അന്താരാഷ്ട്ര വനിതാ ദിനാഘോഷത്തോടനുബന്ധിച്ച് കുടുംബശ്രീയുടെ ആഭിമുഖ്യത്തിൽ 'വിമൻ എംപവർമെന്റ് കോൺഗ്രസ്-2026"- അന്താരാഷ്ട്ര സെമിനാർ സംഘടിപ്പിച്ചു. "ലിംഗപദവിയും വികസനവും; നയം, പ്രായോഗികത, കമ്മ്യൂണിറ്റി പരിവർത്തനം' എന്ന വിഷയത്തിൽ സംഘടിപ്പിച്ച പ്ളീനറി സെഷൻ കരുത്തുറ്റ ആശയങ്ങളും സംവാദങ്ങളും കൊണ്ട് സമ്പന്നമായി.
സാമൂഹ്യമൂലധനമായ കുടുംബശ്രീയിലൂടെ സ്ത്രീകൾ സാമ്പത്തിക സ്വയംപര്യാപ്തതയും നേതൃശേഷിയും നൈപുണ്യ വികസനവും രാഷ്ട്രീയ ഇച്ഛാശക്തിയും ഉൾപ്പെടെ സമഗ്രവികസനം കൈവരിച്ചതായി പ്ളീനറി സെഷനിൽ പങ്കെടുത്തവർ അഭിപ്രായപ്പെട്ടു. കുടുംബശ്രീയുടെ ഭാവിപ്രവർത്തനങ്ങൾക്ക് കരുത്തേകുന്ന വിധം ലിംഗതുല്യതയ്ക്കും സ്ത്രീശാക്തീകരണത്തിനും പ്രാധാന്യം നൽകുന്ന പുതിയ കാഴ്ചപ്പാടുകൾ അവതരിപ്പിക്കുന്നതിനും സെഷൻ വേദിയൊരുക്കി. കേരളത്തിൽ ലിംഗപദവി കേന്ദ്രീകൃതമായ വികസനത്തിൽ കുടുംബശ്രീ വഹിച്ച പങ്ക് എന്ന വിഷയത്തെ അടിസ്ഥാനമാക്കി ചർച്ചയും വേറിട്ട അനുഭവമായി.
തുടർന്ന് "ലിംഗനീതി സംരക്ഷണത്തിനായി കുടുംബശ്രീയുടെ ഇടപെടലുകൾ', "ഉപജീവന സാമ്പത്തിക ഉൾച്ചേർക്കലുകളിൽ ലിംഗ സംയോജനം', "സ്ഥാപന വികസനവും കാര്യശേഷി വികസനവും', "ലിംഗപദവിയും സുസ്ഥിരതും', "കുടുംബശ്രീയും സാങ്കേതികതയും' തുടങ്ങിയ വിഷയങ്ങളിൽ തെരഞ്ഞെടുത്ത 72 പ്രബന്ധങ്ങളുടെ അവതരണവും നടന്നു. കൂടാതെ കുടുംബശ്രീ മുഖേന സംസ്ഥാനത്ത് നടപ്പാക്കുന്ന വിവിധ പദ്ധതികൾ സംബന്ധിച്ച് സംസ്ഥാന മിഷൻ ഉദ്യോഗസ്ഥരും പ്രബന്ധങ്ങൾ അവതരിപ്പിച്ചു.
മരിയൻ കോളേജ് പ്രിൻസിപ്പൽ പ്രൊഫ. അജിമോൻ ജോർജ്ജ് പ്ളീനറി സെഷൻ ഉദ്ഘാടനം ചെയ്തു. ഡയറ്റ് സീനിയർ ലക്ചറർ ഡോ. ബി ശ്രീജിത്ത് മോഡറേറ്റ്റായി. സ്റ്റേറ്റ് ജെൻഡർ കൺസൾട്ടന്റ് ഡോ.ടി.കെ ആനന്ദി, യു.എസിലെ സ്റ്റോറി ബി കമ്പനിയുടെ പ്രിൻസിപ്പൽ കൺസൾട്ടന്റ് അമാൻഡ ആറോൻസൺ, കൊളംബോ സർവകലാശാലയിലെ മെഡിസിൻ ഫാക്കൽറ്റി ടി.കെ രസിക സമൻമാലെ, നേപ്പാൾ കാദംബരി മെമ്മോറിയൽ കോളേജ് പ്രിൻസിപ്പൽ പ്രദിപ്ത, ഉദ്ധ്യം ലേണിങ്ങ് ഫൗണ്ടേഷൻ സീനിയർ മാനേജർ, ജെൻഡർ ആക്ടിവിസ്റ്റ് ഡോ.ശ്രീസൂര്യ തിരുവോത്ത് എന്നിവർ പാനലിസ്റ്റുകളായി. മരിയൻ കോളേജ് വൈസ് പ്രിൻസിപ്പൽ ഡോ.ജോബി സിറിയക് സി, കുടുംബശ്രീ പ്രോഗ്രാം ഒാഫീസർ പ്രദീപ് കുമാർ പി.എസ് എന്നിവർ ആശംസിച്ചു. കുടുംബശ്രീ സ്റ്റേറ്റ് അസിസ്റ്റന്റ് പ്രോഗ്രാം മാനേജർ ശാരിക എസ് നന്ദി പറഞ്ഞു.
- 6 views