ഫീച്ചറുകള്‍

കുടുംബശ്രീ ആലപ്പുഴ ജില്ലാ മിഷന്റെ ആഭിമുഖ്യത്തിൽ ഒക്ടോബര്‍ 26ന്‌ സംഘടിപ്പിച്ച മിനി മാരത്തണിൽ പ്രായഭേദമന്യേ ഭാഗമായത് ആയിരത്തിലേറെ അയൽക്കൂട്ടാംഗങ്ങൾ.

ആലപ്പുഴ ഇ.എം.എസ് സ്റ്റേഡിയം മുതൽ ബീച്ച് വരെയായിരുന്നു മാരത്തോൺ. കുടുംബശ്രീ സ്നേഹിതാ ജെൻഡർ ഹെൽപ്പ് ഡെസ്ക് നൽകുന്ന 24 മണിക്കൂർ ടെലി കൗൺസിലിങ്ങ് ഉൾപ്പെടെയുള്ള വിവിധ സേവനങ്ങൾക്ക് പ്രചാരം നൽകുകയായിരുന്നു മിനി മാരത്തണിൻ്റെ ലക്ഷ്യം.

ആലപ്പുഴ ജില്ലാ പഞ്ചായത്ത് പ്രസിഡന്റ് കെ.ജി. രാജേശ്വരി മിനി മാരത്തൺ ഉദ്ഘാടനം ചെയ്തു. മുൻസിപ്പൽ ചെയർപേഴ്സൺ കെ. കെ. ജയമ്മ അധ്യക്ഷയായ ചടങ്ങിൽ വാർഡ് കൗൺസിലർമാരായ സിമി ഷാഫീഖാൻ, ഹെലൻ ഫെർണാണ്ടസ്, കുടുംബശ്രീ അസിസ്റ്റന്റ് ജില്ലാ മിഷൻ കോർഡിനേറ്റർ മാരായ ടെസ്സി ബേബി, അനന്ത രാജൻ,ആലപ്പുഴ സൗത്ത് സി.ഡി.എസ് ചെയർപേഴ്സൺ ഷീല മോഹൻ, ആലപ്പുഴ നോർത്ത് സി.ഡി.എസ് ചെയർപേഴ്സൺ സോഫിയ അഗസ്റ്റിൻ തുടങ്ങിയവർ ആശംസകൾ അർപ്പിച്ചു.

കുടുംബശ്രീ ആലപ്പുഴ ജില്ലാ മിഷൻ കോർഡിനേറ്റർ രഞ്ജിത്ത്. എസ് സ്വാഗതവും ജില്ലാ പ്രോഗ്രാം മാനേജർ സുനിത. പി കൃതജ്ഞതയും പറഞ്ഞു. തുടർന്ന് ബീച്ചിൽ പുന്നപ്ര ജ്യോതികുമാറും സംഘവും അവതരിപ്പിച്ച നാട്ടുപാട്ടു ചങ്ങാത്തം പരിപാടിയുമുണ്ടായിരുന്നു.

കുടുംബശ്രീയുടെ കാര്‍ഷിക സംരംഭക പ്രവര്‍ത്തനങ്ങള്‍ യുവതലമുറയ്ക്ക് പരിചയപ്പെടുത്തുന്നതും കാര്‍ഷിക സംരംഭക മേഖലയിലെ നൂതന സാങ്കേതിക വിദ്യകളും സാധ്യതകളും കുടുംബശ്രീ അംഗങ്ങള്‍ക്ക് മനസ്സിലാക്കി നല്‍കുന്നതും ലക്ഷ്യമിട്ട് സംഘടിപ്പിക്കുന്ന കുടുംബശ്രീ അഗ്രി ബിസിനസ് നെറ്റ്‌വര്‍ക്കിങ് (കെഎ ബിസ്‌നെസ്റ്റ്- KA BIZNEST) പദ്ധതി മലപ്പുറത്തും. കുടുംബശ്രീ കാര്‍ഷിക വിഭാഗത്തിന്റെ നേതൃത്വത്തില്‍ ഓരോ ജില്ലയിലെയും കോളേജുകളുമായി സഹകരിച്ച് നടത്തുന്ന ഈ കൂട്ടായ്മ മലപ്പുറം ജില്ലയില്‍ കുറ്റിപ്പുറം എം.ഇ.എസ് എഞ്ചിനീയറിങ് കോളേജില്‍ സംഘടിപ്പിച്ചു. സംരംഭക മീറ്റും ഉത്പന്ന പ്രദര്‍ശന വിപണന മേളയും ഉള്‍പ്പെടുന്ന ബിസ്‌നെസ്റ്റിന്റെ ഉദ്ഘാടനം കായിക, വഖഫ്, ഹജ്ജ്, ന്യൂനപക്ഷക്ഷേമ വകുപ്പ് മന്ത്രി ശ്രീ. വി. അബ്ദുറഹിമാന്‍ നിർവഹിച്ചു.

