാവധി.  

 2020-21സാമ്പത്തിക വര്‍ഷത്തിലാണ് പദ്ധതി ആരംഭിച്ചത്. അയല്‍ക്കൂട്ടങ്ങളിലെ ഏതെങ്കിലും ഒരംഗത്തിന് ആകസ്മിക മരണമോ അപകടമരണമോ  സംഭവിച്ചാല്‍ ഇന്‍ഷുറന്‍സ് പദ്ധതി വഴി സാമ്പത്തിക സഹായം ലഭ്യമാക്കും.  18 മുതല്‍ 74 വയസു വരെ പ്രായമുള്ളവര്‍ക്ക് പദ്ധതിയില്‍ അംഗമാകാം. 18നും 50നും ഇടയില്‍ പ്രായമുള്ള അയല്‍ക്കൂട്ട അംഗത്തിന് സ്വാഭാവിക മരണം സംഭവിക്കുകയാണെങ്കില്‍ പോളിസിയില്‍ പറഞ്ഞിട്ടുള്ള പ്രകാരം  അവകാശിക്ക് രണ്ടു ലക്ഷം രൂപ ലഭിക്കും.   51-60 വയസു വരെ പോളിസി ഉടമയ്ക്ക് മരണം സംഭവിച്ചാല്‍ 80,000 രൂപയും  61 -70 വരെ 30,000 രൂപയും  71 -74 വരെ പ്രായമുള്ള പോളിസി ഉടമകള്‍ക്ക് മരണം സംഭവിച്ചാല്‍  25,000 രൂപയുമാണ് അവകാശിക്ക് ലഭിക്കുക. അപകട മരണം സംഭവിച്ചാല്‍ അപകട ആനുകൂല്യമായി 30,000 രൂപ അധികം ലഭിക്കും.  

അയല്‍ക്കൂട്ട അംഗങ്ങള്‍ ചേര്‍ന്ന് ലിങ്കേജ് വായ്പായെടുത്ത ശേഷം ഇതിലെ ഒരഗത്തിനു മരണം സംഭവിച്ചാല്‍ ആ വ്യക്തിയുടെ വായ്പാ ബാധ്യത മറ്റ് അംഗങ്ങള്‍ ഏറ്റെടുക്കേണ്ടി വരുന്ന സാഹചര്യമാണ് മുമ്പുണ്ടായിരുന്നത്. എന്നാല്‍ ഇന്‍ഷുറന്‍സ് പരിരക്ഷ ലഭിക്കുന്നതോടെ ഈ സാഹചര്യം ഒഴിവാകും. മരണമടഞ്ഞ ആള്‍ക്ക് ലഭ്യമാകുന്ന ഇന്‍ഷുറന്‍സ് തുകയില്‍ നിന്നും ഈ വ്യക്തിയുടെ പേരില്‍ നിലനില്‍ക്കുന്ന വായ്പാ തുക അയല്‍ക്കൂട്ടത്തിന്‍റെ ബാങ്ക് അക്കൗണ്ടിലേക്കു നല്‍കും. ബാക്കി തുക മരണമടഞ്ഞ വ്യക്തിയുടെ അവകാശിക്കും ലഭിക്കും.

സി.ഡി.എസ്തലത്തില്‍ പ്രവര്‍ത്തിക്കുന്ന റിസോഴ്സ് പേഴ്സണ്‍മാരായ ബീമ മിത്ര വഴിയാണ് അയല്‍ക്കൂട്ട അംഗങ്ങളില്‍ നിന്നുള്ള പ്രീമിയം സമാഹരണം. പദ്ധതിയില്‍ പുതുതായി അംഗങ്ങളെ ചേര്‍ക്കുന്നതും നിലവിലുളള പോളിസി പുതുക്കുന്നതും ഉള്‍പ്പെടെയുള്ള പ്രവര്‍ത്തനങ്ങളും ബീമാ മിത്ര വഴിയാണ്.  

