വാര്‍ത്തകള്‍

കുടുംബശ്രീയുടെ ആഭിമുഖ്യത്തില്‍ അയല്‍ക്കൂട്ട, ഓക്സിലറി ഗ്രൂപ്പ് അംഗങ്ങള്‍ക്കായി  'സര്‍ഗ്ഗം-2024' സംസ്ഥാനതല കഥാരചന മത്സരത്തിലേക്ക് രചനകള്‍ ക്ഷണിച്ചു. സമ്മാനാര്‍ഹമായ ആദ്യ മൂന്ന് രചനകള്‍ക്ക് യഥാക്രമം 20,000, 15,000, 10,000 എന്നിങ്ങനെ ക്യാഷ് അവാര്‍ഡും മെമന്‍റോയും സര്‍ട്ടിഫിക്കറ്റും  ലഭിക്കും. 2500 രൂപ വീതം മൂന്ന് പ്രോത്സാഹന സമ്മാനങ്ങളും ഏര്‍പ്പെടുത്തിയിട്ടുണ്ട്. മികച്ച രചനകള്‍ അയയ്ക്കുന്ന 40 പേര്‍ക്ക്  കുടുംബശ്രീ സംഘടിപ്പിക്കുന്ന ത്രിദിന സാഹിത്യ ശില്‍പശാലയില്‍ പങ്കെടുക്കാനുള്ള അവസരവും ലഭിക്കും.

സാഹിത്യ മേഖലയിലെ പ്രമുഖര്‍ ഉള്‍പ്പെടുന്ന ജൂറിയായിരിക്കും സമ്മാനാര്‍ഹരെ കണ്ടെത്തുക. രചയിതാവിന്‍റെ പേര്, മേല്‍വിലാസം, ഫോണ്‍ നമ്പര്‍, കുടുംബശ്രീ അംഗമാണെന്നു തെളിയിക്കുന്ന സി.ഡി.എസ് ചെയര്‍പേഴ്സന്‍റെ സാക്ഷ്യപത്രം എന്നിവ സഹിതം കഥകള്‍ തപാല്‍ വഴിയോ കൊറിയര്‍ വഴിയോ നേരിട്ടോ ഡിസംബര്‍ 24 വൈകുന്നേരം അഞ്ച് മണിക്കുള്ളില്‍ ചുവടെ കാണുന്ന വിലാസത്തില്‍ ലഭ്യമാക്കണം.

പബ്ളിക് റിലേഷന്‍സ് ഓഫീസര്‍
കുടുംബശ്രീ സംസ്ഥാന ദാരിദ്ര്യ നിര്‍മാര്‍ജന മിഷന്‍
ട്രിഡ ബില്‍ഡിങ്ങ്-രണ്ടാം നില
മെഡിക്കല്‍ കോളേജ്.പി.ഓ  
തിരുവനന്തപുരം-695 011    
 
ഇമെയില്‍, വാട്ട്സാപ് എന്നിവ മുഖേന അയക്കുന്ന രചനകള്‍ മത്സരത്തിന് പരിഗണിക്കുന്നതല്ല. വിശദാംശങ്ങള്‍ക്ക് കുടുംബശ്രീ വെബ്സൈറ്റ് www.kudumbashree.org/sargam2024 സന്ദര്‍ശിക്കുക.