ജില്ലയിലെ ഏറ്റവും മികച്ച 32 കുടുംബശ്രീ സംരംഭകരുടെ വിവിധതരത്തിലുള്ള കാര്‍ഷിക മൂല്യ വര്‍ദ്ധിത ഉല്‍പ്പന്നങ്ങളുടെ പ്രദര്‍ ശനം, വിപണനം എന്നിവയ്ക്കൊപ്പം സംരംഭ വികസന സെമിനാറും ബിസ്‌നെസ്റ്റിന്റെ ഭാഗമായി സംഘടിപ്പിച്ചു. കൂടാതെ സ്റ്റാര്‍ട്ടപ്പ് സാധ്യതകള്‍, സാമ്പത്തിക ആനുകൂല്യങ്ങള്‍ എന്നിവയെക്കുറിച്ച് കുടുംബശ്രീ സംരംഭകര്‍ക്കും കോളേജ് വിദ്യാര്‍ഥികള്‍ക്കും കേരള സ്റ്റാര്‍ട്ടപ്പ് മിഷന്‍ സീനിയര്‍ ടെക്‌നോളജി ഫെല്ലോ റോണി കെ.റോയ് ക്ലാസ് നയിച്ചു. സംരംഭകര്‍ക്ക് അവരുടെ സംരംഭക യാത്രയിലെ അനുഭവങ്ങളും, പാഠങ്ങളും പങ്കുവെക്കാനുള്ള വേദിയും പരിപാടിയിലൊരുക്കിയിരുന്നു.

ഉദ്ഘാടന ചടങ്ങില്‍ കുറ്റിപ്പുറം എം.ഇ.എസ് എഞ്ചിനീയറിങ് കോളേജ് പ്രിന്‍സിപ്പല്‍ ഡോ. റഹ്‌മത്തുന്‍സാ. ഐ അധ്യക്ഷത വഹിച്ചു. കുടുംബശ്രീ എക്‌സിക്യൂട്ടീവ് ഡയറക്ടര്‍ എച്ച്. ദിനേശന്‍ ഐ.എ.എസ് മുഖ്യാതിഥിയായി. കുടുംബശ്രീ പ്രോഗ്രാം ഓഫീസര്‍ ഡോ. എസ്. ഷാനവാസ്, സ്റ്റേറ്റ് അസിസ്റ്റന്റ് പ്രോഗ്രാം മാനേജർ രമ്യ രാജപ്പൻ, കുടുംബശ്രീ മലപ്പുറം അസിസ്റ്റന്റ് ജില്ലാ മിഷന്‍ കോര്‍ഡിനേറ്റര്‍മാരായ രഗീഷ്.ആര്‍, പ്രസാദ് ടി.വി, സി.ഡി.എസ് ചെയര്‍പേഴ്‌സണ്‍മാര്‍, കോളേജ് വിദ്യാര്‍ഥികള്‍ തുടങ്ങിയവര്‍ പരിപാടിയില്‍ പങ്കെടുത്തു. മലപ്പുറം കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ സുരേഷ് കുമാര്‍.ബി സ്വാഗതവും ജില്ലാ പ്രോഗ്രാം മാനേജര്‍ മന്‍ഷൂബ പി.എം നന്ദിയും പറഞ്ഞു. കോട്ടയം, എറണാകുളം എന്നീ ജില്ലകളിലും അഗ്രി ബിസ്നെസ്റ്റ് പ്രവര്‍ത്തനങ്ങള്‍ അതാത് ജില്ലകളിലെ കോളേജുകളുമായി സഹകരിച്ച് കുടുംബശ്രീ സംഘടിപ്പിച്ചിരുന്നു.