കുടുംബശ്രീ സംസ്ഥാന മിഷനില്‍ ധാരണാ പത്രം ഒപ്പുവയ്ക്കുന്ന ചടങ്ങില്‍ പ്രോഗ്രാം ഓഫീസര്‍ നവീന്‍ സി, സ്റ്റേറ്റ് പ്രോഗ്രാം മാനേജര്‍ അബ്ദുള്‍ ബഷീര്‍ കെ, സ്റ്റേറ്റ് അസിസ്റ്റന്‍റ് പ്രോഗ്രാം മാനേജര്‍ നീതു എല്‍.പ്രകാശ്, എല്‍.ഐ.സി പെന്‍ഷന്‍, ഗ്രൂപ്പ് സ്കീം വിഭാഗം ബ്രാഞ്ച് മാനേജര്‍ ഹെലന്‍ അലക്സ്, കേരള സംസ്ഥാന ഇന്‍ഷുറന്‍സ് വകുപ്പ് അസിസ്റ്റന്‍റ് ഡയറക്ടര്‍ സുധീര്‍ പി.എ എന്നിവര്‍ പങ്കെടുത്തു.

' കുടുംബശ്രീ മൈന്‍ഡ് ബ്ളോവേഴ്സ് ലിയോറ ഫെസ്റ്റ് ' സമ്മര്‍ ക്യാമ്പില്‍ പങ്കെടുക്കുന്നതിലൂടെ ഓരോ കുട്ടിക്കും ഉള്ളിലുള്ള വെളിച്ചത്തെ കണ്ടെത്താന്‍ കഴിയുന്നതിനൊപ്പം സമൂഹത്തിന് നന്‍മയുടെ വെളിച്ചം പകരാന്‍ സാധിക്കുമെന്ന് തദ്ദേശ സ്വയംഭരണ എക്സൈസ് പാര്‍ലമെന്‍ററി കാര്യ വകുപ്പ് മന്ത്രി എം.ബി രാജേഷ്.  സമ്മര്‍ ക്യാമ്പിന്‍റെ ഭാഗമായി ഏപ്രില്‍ എട്ടിന് സംസ്ഥാനത്തെ എല്ലാ വാര്‍ഡുകളിലും സംഘടിപ്പിക്കുന്ന ബാലസംഗമത്തില്‍ പങ്കെടുക്കുന്നതിനായി ബാലസഭാംഗങ്ങളെ അഭിസംബോധന ചെയ്തു കൊണ്ടുള്ള മന്ത്രിയുടെ കത്തിലാണ് കുട്ടികള്‍ക്കുള്ള ക്ഷണം.

ശുചിത്വോത്സവം, ശുചിത്വോസവം 2.0 യുടെ ഭാഗമായി സംഘടിപ്പിച്ച കുട്ടികളുടെ അന്താരാഷ്ട്ര ശുചിത്വ ഉച്ചകോടി എന്നിവയെല്ലാം കുടുംബശ്രീ ബാലസഭയുടെ പ്രവര്‍ത്തന മികവിന് തെളിവാണെന്ന് മന്ത്രി പറഞ്ഞു.  എന്നാല്‍ ഇത്രയേറെ സന്തോഷത്തിലും അഭിമാനത്തിലും നില്‍ക്കുമ്പോഴും സമൂഹത്തില്‍ നടന്നുകൊണ്ടിരിക്കുന്ന കാര്യങ്ങള്‍ ആശങ്ക ഉണ്ടാക്കുന്നു. അത്തരം പ്രവൃത്തികളെ ചെറുത്തു തോല്‍പ്പിക്കണം. 'കുടുംബശ്രീ മൈന്‍ഡ ബ്ളോവേഴ്സ് ലിയോറ ഫെസ്റ്റ്' എന്നതാണ് ഈ വര്‍ഷത്തെ ക്യാമ്പിന് നല്‍കിയിരിക്കുന്ന പേര്. ഓരോരുത്തരും അവരുടെ ഉള്ളിലുള്ള വെളിച്ചത്തെ തിരിച്ചറിയുക എന്നതാണ് ഇതിന്‍റെ അര്‍ത്ഥം. കഴിഞ്ഞ വര്‍ഷം ആരംഭിച്ച മൈന്‍ഡ് ബ്ളോവേഴ്സ് ക്യാമ്പയിനിലൂടെ കുട്ടികളുടെ ഒട്ടേറെ നവീന ആശയങ്ങള്‍ രൂപീകരിക്കാന്‍ സാധിച്ചിട്ടുണ്ട്. കുട്ടികള്‍ തയ്യാറാക്കുന്ന നൂതന ആശയങ്ങളില്‍ സംസ്ഥാനതലത്തിലേക്ക് തിരഞ്ഞെടുക്കുന്ന മികച്ച ആശയങ്ങള്‍ പ്രാവര്‍ത്തികമാക്കുന്നതിനുള്ള എല്ലാ സഹായവും കുടുംബശ്രീ നല്‍കും. മധ്യവേനല്‍ അവധിക്കാലത്ത് കുടുംബശ്രീ സംഘടിപ്പിക്കുന്ന സമ്മര്‍ക്യാമ്പില്‍ പങ്കെടുക്കുന്നതോടൊപ്പം കൂട്ടുകാരെയും പങ്കെടുപ്പിക്കണമെന്ന് പറഞ്ഞ മന്ത്രി എല്ലാ ബാലസഭാംഗങ്ങള്‍ക്കും റംസാന്‍, വിഷു, ഈസ്റ്റര്‍ ആശംസകള്‍ നേര്‍ന്നു.

