പൊതുജനങ്ങള്‍ക്ക് എല്ലാവിധ നൂതന സൗകര്യങ്ങളും ലഭ്യമാക്കുന്ന കുടുംബശ്രീയുടെ പ്രീമിയം റെസ്റ്റോറന്റ് ശൃംഖലയുടെ ഭാഗമായി കൊല്ലം ജില്ലയും. കഫേ കുടുംബശ്രീ പ്രീമിയം റെസ്റ്റോറന്റിന്റെ ഔദ്യോഗിക ഉദ്ഘാടനം ഇന്നലെ ധനകാര്യവകുപ്പ് മന്ത്രി ശ്രീ. കെ.എന്‍. ബാലഗോപാല്‍ കൊല്ലം പന്മന ഗ്രാമപഞ്ചായത്തിലെ വെറ്റമുക്ക് ജംക്ഷനില്‍ നിര്‍വഹിച്ചു. കുടുംബശ്രീ തുടക്കമിടുന്ന പതിനൊന്നാം പ്രീമിയം റെസ്റ്റോറന്റാണിത്. തിരുവനന്തപുരം, പത്തനംതിട്ട, കോട്ടയം, എറണാകുളം, തൃശ്ശൂര്‍, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളില്‍ നിലവില്‍ കഫേ കുടുംബശ്രീ പ്രീമിയം റെസ്റ്റോറന്റ് പ്രവര്‍ത്തിക്കുന്നുണ്ട്.
കൊല്ലത്തിന്റെ പ്രാദേശിക സ്വാദിന് പ്രാധാന്യം നല്‍കുന്ന വിഭവങ്ങളാണ് കൊല്ലം പ്രീമിയം റെസ്റ്റോറന്റിന്റെ പ്രത്യേകത. അഷ്ടമുടി പ്രാച്ചിക്കറി, കണമ്പ് മപ്പാസ്, കല്ലുമ്മക്കായ മപ്പാസ്, അഷ്ടമുടി കരിമീന്‍ പൊള്ളിച്ചത്, ചിപ്പി റോസ്റ്റ്, കണവ 23, ചെമ്മീന്‍ മല്‍ഹാര്‍, നാലു തരം മീനും കൊഞ്ചും ഞണ്ടും ഉള്‍പ്പെടുന്ന സ്‌പെഷ്യല്‍ ദേശിംഗനാട് മീന്‍ സദ്യ എന്നിവ ഇവിടെ ലഭിക്കും. കൂടാതെ വെജ് ഊണ്, മീന്‍ കറിയോടുകൂടിയ ഊണ്, സദ്യ, ബിരിയാണി, അറേബ്യന്‍, ചൈനീസ് വിഭവങ്ങളുമുണ്ട്. 82 പേര്‍ക്ക് ഒരേസമയം ഭക്ഷണം കഴിക്കാനുള്ള സൗകര്യമുണ്ട്. കൂടാതെ ഫീഡിങ് റൂം മികച്ച ശുചിമുറി, പാര്‍ക്കിങ് എന്നിവയുമുണ്ട്.
പന്മന പഞ്ചായത്തിലെ ഇന്‍സൈറ്റ് ആക്ടിവിറ്റി ഗ്രൂപ്പാണ് കഫേയുടെ പ്രവര്‍ത്തനം നടത്തുന്നത്. ചവറ, തേവലക്കര, പന്മന ഗ്രാമപഞ്ചായത്തുകളിലെ അയല്‍ക്കൂട്ട കുടുംബാംഗങ്ങളായ 38 പേര്‍ക്ക് റെസ്റ്റോറന്റ് വഴി ഉപജീവന അവസരമൊരുങ്ങുന്നു.
ഉദ്ഘാടന ചടങ്ങില്‍ ചവറ നിയോജക മണ്ഡലം എം.എല്‍.എ ഡോ. സുജിത് വിജയന്‍പിള്ള അധ്യക്ഷനായി. ജില്ലാ പഞ്ചായത്ത് പ്രസിഡന്റ് ഡോ. പി.കെ. ഗോപന്‍, മത്സ്യഫെഡ് ചെയര്‍മാന്‍ ടി. മനോഹരന്‍ എന്നിവര്‍ വിശിഷ്ട സാന്നിധ്യമായി. ചവറ ബ്ലോക്ക് പഞ്ചായത്ത് പ്രസിഡന്റ് സന്തോഷ് തുപ്പാശ്ശേരി, പന്മന ഗ്രാമപഞ്ചായത്ത് പ്രസിഡന്റ് ശ്രീകല. പി, കൊല്ലം ജില്ലാ പഞ്ചായത്ത് മെമ്പര്‍മാരായ അഡ്വ. സി.പി. സുധീഷ് കുമാര്‍, എസ്. സോമന്‍, ചവറ ബ്ലോക്ക് പഞ്ചായത്ത് മെമ്പര്‍ സീനത്ത്, പന്മന ഗ്രാമപഞ്ചായത്ത് മെമ്പര്‍ രാജീവ് കുഞ്ഞുമണി എന്നിവര്‍ സംസാരിച്ചു.
കുടുംബശ്രീ പബ്ലിക് റിലേഷന്‍സ് ഓഫീസര്‍ ഡോ. അഞ്ചല്‍ കൃഷ്ണകുമാര്‍, പന്മന സി.ഡി.എസ് അധ്യക്ഷ രമ്യ സുനിത്, കുടുംബശ്രീ അസിസ്റ്റന്റ് ജില്ലാ മിഷന്‍ കോര്‍ഡിനേറ്റര്‍മാരായ അനീസ. എ, രതീഷ്. ആര്‍, ജില്ലാ പ്രോഗ്രാം മാനേജര്‍ വിഷ്ണു പ്രസാദ് തുടങ്ങിയവരും സന്നിഹിതരായിരുന്നു. കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ വിമല്‍ചന്ദ്രന്‍. ആര്‍ സ്വാഗതവും അസിസ്റ്റന്റ് ജില്ലാ മിഷന്‍ കോര്‍ഡിനേറ്റര്‍ ഉന്‍മേഷ്. ബി നന്ദിയും പറഞ്ഞു.
- 14 views
Content highlight
Cafe Kudumbashree Premium Restaurant opened in Kollam