കാസര്‍കോട് ജില്ലാ പഞ്ചായത്തിന്റെ സഹകരണത്തോടെ കാസര്‍ഗോഡ് കുടുംബശ്രീ ജില്ലാ മിഷന്‍ നടപ്പിലാക്കുന്ന ‘ബാക്ക് ടു ഫാമിലി 2025′ അയല്‍ക്കൂട്ടങ്ങളിലൂടെ കുടുംബങ്ങളിലേക്ക്’ ക്യാമ്പയിന് ജില്ലയില്‍ തുടക്കമായി. സ്ത്രീ ശാക്തീകരണം, സുരക്ഷിത ബാല്യം, മികവാര്‍ന്ന രക്ഷാകര്‍തൃത്വം, കുടുംബാരോഗ്യം, കുട്ടിയും അവകാശവും എന്നീ ലക്ഷ്യങ്ങള്‍ മുന്‍നിര്‍ത്തി പൗരബോധമുള്ള സമൂഹത്തെ വാര്‍ത്തെടുക്കുന്നതും കുട്ടികളുടെയും കുടുംബങ്ങളുടെയും ആരോഗ്യത്തെ മികച്ച രക്ഷാകര്‍തൃത്വത്തിലൂടെ പരിപോഷിപ്പിക്കുന്നതും സ്ത്രീ ശാക്തീകരണത്തിലൂന്നിയ ശേഷിയിലേക്ക് കുടുംബങ്ങളെ നയിക്കുന്നതും ആരോഗ്യ സാക്ഷരതയുള്ള കുടുംബം എന്ന നേട്ടം കൈവരിക്കുന്നതുമാണ് ഇതിലൂടെ ലക്ഷ്യമിട്ടിരിക്കുന്നത്.

ബാക് ടു ഫാമിലിയുടെ ജില്ലാതല ഉദ്ഘാടനം മടിക്കൈ ഗവ വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ സംഗീതനാടക അക്കാദമി വൈസ് ചെയര്‍പേഴ്‌സണ്‍ പുഷ്പവതി നിര്‍വഹിച്ചു. ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണന്‍ അധ്യക്ഷത വഹിച്ച ചടങ്ങില്‍ എഴുത്തുകാരന്‍ സുറാബ് മുഖ്യാതിഥിയായി. ഉദ്ഘാടന ചടങ്ങില്‍ കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ രതീഷ് പിലിക്കോട് പദ്ധതി വിശദീകരണം നടത്തി.

ഒക്ടോബര്‍ 30ന് ഔദ്യോഗികമായി സമാപിക്കുന്ന ക്യാമ്പയിന്റെ ഭാഗമായി വിവിധ ഗ്രാമ പഞ്ചായത്തുകളില്‍ നിന്നും തെരഞ്ഞെടുത്ത രണ്ട് വീതം ജനപ്രതിനിധികളെ റിസോഴ്‌സ് പേഴ്‌സ്സണ്‍മാരായി പങ്കെടുപ്പിച്ച് ബാക് ടു ഫാമിലി പരിശീലനങ്ങള്‍ നല്‍കിവരികയാണ്. വരുന്ന അവധി ദിവസങ്ങളില്‍ ജില്ലയിലെ മുഴുവന്‍ അയല്‍ക്കൂട്ടാംഗങ്ങള്‍ക്കും ഇവര്‍ മുഖേന പരിശീലനങ്ങള്‍ നല്‍കുകയും ഈ പരിശീലനം സിദ്ധിച്ച അയല്‍ക്കൂട്ടാംഗങ്ങളിലൂടെ ജില്ലയിലെ 1,88,900 അയല്‍ക്കൂട്ട കുടുംബങ്ങളിലേക്ക് ബാക്ക് ടു ഫാമിലി ലക്ഷ്യങ്ങള്‍ എത്തിക്കുകയും ചെയ്യും. ഓരോ കുടുംബത്തിന്റെയും ആര്‍ജ്ജിച്ചെടുക്കേണ്ട ആരോഗ്യ അറിവും, പരിരക്ഷയും സംബന്ധിച്ച അയല്‍ക്കൂട്ടതല പ്ലാനുകള്‍ തയ്യാറാക്കി കൂട്ടായി നേടിയെടുക്കുന്നതിനുള്ള ശ്രമങ്ങളും നടത്തും.