മന്ത്രിയുടെ കത്ത് ഓരോ ജില്ലയിലുമുളള ബാലസഭാ റിസോഴ്സ് പേഴ്സണ്‍മാര്‍ വഴി ഏപ്രില്‍ എട്ടിന് മുമ്പായി അതത് ബാലസഭയിലെത്തിക്കും.

കുടുംബശ്രീ ബാലസഭാംഗങ്ങള്‍ക്കായി 'ലിയോറ ഫെസ്റ്റ്' ജില്ലാതല സമ്മര്‍ ക്യാമ്പുകള്‍ സംഘടിപ്പിക്കുന്നു. മെയ് മാസത്തിലാണ് ക്യാമ്പ് സംഘടിപ്പിക്കുക. കുടുംബശ്രീ ബാലസഭയിലെ അംഗങ്ങളായ കുട്ടികള്‍ക്ക് അറിവിനും സര്‍ഗാത്മകതയ്ക്കുമൊപ്പം സംരംഭകത്വത്തിന്‍റെ നൂതന പാഠങ്ങള്‍ പരിശീലിപ്പിക്കുക എന്ന ലക്ഷ്യത്തോടെ കഴിഞ്ഞ വര്‍ഷം ആരംഭിച്ച 'മൈന്‍ഡ് ബ്ളോവേഴ്സ്' ക്യാമ്പയിന്‍റെ തുടര്‍ച്ചയാണ് 'ലിയോറ ഫെസ്റ്റ്' സമ്മര്‍ ക്യാമ്പ്.

ഹീബ്രൂ ഭാഷയിലുള്ള വാക്കാണ് 'ലിയോറ'. വെളിച്ചം എന്നാണ് ഇതിന്‍റെ അര്‍ത്ഥം.  കുട്ടികള്‍ക്കിടയില്‍ ലഹരി വ്യാപകമായ സാഹചര്യത്തില്‍ ഓരോ കുട്ടിയുടെയും വ്യത്യസ്ത മേഖലകളിലുള്ള  അഭിരുചികള്‍ കണ്ടെത്തി വിജ്ഞാനവും നൈസര്‍ഗിക വാസനകളും നല്‍കുന്ന സന്തോഷമാണ് യഥാര്‍ത്ഥ ലഹരിയെന്ന ബോധ്യം നേടാന്‍ കുട്ടികളെ പ്രാപ്തരാക്കുക എന്നതാണ് ക്യാമ്പ് ലക്ഷ്യമിടുന്നത്. നേതൃശേഷിയും ആശയവിനിമയ പാടവവും സര്‍ഗാത്മകതയും വികസിപ്പിച്ചുകൊണ്ട്  കുട്ടികള്‍ക്ക് മാനസികവും ബൗദ്ധികവുമായ ഉണര്‍വ് നല്‍കുകയാണ് ലക്ഷ്യം. ക്യാമ്പില്‍ മികവ് തെളിയിക്കുന്ന കുട്ടികള്‍ക്ക് സംസ്ഥാനതലത്തില്‍ പരിശീലനം നല്‍കി 2026-ല്‍ സംഘടിപ്പിക്കുന്ന ' ഇന്‍റര്‍നാഷണല്‍ ഇന്നവേഷന്‍ കോണ്‍ക്ളേവി'ല്‍ ആശയാവതരണം നടത്താനുളള അവസരവും കുടുംബശ്രീ ലഭ്യമാക്കും.

