ഫീച്ചറുകള്‍

തദ്ദേശീയ വിദ്യാർത്ഥികൾ ചിത്രം വരച്ചു, ടാലൻ്റ് ലോക റെക്കോഡ് നേട്ടം കൊയ്ത് കുടുംബശ്രീ

തദ്ദേശീയരായ വിദ്യാർത്ഥികൾ തയാറാക്കിയ ഏറ്റവും വലിയ ക്യാൻവാസ് ചിത്രം എന്ന ലോക റെക്കോർഡ് അട്ടപ്പാടി ബ്ലോക്കിലെ ട്രൈബൽ വിദ്യാർത്ഥികൾ സ്വന്തമാക്കി. 186 വിദ്യാർത്ഥികൾ ചേർന്ന് 720 അടി നീളത്തിലുള്ള ക്യാൻവാസിലാണ് രണ്ടേകാൽ മണിക്കൂർ കൊണ്ട് ചിത്രം വരച്ചത്.

മഹാരാഷ്ട്ര ആസ്ഥാനമായുള്ള ടാലൻ്റ് റെക്കോർഡ് ബുക്കിൻ്റെ ലോക റെക്കോഡാണ് ലഭിച്ചത്. ആസ്പിരേഷണൽ ബ്ലോക്ക് പ്രോഗ്രാമിന്റെ ഭാഗമായി അട്ടപ്പാടി ബ്ലോക്ക് പഞ്ചായത്തിനൊപ്പം ചേർന്ന് കുടുംബശ്രീ അട്ടപ്പാടി ആദിവാസി സമഗ്ര വികസന പദ്ധതിയാണ് ഈ പ്രവർത്തനം ഏറ്റെടുത്തു നടത്തിയത്.

അഗളി ഇ.എം.എസ് ടൗൺ ഹാളിൽ ഇന്ന് ഉച്ച കഴിഞ്ഞ് 1.45 ന് ആരംഭിച്ച പെയിന്റിംഗ് വൈകീട്ട് 4 മണിയോട് കൂടി സമാപിച്ചു. പരിപാടി ബ്ലോക്ക് പഞ്ചായത്ത് പ്രസിഡണ്ടും കുടുംബശ്രീ ഗവേണിംഗ് ബോഡി അംഗവുമായ മരുതി മുരുകൻ ഉദ്ഘാടനം ചെയ്തു. അട്ടപ്പാടി നോഡൽ ഓഫീസറും ഒറ്റപ്പാലം സബ് കളക്ടറുമാ ധർമലശ്രീ ഐ.എ.എസ് മുഖ്യാഥിതി ആയി.

ടാലൻ്റ് റെക്കോർഡ് ബുക്ക് പ്രതിനിധി ഗിന്നസ് സത്താർ ആദൂറിൽ നിന്നും വേൾഡ് റെക്കോർഡ് സർട്ടിഫിക്കറ്റും മെഡലും പഞ്ചായത്ത്, കുടുംബശ്രീ പ്രതിനിധികൾ ചേർന്ന് ഏറ്റുവാങ്ങി.

Content highlight

world record for kudumbashree

ടെക്കികള്‍ക്കിടയില്‍ ഹിറ്റായി തിരുവനന്തപുരത്തിന്റെ 'ഇതള്‍' പ്രൊഡക്ട് ഫെയര്

കുടുംബശ്രീ തിരുവനന്തപുരം ജില്ലാ മിഷന് കീഴിലുള്ള ബഡ്‌സ് സ്ഥാപനങ്ങളിലെ പരിശീലനാര്‍ത്ഥികളും അവരുടെ രക്ഷിതാക്കളും തയാറാക്കുന്ന നോട്ട്ബുക്കും പേനയും ഫയല്‍ ഫോള്‍ഡറും ഉള്‍പ്പെടെയുള്ള ഉത്പന്നങ്ങള്‍ക്ക് വിപണനാവസരമൊരുക്കിയ 'ഇതള്‍ ട്രേഡ് ഫെയറിന്' മികച്ച സ്വീകാര്യത. ജില്ലയിലെ ബഡ്‌സ് സ്ഥാപനങ്ങളിലെ ഭിന്നശേഷിക്കാരും രക്ഷിതാക്കളും തയാറാക്കുന്ന ഉത്പന്നങ്ങള്‍ 2022 മുതലാണ് 'ഇതള്‍' ബ്രാന്‍ഡില്‍ പുറത്തിറക്കി തുടങ്ങിയത്.

കിന്‍ഫ്രാ പാര്‍ക്കില്‍ ടാറ്റ എല്‍ക്‌സിയില്‍ സംഘടിപ്പിച്ച ഫെസ്റ്റിലൂടെ 8100 രൂപയുടെ വിറ്റുവരവാണ് ആകെയുണ്ടായത്. 14 ബഡ്‌സ് സ്ഥാപനങ്ങളില്‍ നിന്നുള്ള ഉത്പന്നങ്ങള്‍ വിപണനത്തിന് എത്തിച്ചിരുന്നു.

