പട്ടികവര്‍ഗ മേഖലയിലെ വിവിധ സി.ഡി.എസുകളില്‍ 50 ശതമാനം പിന്നാക്കം നില്‍ക്കുന്നതും താരതമ്യേന ദുര്‍ബലവുമായ അയല്‍ക്കൂട്ടങ്ങളെയാണ് സ്വയംപര്യാപ്തത കൈവരിക്കുന്നതിനായി കുടുംബശ്രീ തിരഞ്ഞെടുത്തത്. അയല്‍ക്കൂട്ട പ്രവര്‍ത്തനങ്ങള്‍ ശക്തമാക്കുന്നതിന്‍റെ ഭാഗമായി ഓരോ അയല്‍ക്കൂട്ടത്തിനും 15,000 രൂപ കോര്‍പ്പസ് ഫണ്ട്, റിവോള്‍വിങ്ങ് ഫണ്ട് ഇനത്തില്‍ 15,000 എന്നിങ്ങനെ വിവിധ സാമ്പത്തിക പിന്തുണകളും ലഭ്യമാക്കിയിരുന്നു. കൂടാതെ ഉപജീവന സംരംഭങ്ങള്‍ ആരംഭിക്കുന്നതിനുള്ള ബിസിനസ് പ്ളാന്‍ തയ്യാറാക്കുന്നതിനുള്ള പരിശീലനവും അയല്‍ക്കൂട്ട അംഗങ്ങള്‍ക്ക് ലഭ്യമാക്കി. കഴിഞ്ഞ ഒമ്പത് വര്‍ഷങ്ങളിലായി ഈ മേഖലയില്‍ 3127 കര്‍ഷക സംഘങ്ങള്‍ രൂപീകരിച്ചു. 11442 അംഗങ്ങള്‍ക്ക് മൃഗസംരക്ഷണ മേഖലയുമായി ബന്ധപ്പെട്ട ഉപജീവന പ്രവര്‍ത്തനങ്ങളില്‍ സഹായവും ലഭ്യമാക്കി. കൂടാതെ 1196 സംരംഭങ്ങളും ആരംഭിച്ചു.
അയല്‍ക്കൂട്ട പ്രവര്‍ത്തനങ്ങളുമായി ബന്ധപ്പെട്ട കണക്കെഴുത്ത്, വിവിധ വകുപ്പുകള്‍ നല്‍കുന്ന ആനുകൂല്യങ്ങള്‍, കുടുംബശ്രീ മുഖേന നടപ്പാക്കുന്ന വിവിധ ഉപജീവന പദ്ധതികള്‍, കുടുംബശ്രീ വഴി ലഭ്യമാകുന്ന ആനുകൂല്യങ്ങള്‍, തൊഴില്‍ നൈപുണ്യ പരിശീലനങ്ങള്‍, സേവനങ്ങള്‍ എന്നിവ സംബന്ധിച്ചും തിരഞ്ഞെടുത്ത അയല്‍ക്കൂട്ടങ്ങളിലെ അംഗങ്ങള്‍ക്ക് കുടുംബശ്രീയുടെ നേതൃത്വത്തില്‍ പ്രത്യേക പരിശീലനം നല്‍കിയിട്ടുണ്ട്.
അയല്‍ക്കൂട്ടങ്ങളുടെ പ്രവര്‍ത്തന നിലവാരം ഉയര്‍ത്തുന്നതിന്‍റെ ഭാഗമായി ഗ്രേഡിങ്ങും ഓഡിറ്റിങ്ങും നടത്തിയതാണ് മറ്റൊരു നേട്ടം. കൂടാതെ ബാങ്ക് ഇടപാടുകള്‍, കാര്യക്ഷമമായ ധനവിനിയോഗം, ലിങ്കേജ് വായ്പാ ലഭ്യത എന്നിവ ഉള്‍പ്പെടെ സാമ്പത്തിക സാക്ഷരതയും അയല്‍ക്കൂട്ടങ്ങള്‍ക്ക് ലഭ്യമാക്കി. സ്വയംപര്യാപ്ത അയല്‍ക്കൂട്ടങ്ങളുടെ ആഴ്ച നിക്ഷേപം, ബാങ്ക് ലിങ്കേജ് വായ്പാ തിരിച്ചടവ് തുടങ്ങി എല്ലാ പ്രവര്‍ത്തനങ്ങളും കൃത്യമായി വിലയിരുത്തുന്നതും കുടുംബശ്രീ മാനേജ്മെന്‍റ് ഇന്‍ഫര്‍മേഷന്‍ സിസ്റ്റത്തില്‍ രേഖപ്പെടുത്തുകയും ചെയ്യുന്നതിന്‍റെ ചുമതലയും ഈ മേഖലയില്‍ നിന്നുള്ള അനിമേറ്റര്‍മാരാണ്.
- 12 views