സമ്മര്‍ ക്യാമ്പിലേക്ക് കുട്ടികളെ തിരഞ്ഞെടുക്കുന്നതിന്‍റെ ഭാഗമായി ബാലസഭാ തിരഞ്ഞെടുപ്പ് ദിനമായ ഏപ്രില്‍ എട്ടിന് ബാലസഭാംഗങ്ങളെ പങ്കെടുപ്പിച്ചു കൊണ്ട് സംസ്ഥാനത്ത് എല്ലാ വാര്‍ഡുകളിലും വാര്‍ഡുതല ബാലസംഗമം സംഘടിപ്പിക്കും. ഇതില്‍ മികച്ച പ്രകടനം കാഴ്ച വയ്ക്കുന്ന കുട്ടികളെ ഉള്‍പ്പെടുത്തി പഞ്ചായത്ത് നഗരസഭാതലത്തില്‍ ഏകദിന ശില്‍പശാലയും തുടര്‍ന്ന് ബ്ളോക്ക്തല ഇന്നവേഷന്‍ ഫെസ്റ്റും സംഘടിപ്പിക്കും. ഇതില്‍ നിന്നും തിരഞ്ഞെടുക്കുന്ന കുട്ടികള്‍ക്കാണ് മൂന്നു ദിവസത്തെ ജില്ലാതല സമ്മര്‍ ക്യാമ്പില്‍ പങ്കെടുക്കാന്‍ അവസരം ലഭിക്കുക. ഓരോ ജില്ലയിലും അമ്പത് കുട്ടികള്‍ വീതം സമ്മര്‍ ക്യാമ്പില്‍ പങ്കെടുക്കും.  

തിയേറ്റര്‍ വര്‍ക്ക്ഷോപ്, ശാസ്ത്ര മാജിക്, കുട്ടികളും ധനകാര്യ മാനേജ്മെന്‍റും, സൈബര്‍ ക്രൈം; ലഹരി വിരുദ്ധ പ്രവര്‍ത്തനങ്ങള്‍, ലീഡര്‍ഷിപ് തുടങ്ങി എട്ടോളം വ്യത്യസ്ത വിഷയങ്ങളാണ് സമ്മര്‍ ക്യാമ്പില്‍ കുട്ടികള്‍ക്ക് പരിചയപ്പെടുത്തുക. തുടര്‍ന്ന് കുട്ടികള്‍ ഇതുമായി ബന്ധപ്പെട്ട അവതരണങ്ങള്‍ നടത്തും. ഇതില്‍ മികച്ച അവതരണം നടത്തുന്ന 140 കുട്ടികള്‍ക്കാണ് 2026-ലെ ' ഇന്‍റര്‍നാഷണല്‍ ഇന്നവേഷന്‍ കോണ്‍ക്ളേവി'ല്‍ പങ്കെടുക്കാന്‍ അവസരം ലഭിക്കുക.

ഹരിതകര്‍മ സേനാംഗങ്ങള്‍ക്ക് ചികിത്സാ ആനുകൂല്യങ്ങള്‍ ലഭ്യമാക്കുന്നതിനായി  കുടുംബശ്രീയും യൂണൈറ്റഡ് ഇന്‍ഷുറന്‍സ് കമ്പനിയും സംയുക്തമായി നടപ്പാക്കുന്ന  'ഇന്‍സ്പയര്‍' ഇന്‍ഷുറന്‍സ് പദ്ധതിയില്‍ ഈ വര്‍ഷം അംഗങ്ങളായത് 26223 പേര്‍. ഹരിത കര്‍മസേനയിലെ അംഗങ്ങളുടെ ആരോഗ്യ സുരക്ഷയൊരുക്കുന്നതിന്‍റെ ഭാഗമായാണ് ഇന്‍ഷുറന്‍സ് പദ്ധതി നടപ്പാക്കുന്നത്.