ഉദ്ഘാടന ചടങ്ങില്‍ ജനപ്രതിനിധികള്‍, സാമൂഹ്യ സാംസ്‌ക്കാരിക രംഗത്തെ പ്രമുഖര്‍, കുടുംബശ്രീ ജില്ലാ മിഷന്‍ ജീവനക്കാര്‍ എന്നിവര്‍ പങ്കെടുത്തു.

കുടുംബശ്രീ അട്ടപ്പാടി ആദിവാസി സമഗ്ര വികസന പദ്ധതിയുടെ ഭാഗമായി അട്ടപ്പാടിയുടെ സാമൂഹിക, സാംസ്‌ക്കാരിക പശ്ചാത്തലത്തില്‍ തദ്ദേശീയ മേഖലകളിലെ വിദ്യാഭ്യാസം, സ്ത്രീ സുരക്ഷ, ബാലാവകാശം, ലഹരി എന്നീ വിഷയങ്ങളെ അടിസ്ഥാനമാക്കി നിര്‍മ്മിച്ച ഹ്രസ്വ ചിത്രം തള്ത്ത തളിറ്-ന്റെ പോസ്റ്റര്‍ പ്രകാശനം തദ്ദേശ സ്വയംഭരണ, എക്‌സൈസ്, പാര്‍ലമെന്ററികാര്യ വകുപ്പ് മന്ത്രി ശ്രീ. എം.ബി. രാജേഷ് നിര്‍വഹിച്ചു. പാലക്കാട് ഇന്ന് സംഘടിപ്പിച്ച തദ്ദേശ സ്വയംഭരണ വകുപ്പിന്റെ വിഷന്‍ 2031 സെമിനാറിലായിരുന്നു പോസ്റ്റര്‍ പ്രകാശനം.

തദ്ദേശീയ മേഖലയിലെ കുട്ടികള്‍ക്കായി കുടുംബശ്രീ സംഘടിപ്പിച്ച കനസ് ജാഗ ഫിലിം ഫെസ്റ്റിവലിനായി തയാറാക്കിയ ഹ്രസ്വ ചലച്ചിത്രങ്ങളില്‍ കഥ,അഭിനയം,സംവിധാനം എന്നിവ നിര്‍വഹിച്ച കുട്ടികളും അട്ടപ്പാടിയിലെ അയൽക്കൂട്ട അംഗങ്ങളും ഈ ചിത്രത്തിന്റെ ഭാഗമായി. കനസ് ജാഗ റിസോഴ്‌സ് പേഴ്‌സണും അട്ടപ്പാടി സ്‌പെഷ്യല്‍ പ്രോജക്ട് യൂത്ത് കോര്‍ഡിനേറ്ററുമായ സുരേഷ് ശ്രീ എറിക് ആണ് തള്ത്ത തളിറ്-ന്റെ കഥ എഴുതി സംവിധാനം ചെയ്തിട്ടുള്ളത്. സിനിമ അടുത്ത മാസം റിലീസ് ചെയ്യും.