Content highlight

Ithal product fair

മഴ രസംകൊല്ലിയായെങ്കിലും ഗ്രീന്‍ഫീല്‍ഡില്‍ സാന്നിധ്യമറിയിച്ച് കുടുംബശ്രീ

ഇന്ത്യ ആതിഥ്യമരുളുന്ന ഏകദിന ലോകകപ്പ് ക്രിക്കറ്റ് ടൂര്‍ണമെന്റിന്റെ തിരുവനന്തപുരം ഗ്രീന്‍ഫീല്‍ഡ് സ്റ്റേഡിയത്തിലെ സന്നാഹ മത്സരങ്ങളിലെല്ലാം വില്ലനായെത്തിയ മഴ കാണികളെ നിരാശരാക്കിയെങ്കിലും ഭക്ഷണകാര്യത്തില്‍ അവരുടെ മനസ്സ് നിറച്ചു കുടുംബശ്രീ.

ഗ്രീന്‍ ഫീല്‍ഡില്‍ സംഘടിപ്പിക്കപ്പെട്ട ക്രിക്കറ്റ് സന്നാഹ മത്സരങ്ങളില്‍ അഞ്ച് കുടുംബശ്രീ യൂണിറ്റുകള്‍ ചേര്‍ന്ന് കാണികള്‍ക്ക് ഭക്ഷണമൊരുക്കി നല്‍കി 1,95,210 രൂപ വരുമാനവും നേടി. കുടുംബശ്രീ തിരുവനന്തപുരം ജില്ലാ മിഷന്റെ നേതൃത്വത്തില്‍ പ്രത്യാശ, ശ്രീശൈലം, സാംജീസ്, കഫേ ശ്രീ, ശ്രുതി എന്നീ കുടുംബശ്രീ യൂണിറ്റുകളാണ് കാണികള്‍ക്കായി ഭക്ഷണമൊരുക്കിയത്.

ന്യൂസിലന്‍ഡ് - ദക്ഷിണാഫ്രിക്ക മത്സരത്തില്‍ നിന്നും 23,000 രൂപയും മഴകാരണം ഉപേക്ഷിച്ച ഇന്ത്യ - നെതര്‍ലന്‍ഡ് മത്സരത്തിൽ നിന്ന് 1,72,210 രൂപയുമാണ് വരുമാനം നേടിയത്.

Content highlight

Kudumbashree makes cricket fans happy with food despite the rain at Greenfield Stadium

സമഗ്ര - ഭിന്നശേഷി വിഭാഗത്തിനായി പ്രത്യേക തൊഴില്‍ പദ്ധതിക്ക് തുടക്കം

കേരള നോളജ് എക്കോണമി മിഷന്‍ ഭിന്നശേഷി വിഭാഗത്തിനായി പ്രത്യേകമായി നടപ്പിലാക്കുന്ന തൊഴില്‍ പദ്ധതി 'സമഗ്ര'യ്ക്ക് തുടക്കം. തിരുവനന്തപുരം കൈമനം ഗവണ്‍മെന്റ് വനിതാ പോളിടെക്‌നിക്ക് കോളേജില്‍ ഇന്നലെ (സെപ്റ്റംബര്‍ 15) സംഘടിപ്പിച്ച ചടങ്ങില്‍ ഉന്നത വിദ്യാഭ്യാസ, സാമൂഹ്യനീതി വകുപ്പുമന്ത്രി ഡോ. ആര്‍. ബിന്ദു പദ്ധതിയുടെ ഔദ്യോഗിക ഉദ്ഘാടനം നിര്‍വഹിച്ചു.

വൈജ്ഞാനിക തൊഴില്‍ മേഖലയില്‍ ഭിന്നശേഷി സമൂഹത്തിന്റെ പങ്കാളിത്തം ഉറപ്പുവരുത്തുക എന്ന ലക്ഷ്യത്തോടെ നോളെജ് ഇക്കോണമി മിഷന്‍ സാമൂഹ്യനീതി വകുപ്പുമായി ചേര്‍ന്നുകൊണ്ട് നടപ്പാക്കുന്ന പദ്ധതിയാണ് സമഗ്ര. ഭിന്നശേഷി സമൂഹത്തിന്റെ ഉന്നമനവും തൊഴില്‍ സാധ്യതകളുടെ പരിഗണനകളും പരിശോധിച്ച് നൈപുണ്യ പരിശീലനത്തിലൂടെ തൊഴില്‍ ലഭ്യമാക്കുകയാണ് പദ്ധതിയുടെ ലക്ഷ്യം.

വൈജ്ഞാനിക തൊഴിലില്‍ തല്‍പ്പരരായ, പ്ലസ്ടു വോ അതിനു മുകളിലോ വിദ്യാഭ്യാസ യോഗ്യതയുള്ളവരെ കണ്ടെത്തി അഭിരുചിക്കും താല്‍പ്പര്യത്തിനും യോഗ്യതയ്ക്കും അനുയോജ്യമായ തൊഴിലവസരം ലഭ്യമാക്കുകയാണ് നോളെജ് മിഷന്‍ ചെയ്യുന്നത്. പദ്ധതി ഫീൽഡ് തലത്തിൽ നടപ്പിലാക്കുന്നത് കുടുംബശ്രീ മിഷൻ ആണ് .