സി.ഡി.എസ് അംഗങ്ങള്‍ക്ക് പ്രതിമാസം 500 രൂപ യാത്രാ ബത്ത അനുവദിച്ചു കൊണ്ടുള്ള സര്‍ക്കാര്‍ തീരുമാനത്തോടെ പൂവണിയുന്നത് കുടുംബശ്രീയുടെ ചിരകാല ആവശ്യം. കുടുംബശ്രീ നടപ്പാക്കുന്ന എല്ലാ ദാരിദ്ര്യനിര്‍മാര്‍ജന സ്ത്രീശാക്തീകരണ പ്രവര്‍ത്തനങ്ങളിലും നിര്‍ണായക സ്ഥാനം ഏറ്റെടുത്തു  കൊണ്ട് സന്നദ്ധ പ്രവര്‍ത്തകരായി രംഗത്തുള്ള സി.ഡി.എസ് പ്രവര്‍ത്തകരെ സംബന്ധിച്ചിടത്തോളം വലിയ അംഗീകാരം കൂടിയാണിത്. 18400 ഓളം വരുന്ന സി.ഡി.എസ് അംഗങ്ങള്‍ക്കായി പ്രതിവര്‍ഷം 11.02 കോടിയാണ് ഈ ഇനത്തില്‍  വിനിയോഗിക്കുന്നത്.

കുടുംബശ്രീ മുഖേന നടപ്പാക്കുന്ന വിവിധ പദ്ധതികള്‍ താഴെ തട്ടില്‍ കാര്യക്ഷമമായി നടപ്പാക്കുന്നതില്‍ മുഖ്യപങ്കു വഹിക്കുന്നവരാണ് ഓരോ വാര്‍ഡിലും പ്രവര്‍ത്തിക്കുന്ന സി.ഡി.എസ് അംഗങ്ങള്‍. ഇവരില്‍ ഭൂരിഭാഗവും ബി.പി.എല്‍ വിഭാഗത്തില്‍ പെട്ടവരുമാണ്. കുടുംബശ്രീ ത്രിതല സംഘടനാ പ്രവര്‍ത്തനങ്ങള്‍ ഏകോപിപ്പിക്കുന്നതിലും ക്ഷേമ പ്രവര്‍ത്തനങ്ങള്‍ വിജയകരമായി താഴെ തട്ടില്‍ എത്തിക്കുന്നതിലും ഇവര്‍ മുഖ്യ പങ്കു വഹിക്കുന്നു. ഇതിനു പുറമേ പ്രളയ കാലത്തും കോവിഡ് മഹാമാരിയുടെ ഘട്ടത്തിലും ദുരിതാശ്വാസ പുനരധിവാസ പ്രവര്‍ത്തനങ്ങളുടെ നട്ടെല്ലായി നിലകൊണ്ടത് സി.ഡി.എസ്  അംഗങ്ങളാണ്.

2021-ലെ ബജറ്റിലാണ് സി.ഡി.എസ് അംഗങ്ങള്‍ക്ക് യാത്രാ ബത്ത അനുവദിച്ചു കൊണ്ടുള്ള പ്രഖ്യാപനമുണ്ടായത്. കഴിഞ്ഞ ദിവസം ചേര്‍ന്ന മന്ത്രി സഭായോഗം ഇത് അംഗീകരിച്ചതോടെ പുതുവര്‍ഷ സമ്മാനം ലഭിച്ച ആവേശത്തിലാണ് സി.ഡി.എസ് അംഗങ്ങള്‍. കുടുംബശ്രീയുടെ 2025-26 സാമ്പത്തിക വര്‍ഷത്തെ പ്ളാന്‍ ഫണ്ടിലും സി.ഡി.എസ് അംഗങ്ങളുടെ യാത്രാബത്ത അനുവദിക്കുന്നതിന് 11.02 കോടി രൂപ വകയിരുത്തിയിട്ടുണ്ട്.    