  ചടങ്ങില്‍ കുടുംബശ്രീ എക്‌സിക്യൂട്ടീവ് ഡയറക്ടര്‍ എച്ച്. ദിനേശന്‍ ഐ.എ.എസ്, പ്രോഗ്രാം ഓഫീസര്‍ ഡോ. ബി. ശ്രീജിത്ത്, അട്ടപ്പാടി ആദിവാസി സമഗ്ര വികസന പദ്ധതി അസിസ്റ്റന്റ് പ്രോജക്ട് ഓഫീസര്‍ ബി.എസ്. മനോജ്, കുടുംബശ്രീ സ്റ്റേറ്റ് പ്രോഗ്രാം മാനേജര്‍ ജസ്റ്റിന്‍ മാത്യു, അസിസ്റ്റന്റ് പ്രോഗ്രാം മാനേജര്‍ ജിഷ്ണു ഗോപൻ, അട്ടപ്പാടി ആദിവാസി സമഗ്ര വികസന പദ്ധതി പ്രോജക്ട് കോര്‍ഡിനേറ്റര്‍ ജോമോന്‍ കെ.ജെ എന്നിവര്‍ പങ്കെടുത്തു. അട്ടപ്പാടി ആദിവാസി സമഗ്ര വികസന പദ്ധതി ഉദ്യോഗസ്ഥര്‍, കുടുംബശ്രീ അഗളി, ഷോളയൂര്‍, പുതൂര്‍, കുറുമ്പ പഞ്ചായത്ത് സമിതികള്‍ എന്നിവര്‍ ചിത്ര നിര്‍മ്മാണത്തിന് നേതൃത്വം നല്‍കി.

പാട്ടുംനൃത്തവും താളമേളവും അകമ്പടിയാക്കി ആഘോഷമായൊരു ഞാറുനടീല്‍. കുട്ടികളും മുതിര്‍ന്നവരും നാടും നാട്ടുകാരും എല്ലാം ഒന്നിക്കുന്ന ആഘോഷം. അതാണ് കുടുംബശ്രീ കണ്ണൂര്‍ ജില്ലാ മിഷന്‍ സി.ഡി.എസ് തലത്തില്‍ നടത്തിവരുന്ന 'മഴപ്പൊലിമ' കാര്‍ഷിക പുനരാവിഷ്‌ക്കരണ ക്യാമ്പയിന്‍.

നിര്‍ത്താതെ പെയ്യുന്ന മഴയോടൊപ്പം പാടത്തെ ചേറിലേക്കിറങ്ങി ഞാറു നടാനും പാട്ടുപാടാനും നൃത്തം ചവിട്ടാനും കുട്ടികളും മുതിര്‍ന്നവരും ഒരുപോലെ മുന്നോട്ടുവരുന്നു. ഇതോടൊപ്പം കലാ, കായിക മത്സരങ്ങളും ഭക്ഷ്യമേളകളും മഴപ്പൊലിമയ്ക്ക് മിഴിവേകുന്നു.

തരിശ് ഭൂമി കൃഷിയോഗ്യമാക്കുക, ഭക്ഷ്യ സുരക്ഷ ഉറപ്പുവരുത്തുക, യുവതലമുറ ഉള്‍പ്പെടെയുള്ള ജനങ്ങളെ കൃഷിയിലേക്ക് ആകര്‍ഷിക്കുക, കാര്‍ഷിക സംസ്‌കൃതി വീണ്ടെടുക്കുക എന്നീ ലക്ഷ്യങ്ങളോടെയാണ് ജില്ലാ മിഷന്‍ മഴപ്പൊലിമ സംഘടിപ്പിച്ചിരിക്കുന്നത്.

ജൂണ്‍ 20ന് ആരംഭിച്ച ക്യാമ്പയിന്‍ ഇത്തവണ ജില്ലയിലെ 30 സി.ഡി.എസുകളിലാണ് നടത്തുക. ഇതുവരെ പായം, ധര്‍മ്മടം, മങ്ങാട്ടിടം, ചെറുകുന്ന് സി.ഡി.എസുകളില്‍ മഴപ്പൊലിമ ആഘോഷിച്ചു കഴിഞ്ഞു. ഇത് തുടര്‍ച്ചയായ രണ്ടാം വര്‍ഷമാണ് കണ്ണൂര്‍ ജില്ലയില്‍ മഴപ്പൊലിമ നടത്തുന്നത്. ആദ്യവര്‍ഷത്തില്‍ 125 എക്കര്‍ തരിശുഭൂമിയില്‍ കൃഷി ഇറക്കിയിരുന്നു.