നൈപുണീ പരിശീലനം, കരിയര്‍ കൗണ്‍സിലിങ്, വ്യക്തിത്വ വികസന പരിശിലീനം, ഇംഗ്ലീഷ് സ്‌കോര്‍ ടെസ്റ്റ് , റോബോട്ടിക് ഇന്റര്‍വ്യൂ എന്നിവ ഉള്‍പ്പെടുന്നതാണ് മിഷന്‍ ലഭ്യമാക്കുന്ന സേവനങ്ങള്‍. ഡിജിറ്റല്‍ വര്‍ക്ക്‌ഫോഴ്‌സ് മാനേജ്‌മെന്റ് സിസ്റ്റം (DWMS) വെബ്‌സൈറ്റില്‍ രജിസ്റ്റര്‍ ചെയ്യുന്ന തൊഴിലന്വേഷകരില്‍ മിഷന്‍ നല്‍കുന്ന പരിശീലനം പൂര്‍ത്തിയാക്കുന്നവര്‍ക്ക് പ്രത്യേക തൊഴില്‍ മേളകളിലൂടെ തൊഴില്‍ ഉറപ്പാക്കുന്നു.

ചടങ്ങില്‍ നോളെജ് ഇക്കോണമി മിഷന്‍ ഡയറക്ടര്‍ ഡോ. പി.എസ്. ശ്രീകല, കെ - ഡിസ്‌ക് മെമ്പര്‍ സെക്രട്ടറി ഡോ. പി.വി. ഉണ്ണികൃഷ്ണന്‍, വികലാംഗക്ഷേമ കോര്‍പ്പറേഷന്‍ ചെയര്‍പേഴ്‌സണ്‍ അഡ്വ. ജയ ഡാളി എം.വി, കെ.കെ.ഇ.എം സ്റ്റേറ്റ് പ്രോഗ്രാം മാനേജര്‍ ഡോ. സി. മധുസൂദനന്‍, ഗവൺമെൻ്റ് വനിതാ പൊളിടെക്‌നിക് പ്രിന്‍സിപ്പാള്‍ ബീന. എസ് എന്നിവര്‍ പങ്കെടുത്തു. ഉദ്ഘാടനത്തോട് അനുബന്ധിച്ച് ഭിന്നശേഷിക്കാരായ ഉദ്യോഗാര്‍ഥികള്‍ക്ക് വേണ്ടി സംഘടിപ്പിച്ച പ്രത്യേക തൊഴില്‍മേളയില്‍ 98 പേര്‍ അഭിമുഖങ്ങളില്‍ പങ്കെടുക്കുകയും 65 പേര്‍ ചുരുക്കപ്പട്ടികയില്‍ ഇടം നേടുകയും ചെയ്തു

Content highlight

samagra- special employement scheme for persons with disabilities launch

പ്രതീക്ഷാനിര്‍ഭരമായ ജീവിതത്തിന്റെ രുചി - ഇത് ആലപ്പുഴയുടെ 'ഹോപ് ഫിയസ്റ്റ'

കുടുംബശ്രീ ആലപ്പുഴ ജില്ലാ മിഷന്റെ നേതൃത്വത്തില്‍ ബഡ്‌സ് സ്ഥാപനങ്ങളിലെ പരിശീലനാര്‍ത്ഥികള്‍ക്കുള്‍പ്പെടെയുള്ള ഭിന്നശേഷിക്കാര്‍ക്കായി പാചക മത്സരം സംഘടിപ്പിച്ചു. സംസ്ഥാനത്ത് ഇതാദ്യമായാണ് ഭിന്നശേഷിക്കാര്‍ക്കു വേണ്ടി ഇത്തരത്തിലൊരു മത്സരം സംഘടിപ്പിക്കുന്നത്.

കറുമുറെ (വിവിധയിനം സ്‌നാക്കുകള്‍) ചില്‍ ടൈം (ലഘു പാനീയങ്ങള്‍) ഇരട്ടി മധുരം ( പായസം) ഹെല്‍ത്ത് മുഖ്യം ബിഗിലെ (വിവിധ സാലഡുകള്‍) എന്നിങ്ങനെ നാല് റൗണ്ടുകളിലായി ഈ മാസം 12ന് ആലപ്പുഴയില്‍ സംഘടിപ്പിച്ച പാചക മത്സരത്തില്‍ 13 ഭിന്നശേഷിക്കാരും അവരുടെ കുടുംബാംഗങ്ങളും ഭാഗമായി.

മത്സരത്തിന്റെ ഉദ്ഘാടകയായ ജില്ലാ കളക്ടര്‍ ഹരിത വി. കുമാര്‍ സമ്മാനദാനവും നിര്‍വഹിച്ചു. എ.എം. ആരിഫ് എം.പി, ജില്ലാ പഞ്ചായത്ത് പ്രസിഡന്റ് ശ്രീമതി കെ.ജി. രാജേശ്വരി എന്നിവര്‍ പാചക മത്സരം നേരിട്ട് കാണാനെത്തുകയും വിവിധ വിഭവങ്ങള്‍ രുചിക്കുകയും ചെയ്തു. പാചക മത്സരത്തിന് കുടുംബശ്രീ ആലപ്പുഴ ജില്ലാ മിഷന്‍ ഉദ്യോഗസ്ഥര്‍ നേതൃത്വം നല്‍കി.