സ്ത്രീശാക്തീകരണ ദാരിദ്ര്യ നിര്‍മാര്‍ജനത്തിന് ലോകത്തിന് മാതൃകയായ കുടുംബശ്രീക്ക് വീണ്ടും അഭിമാന നേട്ടം. മാതൃകാപരമായ പ്രവര്‍ത്തനമികവിന് വയനാട് ജില്ലയിലെ വെങ്ങപ്പള്ളി സി.ഡി.എസിന് ഇന്‍റര്‍ നാഷണല്‍ സ്റ്റാന്‍ഡാര്‍ഡ് ഓപ്പറേഷന്‍(ഐ.എസ്.ഓ) സര്‍ട്ടിഫിക്കേഷന്‍ അംഗീകാരം ലഭിച്ചു. സംസ്ഥാനത്ത് ഇതാദ്യമായാണ് കുടുംബശ്രീയുടെ കീഴില്‍ ഒരു സി.ഡി.എസിന് പ്രവര്‍ത്തന സേവന മികവിന്‍റെ അടിസ്ഥാനത്തില്‍ ഈ അംഗീകാരം ലഭിക്കുന്നത്. സ്ത്രീശാക്തീകരണത്തിലൂടെ ദാരിദ്ര്യ നിര്‍മാര്‍ജനമെന്ന ലക്ഷ്യം കൈവരിക്കുന്നതിനായി കേരള സര്‍ക്കാര്‍ രൂപം കൊടുത്ത ബൈലാ പ്രകാരമുള്ള എല്ലാ സേവനങ്ങളും കുടുംബശ്രീ മുഖേന ലഭ്യമാക്കിയതിനാണ് അംഗീകാരം. മൂന്നു വര്‍ഷമാണ് സര്‍ട്ടിഫിക്കേഷന്‍റെ കാലാവധി.
 
സി.ഡി.എസ് അധ്യക്ഷ നിഷാ രാമചന്ദ്രന്‍റെ നേതൃത്വത്തിലുള്ള സി.ഡി.എസ്ഭരണ സമിതിയുടെ കഴിഞ്ഞ ആറു മാസത്തെ കഠിനാധ്വാനത്തിന്‍റെ ഫലമാണ് വെങ്ങപ്പള്ളി സി.ഡി.എസിന് ലഭിച്ച അംഗീകാരം. പൗരാവകാശ രേഖയുടെ അടിസ്ഥാനത്തിലാണ് സി.ഡി.എസിന്‍റെ എല്ലാ പ്രവര്‍ത്തനങ്ങളും. ഫയലുകളുടെ വിനിയോഗം, സാമ്പത്തിക ഇടപാടുകളുടെയും രജിസ്റ്ററുകളുടെ സൂക്ഷിപ്പിലെയും കൃത്യത, അയല്‍ക്കൂട്ടങ്ങളുടെ വിവരങ്ങള്‍, കൃത്യമായ അക്കൗണ്ടിങ്ങ് സിസ്റ്റം, കാര്യക്ഷമത എന്നിവ ഉള്‍പ്പെടെ മികവുറ്റ രീതിയില്‍ സ്ഥിരതയാര്‍ന്ന പ്രവര്‍ത്തനമാണ് സി.ഡി.എസ് നടത്തിയത്. കുടുംബശ്രീയുമായി ബന്ധപ്പെട്ട ഏതു വിവരവും മൂന്നു മിനുട്ടില്‍ ലഭ്യമാക്കുന്ന വിധം ഓഫീസ് സംവിധാനം മെച്ചപ്പെടുത്താനും സി.ഡി.എസിന്  സാധിച്ചു. കൂടാതെ അക്കൗണ്ടിങ്ങ് സിസ്റ്റം കാര്യക്ഷമമാക്കുന്നതിന് ആറുമാസം കൂടുമ്പോള്‍ ഇന്‍റേണല്‍ ഓഡിറ്റും നടത്തുന്നു.  