പതിനെട്ടു മുതല്‍ എഴുപത്തഞ്ച് വയസ് വരെയുള്ളവര്‍ക്ക് അതത് സി.ഡി.എസുകള്‍ മുഖേന ഇന്‍ഷുറന്‍സ് പദ്ധതിയില്‍ ചേരാനാകും. 1384 രൂപയാണ് വാര്‍ഷിക പ്രീമിയം. ഇതില്‍ അമ്പത് ശതമാനം കുടുംബശ്രീയും അമ്പത് ശതമാനം ഹരിതകര്‍മസേനാ കണ്‍സോര്‍ഷ്യത്തില്‍ നിന്നുമാണ് നല്‍കുക. ഇതു പ്രകാരം ഓരോ അംഗവും 692 രൂപ വീതം അടച്ചാല്‍ മതിയാകും. ഇന്‍ഷുറന്‍സ് പദ്ധതിയില്‍ അംഗങ്ങളാകുന്നവര്‍ക്ക് ആകെ രണ്ടു ലക്ഷം രൂപയാണ് ചികിത്സാ ആനുകൂല്യമായി ലഭിക്കുക. നിലവിലുളള അസുഖങ്ങള്‍ക്കും 50,000 രൂപ വരെ ചികിത്സാ ആനുകൂല്യം ലഭിക്കും. ഇതുകൂടി ചേര്‍ത്താണ് രണ്ടു ലക്ഷം രൂപ പോളിസി ഉടമയ്ക്ക് ലഭിക്കുക. കഴിഞ്ഞ വര്‍ഷം വരെ ഒരു ലക്ഷം രൂപയായിരുന്നു പദ്ധതി വഴി ലഭിച്ചിരുന്ന ചികിത്സാ ആനുകൂല്യം.  

രണ്ടു ലക്ഷം രൂപ ചികിത്സാ ആനുകൂല്യം ലഭിക്കുന്ന വ്യക്തിഗത ഇന്‍ഷുറന്‍സ് പോളിസി എടുക്കാന്‍ നിലവില്‍ 5000 മുതല്‍ 6000 രൂപ വരെയാണ് വാര്‍ഷിക പ്രീമിയമായി നല്‍കേണ്ടത്. എന്നാല്‍ കുടുംബശ്രീ 'ഇന്‍സ്പയര്‍' ഇന്‍ഷുറന്‍സ് പദ്ധതി വഴി 692 രൂപ വാര്‍ഷിക പ്രീമിയം നിരക്കില്‍  രണ്ടു ലക്ഷം രൂപയുടെ ആനുകൂല്യമാണ് ഇവര്‍ക്ക് ലഭിക്കുക. കൂടാതെ ഹരിതകര്‍മ സേനാംഗങ്ങള്‍ക്ക് എഴുപത്തഞ്ച് വയസു വരെ പദ്ധതിയില്‍ ചേര്‍ന്ന് ഇന്‍ഷുറന്‍സ് പരിരക്ഷ ഉറപ്പാക്കാന്‍ കഴിയുന്നു എന്നതും നേട്ടമാണ്.

സംസ്ഥാനത്തെ മാലിന്യമുക്തമാക്കുന്നതില്‍ മാതൃകാപരമായ പ്രവര്‍ത്തനവുമായി കുടുംബശ്രീയുടെ പെണ്‍കരുത്ത്. കഴിഞ്ഞ ഏപ്രില്‍ മുതല്‍ ഈ ഫെബ്രുവരി വരെയുളള കാലയളവില്‍ ഹരിത കര്‍മസേനാംഗങ്ങള്‍ മുഖേന ശേഖരിച്ച് ക്ളീന്‍ കേരള കമ്പനിക്ക് കൈമാറിയത്  50190 ടണ്‍ അജൈവ മാലിന്യം. 4438 യൂണിറ്റുകളില്‍ അംഗങ്ങളായ 35214 വനിതകളുടെ  കഠിനാധ്വാനവും പ്രവര്‍ത്തന മികവുമാണ് ഇത്രയും വലിയ മാലിന്യ നീക്കത്തിനു പിന്നിലെ കരുത്ത്.

സംസ്ഥാനത്തെ രൂക്ഷമായ മാലിന്യ പ്രശ്നത്തിന് വികേന്ദ്രീകൃത രീതിയില്‍ പരിഹാരം കാണുന്നതിന് രൂപീകരിച്ച സംവിധാനമാണ് ഹരിതകര്‍മ സേന. മാലിന്യം വരുമാനമാക്കി മാറ്റുക എന്ന ലക്ഷ്യത്തോടെയാണ് ഇതിന്‍റെ രൂപീകരണം.