Content highlight

alappuazha conducts hope fiesta cookery competition for differently abled

'തിരികെ സ്‌കൂളില്‍' ക്യാമ്പെയിന്‍ - 46 ലക്ഷം കുടുംബശ്രീ വനിതകള്‍ സ്‌കൂളുകളിലേക്ക് - ജില്ലാതല ഓറിയെന്റേഷന്‍ പരിശീലനം പൂര്‍ണ്ണം

അയല്‍ക്കൂട്ടാംഗങ്ങളുടെ ശാക്തീകരണം ലക്ഷ്യമിട്ട് കുടുംബശ്രീ ആസൂത്രണം ചെയ്ത് നടപ്പിലാക്കുന്ന 'തിരികെ സ്‌കൂളില്‍' സംസ്ഥാനതല ക്യാമ്പെയിന്റെ ഭാഗമായി എല്ലാജില്ലകളിലും ആദ്യഘട്ട ഓറിയെന്റേഷന്‍ പരിപാടികള്‍ പൂര്‍ണ്ണമായി.

'തിരികെ സ്‌കൂള്‍' - ലക്ഷ്യങ്ങള്‍
കുടുംബശ്രീ ത്രിതല സംഘടനാ സംവിധാനം കൂടുതല്‍ ശക്തിപ്പെടുത്തുന്നതിനും പുതിയ കാല സാധ്യതകള്‍ക്കനുസൃതമായി നൂതന പദ്ധതികള്‍ ഏറ്റെടുക്കാന്‍ അയല്‍ക്കൂട്ടങ്ങളെ പ്രാപ്തമാക്കുക പ്രധാന ലക്ഷ്യം. കൂടാതെ അയല്‍ക്കൂട്ടങ്ങളിലെ സൂക്ഷ്മസാമ്പത്തിക ഉപജീവന പ്രവര്‍ത്തനങ്ങള്‍ ശക്തിപ്പെടുത്തുക, ഡിജിറ്റല്‍ സാങ്കേതികവിദ്യയെ കുറിച്ച് അവബോധം സൃഷ്ടിക്കുക, സ്ത്രീപദവി ഉയര്‍ത്തുന്നതിന് സഹായകമാകുന്ന കാഴ്ചപ്പാട് സൃഷ്ടിക്കുക എന്നിവയാണ് ലക്ഷ്യങ്ങള്‍.

കാലയളവ്, സ്‌കൂള്‍, അധ്യാപകര്‍
വിദ്യാഭ്യാസ വകുപ്പുമായി സഹകരിച്ച് ഒക്ടോബര്‍ ഒന്ന് മുതല്‍ ഡിസംബര്‍ 10 വരെയുള്ള കാലയളവില്‍ നടത്തുന്ന ക്യാമ്പെയിനില്‍ 46 ലക്ഷം അയല്‍ക്കൂട്ടാംഗങ്ങള്‍ അതാത് സി.ഡി.എസിന് കീഴിലെ ഒരു വിദ്യാലയത്തില്‍ പഠിക്കാനായി എത്തും. പ്രത്യേക പരിശീലനം ലഭിച്ച 15000ത്തോളം റിസോഴ്‌സ് പേഴ്‌സണ്‍മാര്‍ അധ്യാപകരാകും. സ്‌കൂള്‍ അവധി ദിനങ്ങളില്‍ സംഘടിപ്പിക്കുന്ന ക്യാമ്പെയിന് വേണ്ടി രണ്ടായിരത്തിലേറെ സ്‌കൂളുകള്‍ അനുവദിച്ചിട്ടുണ്ട്.

ക്ലാസ്സ്

രാവിലെ 9.30 മുതല്‍ 4.30 വരെയാണ് ക്‌ളാസ് സമയം. 9.30 മുതല്‍ 9.45 വരെ അസംബ്‌ളിയാണ്. ഇതില്‍ കുടുംബശ്രീയുടെ മുദ്രഗീതം ആലപിക്കും. അതിനു ശേഷം ക്ലാസ്സുകള്‍ ആരംഭിക്കും.

പാഠങ്ങള്‍ :
സംഘാടന ശക്തി അനുഭവപാഠങ്ങൾ, അയൽക്കൂട്ടത്തിൻ്റെ സ്പന്ദനം കണക്കിലാണ്, കൂട്ടായ്മ ജീവിതഭദ്രത നമ്മുടെ സന്തോഷം, പുതിയ അറിവുകൾ പുതിയ ആശയങ്ങൾ,
ഡിജിറ്റൽ കാലം എന്നിവയാണ് പാഠ്യ വിഷയങ്ങള്‍. ഇവയോരോന്നും അഞ്ചു പാഠങ്ങളായി തിരിച്ചാണ് പരിശീലനം.

ഉച്ചയ്ക്ക് മുമ്പ് 15 മിനിറ്റ് ഇടവേളയുണ്ട്. ഒന്നു മുതല്‍ ഒന്നേ മുക്കാല്‍ വരെയാണ് ഉച്ചഭക്ഷണത്തിനുള്ള സമയം. എല്ലാവരും ഒരുമിച്ചിരുന്നാകും ഭക്ഷണം കഴിക്കുക. കൂടാതെ ഈ സമയത്ത് ചെറിയ കലാപരിപാടികളും നടത്തും. ഓരോ പീരിയഡ് കഴിയുമ്പോഴും ബെല്ലടിക്കും.