ജില്ലാ മിഷന്‍റെ നേതൃത്വത്തില്‍ സി.ഡി.എസ് ഓഫീസിലെ ഫയലുകളുടെ ക്രമീകരണം, സി.ഡി.എസിന്‍റെ ഗുണമേന്‍മാ നയം രൂപീകരണം, പൊതുജനാഭിപ്രായ രൂപീകരണം എന്നിവ ഉള്‍പ്പെടെയുളള പ്രവര്‍ത്തനങ്ങള്‍  നേട്ടം കൈവരിക്കുന്നതില്‍ നിര്‍ണായകമായി. നിലവിലെ പ്രവര്‍ത്തനങ്ങള്‍ ഏകോപിപ്പിക്കുന്നതിനും മെച്ചപ്പെടുത്തുന്നതിനും ഫയല്‍ സംവിധാനം കാര്യക്ഷമമാക്കുന്നതിനും കിലയുടെ സഹകരണവും ലഭിച്ചു. കൂടാതെ കിലയുടെ പിന്തുണയോടെ  സി.ഡി.എസിന്‍റെ പ്രവര്‍ത്തനങ്ങള്‍ സംബന്ധിച്ച് പുസ്തകവും തയ്യാറാക്കി. എല്ലാ പ്രവര്‍ത്തനങ്ങള്‍ക്കും പഞ്ചായത്ത് ഭരണസമിതിയുടെ പൂര്‍ണ പിന്തുണ ലഭിച്ചതും നേട്ടത്തിന് വഴിയൊരുക്കി. സമാന രീതിയില്‍ ജില്ലയിലെ മാതൃകാ സി.ഡി.എസുകള്‍ക്കും ഐ.എസ്.ഓ സര്‍ട്ടിഫിക്കേഷന്‍ നേടാനുള്ള ശ്രമത്തിലാണ് അധികൃതര്‍.  

സ്ഥാപനത്തില്‍ ക്വാളിറ്റി മാനേജ്മെന്‍റ് സിസ്റ്റം നടപ്പാക്കുന്നതു വഴി സി.ഡി.എസ് സംവിധാനത്തെയും വിഭവങ്ങളെയും ഏറ്റവും ഫലപ്രദമായരീതിയില്‍ പൊതുജനങ്ങള്‍ക്ക് ലഭ്യമാക്കുക എന്നതാണ് ഐ.എസ്.ഓ 9001-2015 സംവിധാനം വഴി ഉദ്ദേശിക്കുന്നത്. ഇതു പ്രകാരം സി.ഡി.എസ് പ്രവര്‍ത്തനങ്ങള്‍ കൃത്യമായി രേഖപ്പെടുത്തുകയും സി.ഡി.എസിന്‍റെ വിഭവങ്ങള്‍ കാര്യക്ഷമമായി ഉപയോഗപ്പെടുത്തി ഉല്‍പാദനക്ഷമത വര്‍ധിപ്പിക്കുന്നതിനും ലക്ഷ്യമിടുന്നു.

ന്യൂഡല്‍ഹിയിലെ പ്രഗതി മൈതാനിയില്‍ നവംബര്‍ 14ന് തുടക്കമായ ഇന്ത്യ ഇന്റര്‍നാഷണല്‍ ട്രേഡ് ഫെയറില്‍ (ഐ.ഐ.ടി.എഫ്) പതിവ് പോലെ നിറ സാന്നിദ്ധ്യമായി കുടുംബശ്രീ. അതില്‍ ശ്രദ്ധ നേടുന്നത് കുടുംബശ്രീയുടെ ബ്രാന്‍ഡഡ് ഉത്പന്നങ്ങളും!

  ഇന്ത്യ ട്രേഡ് പ്രൊമോഷന്‍ ഓര്‍ഗനൈസേഷന്റെയും കേന്ദ്ര ഗ്രാമവികസന മന്ത്രാലയത്തിന്റെയും ആഭിമുഖ്യത്തിലുള്ള മേളയിലെ
കേരള പവലിയനില്‍ ഉത്പന്ന വിപണനത്തിനുള്ള കൊമേഴ്‌സ്യല്‍ സ്റ്റാളില്‍ കൊല്ലം, എറണാകുളം, കോട്ടയം, കണ്ണൂര്‍ ജില്ലകളില്‍ നിന്നുമുള്ള അയല്‍ക്കൂട്ടാംഗങ്ങളുടെ വിവിധ ഉത്പന്നങ്ങള്‍ അടങ്ങിയ രണ്ട് കുടുംബശ്രീ സ്റ്റാളുകളുണ്ട്. കൂടാതെ ഇതോടൊപ്പം നടക്കുന്ന ആജീവിക സരസ് മേളയില്‍ 5 കുടുംബശ്രീ സംരംഭക യൂണിറ്റുകളും (ആതിര ഹെര്‍ബല്‍സ്, കാര്‍ത്തിക ചിപ്‌സ് തിരുവനന്തപുരം, ഗ്രേസ് ഫുഡ് പ്രൊഡക്ടസ് കൊല്ലം, മധുവനി മില്ലറ്റ്‌സ് യൂണിറ്റ് അട്ടപ്പാടി, ശ്രീ ഹാന്‍ഡ്ലൂംസ് പാലക്കാട്).