തദ്ദേശ സ്ഥാപനങ്ങളിലെ മാലിന്യ ശേഖരണം വഴി ലഭിക്കുന്ന യൂസര്‍ ഫീ ഇനത്തിലും വര്‍ധനവ് ഉണ്ടായിട്ടുണ്ട്. 341 കോടി രൂപയാണ് ഈയിനത്തില്‍ അംഗങ്ങള്‍ക്ക് ലഭിച്ചത്. കൂടാതെ തരം തരിച്ച മാലിന്യം ക്ളീന്‍ കേരള കമ്പനിക്ക് കൈമാറിയതു വഴി 7.8 കോടി രൂപയും നേടാനായി. മികച്ച രീതിയില്‍ മാലിന്യ ശേഖരണവും സംസ്ക്കരണവും നടത്തുന്ന യൂണിറ്റുകള്‍ക്ക് ലഭിക്കുന്ന ഉയര്‍ന്ന വരുമാനം കൂടുതല്‍ വനിതകളെ ഈ രംഗത്തേക്ക് ആകര്‍ഷിക്കുന്നുണ്ട്. ഇതിന്‍റെ ഭാഗമായി പുതുതായി 1412 പേര്‍ കൂടി ഹരിതകര്‍മ സേനയില്‍ അംഗങ്ങളായിട്ടുണ്ട്.

അജൈവ മാലിന്യത്തിന്‍റെ പുനരുപയോഗ സാധ്യതകള്‍ പ്രയോജനപ്പെടുത്തി പ്രകൃതി സൗഹൃദ സംരംഭ രൂപീകരണവും കുടുംബശ്രീ അംഗങ്ങള്‍ മുഖേന നടന്നു വരുന്നു. 223 തുണി സഞ്ചി നിര്‍മാണ യൂണിറ്റുകളും 540 പേപ്പര്‍ ബാഗ് യൂണിറ്റുകളും ഈ രംഗത്ത് സജീവമാണ്.

സമ്പൂര്‍ണ ശുചിത്വം കൈവരിക്കുന്നതിന്‍റെ ഭാഗമായി സര്‍ക്കാര്‍ നടപ്പാക്കുന്ന ക്യാമ്പയിനുകളിലും മഴക്കാലപൂര്‍വ ശുചീകരണ പ്രവര്‍ത്തനങ്ങളിലും മുഖ്യ പങ്കു വഹിക്കുന്നതും ഹരിതകര്‍മസേനകളാണ്. ജലാശയങ്ങളിലോ പൊതു നിരത്തുകളിലോ വലിച്ചെറിയപ്പെടുമായിരുന്ന അജൈവമാലിന്യമാണ് ഹരിതകര്‍മസേനകള്‍ മുഖേന നീക്കം ചെയ്യപ്പെടുന്നത് എന്നതും ശ്രദ്ധേയമാണ്.

കുടുംബശ്രീയുടെ ആഭിമുഖ്യത്തില്‍ സംഘടിപ്പിച്ച ഫോട്ടോഗ്രാഫി, ചെറുകഥ-ഉപന്യാസ രചനാ മത്സര വിജയികള്‍ക്കുള്ള പുരസ്കാര വിതരണം  മാസ്കോട്ട് ഹോട്ടലില്‍ സിംഫണി ഹാളില്‍ തദ്ദേശ സ്വയംഭരണ എക്സൈസ് വകുപ്പ് പാര്‍ലമെന്‍റി കാര്യ വകുപ്പ് മന്ത്രി എം.ബി രാജേഷ് നിര്‍വഹിച്ചു. സാമ്പത്തിക സാമൂഹിക രാഷ്ട്രീയ ശാക്തീകരണത്തോടൊപ്പം കുടുംബശ്രീ അംഗങ്ങളുടെ സാംസ്കാരിക ശാക്തീകരണം കൂടി ലക്ഷ്യമിട്ടുകൊണ്ടാണ് ഫോട്ടോഗ്രാഫി, ചെറുകഥ-ഉപന്യാസ രചനാ മത്സരങ്ങള്‍ സംഘടിപ്പിക്കുന്നതെന്ന് മന്ത്രി പറഞ്ഞു. എല്ലാ മേഖലകളെയും സ്പര്‍ശിക്കുന്ന പ്രവര്‍ത്തനങ്ങളിലൂടെ കേരളത്തില്‍  പുതിയ നേതൃത്വത്തെ സൃഷ്ടിക്കാന്‍ കുടുംബശ്രീക്ക് സാധിച്ചിട്ടുണ്ടെന്നും അദ്ദേഹം പറഞ്ഞു. കുടുംബശ്രീ ഗവേണിങ്ങ് ബോഡി അംഗം  ഗീത നസീര്‍ അധ്യക്ഷത വഹിച്ചു. സ്മിത സുന്ദരേശന്‍  മുഖ്യാതിഥിയായി.