ഉച്ചഭക്ഷണം, കുടിവെള്ളം. സ്‌നാക്‌സ്, സ്‌കൂള്‍ ബാഗ്, സ്മാര്‍ട്ട് ഫോണ്‍, ഇയര്‍ഫോണ്‍ എന്നിവ വിദ്യാര്‍ത്ഥിനികള്‍ തന്നെ കൊണ്ടു വരും. താത്പര്യമുള്ള അയല്‍ക്കൂട്ടങ്ങള്‍ക്ക് യൂണിഫോമും ധരിക്കാം.

സ്ത്രീശാക്തീകരണവുമായി ബന്ധപ്പെട്ട് നാളിതു വരെ സംഘടിപ്പിച്ചതില്‍ ഏറ്റവും ബൃഹത്തായ ക്യാമ്പെയിനായിരിക്കും 'തിരികെ സ്‌കൂളില്‍'. 46 ലക്ഷം അയല്‍ക്കൂട്ടാംഗങ്ങള്‍, 15,000 റിസോഴ്‌സ് പേഴ്‌സണ്‍മാര്‍, കുടുംബശ്രീ സ്‌നേഹിത, വിവിധ പരിശീലന ഗ്രൂപ്പിലെ അംഗങ്ങള്‍, സംസ്ഥാന, ജില്ലാ മിഷന്‍ ജീവനക്കാര്‍ എന്നിവര്‍ ഉള്‍പ്പെടെ അരക്കോടിയോളം പേരാണ് ക്യാമ്പെയിനില്‍ പങ്കാളികളാകുക.

'തിരികെ സ്‌കൂളില്‍' വന്‍ വിജയമാക്കാന്‍ ഏവര്‍ക്കും ഒത്തുചേരാം.

Content highlight

back to school, district level orientation training completed

കോട്ടയത്തുമുണ്ട് റോണോയും മെസിയും!

കാല്‍പ്പന്തുകളിയിലെ കുരുന്നു പ്രതിഭകളെ കണ്ടെത്താന്‍ കോട്ടയം കുടുംബശ്രീ ജില്ലാ മിഷന്‍ ബാലസഭാംഗങ്ങള്‍ക്കായി സംഘടിപ്പിച്ച ജില്ലാതല ഫുട്ബോള്‍ ടൂര്‍ണമെന്റില്‍ ടി.വി പുരത്തിന് കിരീടം. പാലാ മുനിസിപ്പല്‍ സ്റ്റേഡിയത്തില്‍ സെപ്റ്റംബര്‍ മൂന്നിന് നടന്ന കലാശപ്പോരില്‍ പാലാ സി.ഡി.എസ് ടീമിനെ എതിരില്ലാത്ത രണ്ട് ഗോളുകള്‍ക്ക് ടി.വി പുരം പരാജയപ്പെടുത്തി. ഏറ്റുമാനൂര്‍ സി.ഡി.എസ് ടീമിനാണ് മൂന്നാം സ്ഥാനം.

ജില്ലയിലെ 78 സി.ഡി.എസുകളെ 4 ക്ലസ്റ്ററുകളായി തിരിച്ചു പ്രാഥമിക റൗണ്ട് മത്സരങ്ങള്‍ നടത്തി. ഈ ക്ലസ്റ്റര്‍ മത്സരങ്ങളില്‍ ആദ്യ രണ്ട് സ്ഥാനത്തെത്തിയ ടീമുകള്‍ വീതം ജില്ലാതല ഫൈനല്‍ റൗണ്ടിലേക്ക് പ്രവേശനം നേടി. എട്ട് ടീമുകള്‍ അടങ്ങുന്ന ജില്ലാതല മത്സരത്തില്‍ നിന്ന് ടി.വി പുരം, പാലാ, ഏറ്റുമാനൂര്‍, രാമപുരം ടീമുകള്‍ സെമിഫൈനലിലെത്തി. സെമിയില്‍ പരാജയപ്പെട്ട ഏറ്റുമാനൂര്‍, രാമപുരം ടീമുകള്‍ തമ്മിലുള്ള ലൂസേഴ്സ് ഫൈനലില്‍ ഏറ്റുമാനൂരും വിജയിച്ചു. മികച്ച താരമായി പാലായുടെ സിദ്ധാര്‍ത്ഥ് ആര്‍ നായരേയും മികച്ച ഗോളിയായി ടി.വി പുരം താരം ആരോമലിനെയും തെരഞ്ഞെടുത്തു. വിജയികള്‍ക്ക് ട്രോഫിയും മെഡലും സമ്മാനിച്ചു. പാലാ മുനിസിപ്പല്‍ ചെയര്‍പേഴ്സണ്‍ ജോസിന്‍ ബിനോ, പാലാ ഡി.വൈ.എസ്.പി എ.ജെ തോമസ് എന്നിവര്‍ ചേര്‍ന്നു വിജയികള്‍ക്കുള്ള സമ്മാനം വിതരണം ചെയ്തു.