  കുടുംബശ്രീ ' ഫ്രഷ് ബൈറ്റ്‌സ് ' ബ്രാന്‍ഡിലുള്ള ചിപ്‌സ്, ശര്‍ക്കര വരട്ടി എന്നിവയും ബ്രാന്‍ഡഡ് കറിപ്പൊടികളുമാണ് കുടുംബശ്രീ സ്റ്റാളുകളില്‍ ഇത്തവണ താരമായിരിക്കുന്നത്. കൂടാതെ കരകൗശല വസ്തുക്കളും അച്ചാറുകളും തുണിത്തരങ്ങളും എല്ലാം ലഭ്യമാക്കിയിരിക്കുന്നു. ഐ.ഐ.ടി.എഫ്  ഫുഡ് കോര്‍ട്ടില്‍ രണ്ട് കുടുംബശ്രീ യൂണിറ്റുകള്‍ (സൗപര്‍ണിക കോഴിക്കോട്‌, ലക്ഷ്യ എറണാകുളം) ഒരുക്കുന്ന രുചികരമായ ഭക്ഷണ വിഭവങ്ങളുമുണ്ട്.  മേള 27ന് സമാപിക്കും.

കുടുംബശ്രീ മുഖേന ഉപജീവന മേഖലയില്‍ ആരംഭിക്കുന്ന പുതിയ പദ്ധതികള്‍ കേരളത്തിന്‍റെ വികസന മേഖലയ്ക്ക് നല്‍കുന്ന മികച്ച സംഭാവനയായി മാറുമെന്ന് തദ്ദേശ സ്വയംഭരണ എക്സൈസ് പാര്‍ലമെന്‍ററി കാര്യ വകുപ്പ് മന്ത്രി എം.ബി രാജേഷ് പറഞ്ഞു. അയല്‍ക്കൂട്ട വനിതകളുടെ സുസ്ഥിര സാമ്പത്തിക വികസനം ലക്ഷ്യമിട്ട്കുടുംബശ്രീയുടെ നേതൃത്വത്തില്‍ ഉപജീവന മേഖലയില്‍ നടപ്പാക്കുന്ന വണ്‍ സ്റ്റോപ് ഫെസിലിറ്റി സെന്‍റര്‍, ഇന്‍ക്യുബേഷന്‍ സെന്‍റര്‍, പോക്കറ്റ് മാര്‍ട്ട് ഇ കൊമേഴ്സ് ആപ്ളിക്കേഷന്‍, സ്റ്റാര്‍ട്ടപ് വില്ലേജ് എന്‍റര്‍പ്രണര്‍ഷിപ് പ്രോഗ്രാം ആറാം ഘട്ടം, നേച്ചേഴ്സ് ഫ്രഷ് അഗ്രി കിയോസ്ക് രണ്ടാം ഘട്ടം, ഹരിതസമൃദ്ധി ക്യാമ്പയിന്‍  എന്നീ പദ്ധതികളുടെ സംസ്ഥാനതല ഉദ്ഘാടനം ഓണ്‍ലൈനായി നിര്‍വഹിച്ചു സംസാരിക്കുകയായിരുന്നു മന്ത്രി.