ഫോട്ടോഗ്രാഫി പൊതുവിഭാഗത്തില്‍ എം.ജെ രതീഷ് കുമാര്‍(ഒന്നാം സ്ഥാനം), അരവിന്ദന്‍ മണലി(രണ്ടാം സ്ഥാനം), കെ.എ അബ്ദുള്‍ ഖാദര്‍ (മൂന്നാം സ്ഥാനം), അരുണ്‍ ജ്യോതി റിഷികേശ്, ആല്‍ഫ്രഡ് എം.കെ, എ.പ്രസാദ്(പ്രോത്സാഹന സമ്മാനം) എന്നിവര്‍ക്കാണ് പുരസ്കാരം ലഭിച്ചത്. അയല്‍ക്കൂട്ട/ ഓക്സിലറി വിഭാഗത്തില്‍ അനുഷ മോഹന്‍ (ഒന്നാം സ്ഥാനം), ജസ്ന പാലയ്ക്കല്‍ (രണ്ടാം സ്ഥാനം), ജെമിനി ബെന്നി (മൂന്നാം സ്ഥാനം), ജിഷാന കെ, ഫാത്തിമത്ത് സൗറ, റെമീന ടി.കെ എന്നിവര്‍ക്കും (പ്രോത്സാഹന സമ്മാനം) പുരസ്കാരം ലഭിച്ചു. ഇരു വിഭാഗത്തിലും ഒന്നും രണ്ടും മൂന്നും സ്ഥാനങ്ങള്‍ നേടിയ വിജയികള്‍ക്ക് യഥാക്രമം 25,000, 15,000, 10000 രൂപയുടെ ക്യാഷ് അവാര്‍ഡും പ്രോത്സാഹന സമ്മാനം നേടിയവര്‍ക്ക് 2000 രൂപയുടെ ക്യാഷ് അവാര്‍ഡുമാണ് നല്‍കിയത്.

സര്‍ഗ്ഗം കഥാപരചന മത്സരത്തില്‍ ഷീബ കെ(ഒന്നാം സ്ഥാനം)  മുഹസീന എം.എ(രണ്ടാം സ്ഥാനം), റഷീദ പി, ആര്‍ഷ ഉണ്ണി ബി(മൂന്നാം സ്ഥാനം), ശാന്തകുമാരി പി.കെ, നിര്‍മ്മല ബാലകൃഷ്ണന്‍, വിദ്യാ സുധീര്‍(പ്രോത്സാഹന സമ്മാനം) എന്നിവര്‍ക്കാണ് പുരസ്കാരം ലഭിച്ചത്. വിജയികള്‍ക്ക് യഥാക്രമം 20,000, 15,000, 5000, 2500 എന്നിങ്ങനെ ക്യാഷ് അവാര്‍ഡ് ലഭിച്ചു.  

ഉപന്യാസ രചനയില്‍ അഭിരാം പവിത്രന്‍ ഒ( ഒന്നാം സ്ഥാനം), അലന്‍ ആന്‍റണി (രണ്ടാം സ്ഥാനം), അല്‍ അമീന്‍ ജെ (മൂന്നാം സ്ഥാനം), അമിത് ജ്യോതി യു.പി (പ്രോത്സാഹന സമ്മാനം) എന്നിവര്‍ക്കും പുരസ്കാരം ലഭിച്ചു. വിജയികള്‍ക്ക് യഥാക്രമം 20,000, 15,000, 5000, 2500 എന്നിങ്ങനെ ക്യാഷ് അവാര്‍ഡ് നല്‍കി. എല്ലാ വിജയികള്‍ക്കും ക്യാഷ് അവാര്‍ഡിനൊപ്പം മെമന്‍റോയും സര്‍ട്ടിഫിക്കറ്റും നല്‍കി.