ബാലസഭ കുട്ടികള്‍ക്കുള്ള സേവിങ്‌സ് ബാങ്ക് അക്കൗണ്ട് ക്യാമ്പയിന്റെ ഉദ്ഘാടനം യൂണിയന്‍ ബാങ്ക് ഓഫ് ഇന്ത്യ കോട്ടയം റീജിയണല്‍ ഹെഡ് ആര്‍. നരസിംഹകുമാര്‍ ചടങ്ങില്‍ നിര്‍വഹിച്ചു. പാലാ സി.ഡി.എസ് ചെയര്‍പേഴ്സണ്‍ ശ്രീകല അനില്‍കുമാര്‍, കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ അഭിലാഷ് ദിവാകര്‍, അസിസ്റ്റന്റ് ജില്ലാ മിഷന്‍ കോ-ഓര്‍ഡിനേറ്റര്‍മാരായ പ്രകാശ് ബി നായര്‍, മുഹമ്മദ് ഹാരിസ്, സ്റ്റേറ്റ് പ്രോഗ്രാം മാനേജര്‍ അരുണ്‍ പി. ആര്‍, മറ്റ് സി.ഡി.എസ് ചെയര്‍പേഴ്സന്മാര്‍, കുടുംബശ്രീ ഉദ്യോഗസ്ഥര്‍, സ്പോണ്‍സര്‍മാരായ യൂണിയന്‍ ബാങ്ക് ഓഫ് ഇന്ത്യ പ്രതിനിധികള്‍, സി.ഡി.എസ് അംഗങ്ങള്‍, ബാലസഭാ റിസോഴ്സ് പേഴ്സണ്‍മാര്‍ എന്നിവര്‍ പങ്കെടുത്തു.

Content highlight

Kudumbashree Kottayam District Mission organizes District Level Football Competition for Balasabha member

അട്ടപ്പാടിയിലെ ബാലഗോത്രസഭാംഗങ്ങളും സര്‍വ്വ 'സജ്ജ'മാകുന്നു...

പ്രകൃതി ദുരന്തങ്ങളെ കുറിച്ച് മനസിലാക്കുന്നതിനും അവയെ അഭിമുഖീകരിക്കുന്നതിനും കുടുംബശ്രീ ബാലസഭാംഗങ്ങളായ 12നും 17നും ഇടയില്‍ പ്രായമുള്ള കുട്ടികളെ പ്രാപ്തരാക്കുന്ന 'സജ്ജം' ബില്‍ഡിങ്ങ് റെസിലിയന്‍സ് പദ്ധതിയുടെ പരിശീലന പരിപാടി അട്ടപ്പാടിയിലും. കുടുംബശ്രീ അട്ടപ്പാടി ആദിവാസി സമഗ്ര വികസന പദ്ധതിയുടെ നേതൃത്വത്തില്‍ സെപ്റ്റംബര്‍ 9,10 തീയതികളില്‍ അഗളി, ഷോളയൂര്‍ പഞ്ചായത്തുകളിലെ 80 വീതം ബാലഗോത്രസഭാംഗങ്ങള്‍ക്കാണ് ആദ്യഘട്ട പരിശീലനം നല്‍കിയത്.

സംസ്ഥാന തലത്തില്‍ പരിശീലനം പൂര്‍ത്തിയാക്കിയ റിസോഴ്‌സ് പേഴ്‌സണ്‍മാരാണ് അട്ടപ്പാടിയിലെ സജ്ജം പരിശീലനത്തിന് ചുക്കാന്‍ പിടിക്കുന്നത്.

അഗളി ക്യാമ്പ് സെന്ററില്‍ നടന്ന അഗളി പഞ്ചായത്ത്തല പരിശീലന പരിപാടി കുടുംബശ്രീ അഗളി പഞ്ചായത്ത് സമിതി പ്രസിഡന്റ് സരസ്വതി മുത്തുകുമാറും, ഭൂതിവഴി മൂപ്പന്‍സ് ട്രെയിനിംഗ് സെന്ററില്‍ നടന്ന ഷോളയൂര്‍ പഞ്ചായത്ത്തല പരിശീലന പരിപാടി കുടുംബശ്രീ ഷോളയൂര്‍ പഞ്ചായത്ത് സമിതി പ്രസിഡന്റ് സലീന ഷണ്മുഖനും ഉദ്ഘാടനം ചെയ്തു.

പ്രകൃതി, പരിസ്ഥിതി, ദുരന്ത ആഘാത ലഘൂകരണം, അവകാശങ്ങളും ഉത്തരവാദിത്വങ്ങളും എന്നീ വിഷയങ്ങളില്‍ കുട്ടികള്‍ക്ക് അവബോധം നല്‍കി. പ്രളയം, ഉരുള്‍പൊട്ടല്‍, വരള്‍ച്ച, മണ്ണിടിച്ചില്‍, കടല്‍ക്ഷോഭം തുടങ്ങി വിവിധ പ്രകൃതി ദുരന്ത സാധ്യതകളെ അറിയുന്നതിനും നിലവിലെ ദുരന്തനിവാരണ സംവിധാനങ്ങളെ മനസിലാക്കുന്നതിനും കുട്ടികള്‍ക്ക് ഇതിലൂടെ അവസരമൊരുങ്ങി. കാലാവസ്ഥാ വ്യതിയാനം കുട്ടികളുടെ ജീവിതത്തെ എപ്രകാരം സ്വാധീനിക്കുന്നു എന്നതുള്‍പ്പെടെ കുട്ടികള്‍ക്ക് സ്വയം മനസിലാക്കാന്‍ കഴിയുന്ന വിധത്തില്‍ വിവിധ ആക്ടിവിറ്റികളിലൂടെയാണ് പരിശീലനം സംഘടിപ്പിച്ചത്. നേതൃ പാടവം, യോഗ പരിശീലനം എന്നിവയും ഇതോടൊപ്പം നല്‍കി.