കറുത്ത പൊന്ന് എന്ന പേരിലറിയപ്പെടുന്ന സുഗന്ധവ്യജ്ഞനങ്ങളിലെ രാജാവാണ് കുരുമുളക്. പാചകത്തിനും ആരോഗ്യസംരക്ഷണത്തിനുമെല്ലാം വ്യാപകമായി ഉപയോഗിക്കുന്ന കുരുമുളകിന്റെ വിലവര്‍ദ്ധനവിന് പരിഹാരം കാണാന്‍ കുടുംബശ്രീ കണ്ണൂര്‍ ജില്ലാ മിഷന്‍ ഒരു വ്യത്യസ്ത പദ്ധതിക്ക് തുടക്കമിട്ടിരിക്കുകയാണ്. ഒരു വീട്ടില്‍ ഒരു കുരുമുളക് തൈ എന്ന ഈ പദ്ധതി മുഖേന ജില്ലയിലെ അയല്‍ക്കൂട്ടാംഗങ്ങളുടെ അടുക്കളത്തോട്ടങ്ങളില്‍ ഒരു കുറ്റി കുരുമുളക് എങ്കിലും കൃഷി ചെയ്യുമെന്ന് ഉറപ്പു വരുത്തും.

ലോക പരിസ്ഥിതിദിനമായ ജൂണ്‍ അഞ്ചിനോട് അനുബന്ധിച്ചാണ് പദ്ധതിക്ക് തുടക്കമിട്ടത്. ജൂലൈ അഞ്ച് വരെ ജില്ലയിലെ 81 സി.ഡി.എസുകളിലെയും അയല്‍ക്കൂട്ടങ്ങള്‍, കൂട്ടുത്തരവാദിത്ത കൃഷി സംഘങ്ങള്‍, ഐ.എഫ്.സി (ഇന്റഗ്രേറ്റഡ് ഫാമിങ് ക്ലസ്റ്റര്‍) എന്നിവ മുഖേന അയല്‍ക്കൂട്ടാംഗങ്ങളിലേക്ക് കുരുമുളക് തൈകള്‍ എത്തിക്കും.

ജില്ലയിലെ കുടുംബശ്രീ ജൈവിക നേഴ്‌സറികളിൽ നിന്നുമുള്ള ഹൈബ്രിഡ് കുറ്റി കുരുമുളക് തൈകളാണ് വിതരണം ചെയ്യുന്നത്. ആദ്യഘട്ടത്തില്‍ മൂന്ന് ലക്ഷത്തോളം തൈകള്‍ വിതരണം ചെയ്യുകയും അയല്‍ക്കൂട്ടാംഗങ്ങളുടെ വീടുകളില്‍ ഇവ നടുകയും ചെയ്യും.

പദ്ധതിയുടെ ഉദ്ഘാടനം ജൂണ്‍ അഞ്ചിന് കടന്നപ്പള്ളി-പാണപ്പുഴ പഞ്ചായത്ത് സി.ഡി.എസിലെ പറവൂര്‍ കുണ്ടയാട് അംഗനവാടിയില്‍ പഞ്ചായത്ത് പ്രസിഡന്റ് ടി. സുലജ നിര്‍വഹിച്ചു. കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ എം.വി. ജയന്‍, പഞ്ചായത്ത് വൈസ് പ്രസിഡന്റ് കെ. മോഹനന്‍, സി.ഡി.എസ് ചെയര്‍പേഴ്‌സണ്‍ കെ.ജി. ബിന്ദു, ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ ടി.വി സുധാകരന്‍, ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എന്‍. കാര്‍ത്യായനി, മെമ്പര്‍ സെക്രട്ടറി എം.വി. പവിത്രന്‍, ബ്ലോക്ക് കോര്‍ഡിനേറ്റര്‍ പി.വി. സ്വപ്ന എന്നിവര്‍ പങ്കെടുത്തു. കുടുംബശ്രീ ജില്ലാ പ്രോഗ്രാം മാനേജര്‍ സൈജു പത്മനാഭന്‍ പദ്ധതി വിശദീകരണം നടത്തി.