 

 

 

കുടുംബശ്രീയുടെ ആഭിമുഖ്യത്തില്‍ അയല്‍ക്കൂട്ട വനിതകള്‍ക്കായി സംഘടിപ്പിച്ച ‘സര്‍ഗ്ഗം’ സംസ്ഥാനതല ചെറുകഥാരചനാ മത്സരത്തില്‍ കണ്ണൂര്‍ കാങ്കോല്‍ ആലപ്പടമ്പ് സ്വദേശിനി ഷീബ കെ രചിച്ച ‘തലേക്കുത്തല്‍’ ഒന്നാം സ്ഥാനം നേടി. വിജയിക്ക് 20,000 രൂപയും മെമന്‍റോയും സര്‍ട്ടിഫിക്കറ്റും ഉള്‍പ്പെടുന്ന പുരസ്കാരം ലഭിക്കും. കോഴിക്കോട് ജില്ലയിലെ ചാത്തമംഗലം സ്വദേശിനി മുഹ്സീന എം.എം രചിച്ച ‘ഈയാംപൂച്ച’യ്ക്കാണ് രണ്ടാം സ്ഥാനം. 15,000 രൂപയാണ് കാഷ് അവാര്‍ഡ്. ‘അര്‍ദ്ധനാരീശ്വരന്‍’ എന്ന കഥ രചിച്ച മലപ്പുറം ജില്ലയിലെ എടവണ്ണ സ്വദേശിനിയായ റഷീദ പി, ‘ബനാറസ്’ എന്ന കഥ രചിച്ച തിരുവനന്തപുരം ചെമ്മരുതി സ്വദേശിനി ആര്‍ഷ ഉണ്ണി ബി എന്നിവര്‍ മൂന്നാം സ്ഥാനം പങ്കിട്ടു. ഇവര്‍ക്ക് 5000 രൂപ വീതം കാഷ് അവാര്‍ഡ് ലഭിക്കും.
 
കൊല്ലം എഴുകോണ്‍ സ്വദേശിനി ശാന്തകുമാരി പി.കെ, ഇടുക്കി വെള്ളത്തൂവല്‍ സ്വദേശിനി നിര്‍മ്മല ബാലകൃഷ്ണന്‍, കണ്ണൂര്‍ കുറ്റ്യാട്ടൂര്‍ സ്വദേശിനി വിദ്യ സുധീര്‍ എന്നിവര്‍ക്കാണ് പ്രോത്സാഹന സമ്മാനം. ഇവര്‍ക്ക് 2500 രൂപ വീതം കാഷ് അവാര്‍ഡ് ലഭിക്കും. എല്ലാ വിജയികള്‍ക്കും കാഷ് അവാര്‍ഡിനൊപ്പം മെമന്‍റോയും സര്‍ട്ടിഫിക്കറ്റും ലഭിക്കും. 2025 മാര്‍ച്ച് 18ന് തിരുവനന്തപുരം മാസ്കോട്ട് ഹോട്ടലില്‍ വൈകുന്നേരം അഞ്ചു മണിക്ക് തദ്ദേശ സ്വയംഭരണ എക്സൈസ് വകുപ്പ് മന്ത്രി എം.ബി രാജേഷ് വിജയികള്‍ക്കുള്ള പുരസ്കാരം വിതരണം ചെയ്യുമെന്ന് കുടുംബശ്രീ എക്സിക്യൂട്ടീവ് ഡയറക്ടര്‍ എച്ച്.ദിനേശന്‍ ഐ.എ.എസ് അറിയിച്ചു.

കുടുംബശ്രീ അയല്‍ക്കൂട്ട ഓക്സിലറി ഗ്രൂപ്പ് അംഗങ്ങള്‍ക്കായി 2024 നവംബര്‍ 28 മുതല്‍ ഡിസംബര്‍ 24 വരെ സംഘടിപ്പിച്ച മത്സരത്തില്‍ ആകെ 550 രചനകളാണ് ലഭിച്ചത്. കേരളാ യൂണിവേഴ്സിറ്റി കാര്യവട്ടം കാമ്പസിലെ മലയാള വിഭാഗം അധ്യാപകര്‍ നടത്തിയ പ്രാഥമിക പരിശോധനയ്ക്ക് ശേഷം ഡോ.ജോര്‍ജ്ജ് ഓണക്കൂര്‍, കെ.എ ബീന, റോസ്മേരി എന്നിവരടങ്ങിയ സമിതിയാണ് വിജയികളെ തിരഞ്ഞെടുത്തത്.