വരും മാസങ്ങളില്‍ പുതൂര്‍ പഞ്ചായത്ത്, അട്ടപ്പാടിയിലെ പ്രീ മെട്രിക് ഹോസ്റ്റലുകള്‍ എന്നിവ കേന്ദ്രീകരിച്ച് സജ്ജം പരിശീലനം നല്‍കും.

അഗളി പഞ്ചായത്ത് സമിതി സെക്രട്ടറി രേസി, പഞ്ചായത്ത് സമിതി കോ-ഓര്‍ഡിനേറ്റര്‍മാരായ പ്രിയ, ഷൈനി, പഞ്ചായത്ത് സമിതി അംഗങ്ങള്‍, കുടുംബശ്രീ യങ് പ്രൊഫഷണല്‍ സുധീഷ്, പ്രോജക്ട് കോ-ഓര്‍ഡിനേറ്റര്‍ ജോമോന്‍ കെ.ജെ, ആനിമേറ്റര്‍മാര്‍, ബ്രിഡ്ജ് കോഴ്‌സ് അധ്യാപകര്‍ എന്നിവര്‍ ഉദ്ഘാടന ചടങ്ങുകളില്‍ പങ്കെടുത്തു.

Content highlight

Sajjam training for balagothrasabha members in Attappady has started

തൊഴിലരങ്ങത്തേക്ക് 2.0 -ന് തുടക്കം

അഭ്യസ്തവിദ്യരായ സ്ത്രീകള്‍ക്ക് വൈജ്ഞാനിക തൊഴില്‍ മേഖലയില്‍ അവസരമൊരുക്കുക എന്ന ലക്ഷ്യത്തോടെ കേരള നോളെജ് ഇക്കോണമി മിഷന്‍ കുടുംബശ്രീയുമായി ചേര്‍ന്ന് നടപ്പിലാക്കുന്ന തൊഴിലരങ്ങത്തേക്ക് പദ്ധതിയുടെ രണ്ടാം ഘട്ടത്തിന് തുടക്കം. പദ്ധതിയുടെ ആദ്യഘട്ടം 2023 മാര്‍ച്ചില്‍ വിജയകരമായി പൂര്‍ത്തിയാക്കിയിരുന്നു. പദ്ധതിയുടെ രണ്ടാം ഘട്ടത്തിന് താത്പര്യപ്പെട്ട് രജിസ്റ്റര്‍ ചെയ്തിരിക്കുന്ന 399 തദ്ദേശ സ്വയംഭരണ സ്ഥാപനങ്ങള്‍ കേന്ദ്രീകരിച്ചാണ് തൊഴിലരങ്ങത്തേക്ക് 2.0 പദ്ധതി പ്രവര്‍ത്തനങ്ങള്‍ കുടുംബശ്രീ ഫീല്‍ഡ്തലത്തില്‍ ഏകോപിപ്പിക്കുക.

സെപ്റ്റംബര്‍ നാലിന് തിരുവനന്തപുരം ശാസ്ത്രസാങ്കേതിക മ്യൂസിയത്തില്‍ നടന്ന ചടങ്ങില്‍ വനിതാ - ശിശുവികസന വകുപ്പ് മന്ത്രി വീണാ ജോര്‍ജ്ജ് രണ്ടാംഘട്ടത്തിന്റെ ഉദ്ഘാടനം നിര്‍വഹിച്ചു. വി.കെ. പ്രശാന്ത് എംഎല്‍എ ചടങ്ങില്‍ അധ്യക്ഷനായി.

നോളെജ് മിഷന്റെ ഡിജിറ്റല്‍ പ്ലാറ്റ്‌ഫോമായ ഡി.ഡബ്ല്യു.എം.എസ് (ഡിജിറ്റല്‍ വര്‍ക്ക് ഫോഴ്‌സ് മാനേജ്‌മെന്റ് സിസ്റ്റം) - ല്‍ പദ്ധതിയുടെ ഭാഗമായി രജിസ്റ്റര്‍ ചെയ്ത മുഴുവന്‍ പേര്‍ക്കും തൊഴില്‍ തയ്യാറെടുപ്പിനുള്ള പിന്തുണ നോളജ് എക്കണോമി മിഷന്‍ സംവിധാനത്തിലൂടെ നല്‍കും. നൈപുണീ പരിശീലനം, കരിയര്‍ കൗണ്‍സിലിങ്, വ്യക്തിത്വ വികസന പരിശിലീനം, ഇംഗ്ലീഷ് സ്‌കോര്‍ ടെസ്റ്റ്, റോബോട്ടിക് ഇന്റര്‍വ്യൂ എന്നിവ ഉള്‍പ്പെടുന്നതാണ് മിഷന്‍ ലഭ്യമാക്കുന്ന സേവനങ്ങള്‍.

പ്ലസ് ടു അടിസ്ഥാന യോഗ്യതയുള്ള 18 വയസ്സിനും 59 വയസ്സിനും ഇടയില്‍ പ്രായമുള്ള സ്ത്രീ തൊഴിലന്വേഷകരാണ് പദ്ധതിയുടെ ഗുണഭോക്താക്കള്‍. വിദ്യാഭ്യാസ യോഗ്യത അനുസരിച്ച് തൊഴിലന്വേഷകരെ വ്യത്യസ്ത ഗ്രൂപ്പുകളായി തിരിച്ച് നോളജ് ജോബ് യൂണിറ്റുകള്‍ രൂപീകരിച്ചാണ് പദ്ധതിയുടെ നടത്തിപ്പ്. ഒന്നാംഘട്ടത്തില്‍ രൂപീകരിക്കപ്പെട്ടതുള്‍പ്പെടെയുള്ള നോളജ് ജോബ് യൂണിറ്റുകള്‍ സജീവമാക്കിയാണ് കൂടുതല്‍ പ്രവര്‍ത്തനങ്ങളിലേക്ക് കടക്കുക. നിലവില്‍ 14 ജില്ലകളില്‍ നിന്നായി 2,77, 850 സ്ത്രീതൊഴിലന്വേഷകരാണ് പദ്ധതിക്ക് കീഴില്‍ രജിസ്റ്റര്‍ ചെയ്തിട്ടുള്ളത്. അടുത്തവര്‍ഷം മാര്‍ച്ച് 31ന് മുമ്പ് പദ്ധതിയുടെ രണ്ടാം ഘട്ടം പൂര്‍ത്തിയാകും. 399 തദ്ദേശ സ്വയംഭരണ സ്ഥാപനങ്ങളിലും പരിശീലനവും തൊഴില്‍ മേളകളും സംഘടിപ്പിക്കും.

പരിപാടിയില്‍ നോളജ് മിഷന്‍ ഡയറക്ടര്‍ ഡോ. പി.എസ്. ശ്രീകല, വനിതാ വികസന കോര്‍പ്പറേഷന്‍ മാനേജിങ് ഡയറക്ടര്‍ ബിന്ദു വി.സി, കേരള നോളജ് എക്കണോമി മിഷന്‍ സ്റ്റേറ്റ് പ്രോഗ്രാം മാനേജര്‍ ഡോ. സി. മധുസൂദനന്‍, കുടുംബശ്രീ തിരുവനന്തപുരം ജില്ലാമിഷന്‍ കോ-ഓര്‍ഡിനേറ്റര്‍ ഡോ. ശ്രീജിത്ത്, കുടുംബശ്രീ സ്റ്റേറ്റ് പ്രോഗ്രാം മാനേജര്‍ സാബു. ബി എന്നിവര്‍ സംസാരിച്ചു.

ചടങ്ങിനോട് അനുബന്ധിച്ച് സ്ത്രീകളും വിജ്ഞാന തൊഴില്‍ സാധ്യതകളും എന്ന വിഷയത്തില്‍ പാനല്‍ ചര്‍ച്ചയും സംഘടിപ്പിച്ചു.

Content highlight

Thozhilarangathekk 2.0' begins

തളിപ്പറമ്പിന്റെ സ്വന്തം ഓണശ്രീ, വിറ്റുവരവ് ഒരു കോടി!

കുടുംബശ്രീ കണ്ണൂര്‍ ജില്ലാ മിഷന്റെ ആഭിമുഖ്യത്തില്‍ തളിപ്പറമ്പ് നിയോജക മണ്ഡലത്തിലെ 9 സി.ഡി.എസുകളിലായി ഒരുക്കിയ ഓണശ്രീ വില്ലേജ് ഫെസ്റ്റ് വന്‍ ഹിറ്റ്! ഓഗസ്റ്റ് 20 മുതല്‍ നിയോജകമണ്ഡലത്തിലെ 7 ഗ്രാമപഞ്ചായത്തുകളിലും 2 നഗരസഭകളിലുമായി സംഘടിപ്പിച്ച ഈ ഉത്പന്ന വിപണന മേളയും സാംസ്‌ക്കാരികോത്സവവും ഏകിയത് പുതു അനുഭവം.

എട്ട് മുതല്‍ 15 ദിവസം വരെ നീണ്ടുനിന്ന വില്ലേജ് ഫെസ്റ്റിന്റെ ഭാഗമായി നേടാനായത് ഒരു കോടി രൂപയുടെ വിറ്റുവരവാണ്! 10 ലക്ഷം രൂപയോളം ഫുഡ്‌കോര്‍ട്ടില്‍ നിന്നും ലഭിച്ചു. മണ്ഡലത്തിലെ എം.എല്‍.എയായ എം.വി. ഗോവിന്ദന്‍ മാസ്റ്ററിന്റെ ആശയമായ വില്ലേജ് ഫെസ്റ്റ് മുഖേന ഇവിടുത്തെ 350 കുടുംബശ്രീ വനിതാ സംരംഭകര്‍ക്കാണ് ഓണക്കാലത്ത് മികച്ച ഉത്പന്ന വിപണന അവസരമൊരുങ്ങിയത്.

അതാത് പ്രദേശത്തെ നാടന്‍ കലാരൂപങ്ങള്‍ സാംസ്‌ക്കാരികോത്സവത്തിന്റെ ഭാഗമായും അരങ്ങേറി. കുട്ടികള്‍ മുതല്‍ വയോജനങ്ങള്‍ വരെയുള്ള നാട്ടുകാരായ കലാകാരന്മാര്‍ അണിനിരന്ന സാംസ്‌ക്കാരികോത്സവവും വേറിട്ട അനുഭവമായി മാറുകയായിരുന്നു.

Content highlight

Onashree of kannur kudumbashree mission become a huge hit