കഴിഞ്ഞ ഇരുപത്തിയഞ്ചു വര്‍ഷത്തിനുളളില്‍ കേരളീയ സ്ത്രീജീവിതത്തില്‍ ശ്രദ്ധേയമായ മുന്നേറ്റം കൈവരിക്കാന്‍ കഴിഞ്ഞ കുടുംബശ്രീ പുതിയ പദ്ധതികള്‍ നടപ്പാക്കുന്ന മേഖലയിലും തനത് മാതൃക സൃഷ്ടിക്കുമെന്ന് പറഞ്ഞു.  മന്ത്രി എം.ബി രാജേഷ് പറഞ്ഞു. കുടുംബശ്രീ പരമ്പരാഗതമായി നടത്തി വരുന്നതില്‍ നിന്നും വ്യത്യസ്തമായ മേഖലകളിലാണ് പുതിയ പദ്ധതികള്‍ നടപ്പാക്കുന്നത്. ഇതുവരെ ഏറ്റെടുത്തിട്ടുള്ള ഏതു ദൗത്യവും വിജയിപ്പിച്ചിട്ടുളള കുടുംബശ്രീ മുഖേന നടപ്പാക്കുന്ന പുതിയ പദ്ധതികളും മികച്ച വികസന മാതൃകകളായി മാറുമെന്നും മന്ത്രി പറഞ്ഞു.

ശാസ്ത്ര സാങ്കേതിക വിദ്യ അത്ഭുതകരമായ മുന്നേറ്റം നടത്തുന്ന ഈ കാലഘട്ടത്തില്‍ ഡിജിറ്റല്‍ സാങ്കേതിക വിദ്യയുടെ സഹായത്തോടെ ആരംഭിക്കുന്ന പുതിയ പദ്ധതികള്‍ കുടുംബശ്രീയുടെയും സരംഭകരുടെയും ശ്രദ്ധേയമായ മുന്നേറ്റത്തിന് സഹായകരമാകുമെന്ന് അഡ്വ.ആന്‍റണി രാജു എം.എല്‍.എ അധ്യക്ഷ പ്രസംഗത്തില്‍ പറഞ്ഞു.

നേച്ചേഴ്സ് ഫ്രഷ് അഗ്രി കിയോസ്ക് പദ്ധതി രണ്ടാം ഘട്ടത്തിന്‍റെ ഭാഗമായി സംരംഭകര്‍ക്കുളള ധനസഹായ വിതരണോദ്ഘാടനം എക്സിക്യൂട്ടീവ് ഡയറക്ടര്‍(ഇന്‍ ചാര്‍ജ്) ഡോ. ദിനേശന്‍ ചെറുവത്ത് നിര്‍വഹിച്ചു. വെങ്ങാനൂരിലെ നെല്ലിമൂട് ജംഗ്ഷനില്‍ പുതുതായി ആരംഭിക്കുന്ന കിയോസ്കിന് വേണ്ടി വെങ്ങാനൂര്‍ ഗ്രാമപഞ്ചായത്ത് പ്രസിഡന്‍റ് ആര്‍.എസ് ശ്രീകുമാര്‍, കുടുംബശ്രീ കാര്‍ഷിക സംരംഭകര്‍ എന്നിവര്‍ ഡോ. ദിനേശന്‍ ചെറുവത്തില്‍ നിന്നും രണ്ടു ലക്ഷം രൂപയുടെ ചെക്ക് സ്വീകരിച്ചു.

പോക്കറ്റ്മാര്‍ട്ട് ആപ് വികസിപ്പിച്ച അമീഗോസിയ കമ്പനി പ്രതിനിധികളെ കുടുംബശ്രീ അര്‍ബര്‍ പ്രോഗ്രാം ഓഫീസര്‍  മേഘാ മേരി കോശി ആദരിച്ചു.

ആര്‍.എസ് ശ്രീകുമാര്‍, കുടുംബശ്രീ പ്രോഗ്രാം ഓഫീസര്‍ ഡോ. ബി.ശ്രീജിത്ത്, ജില്ലാ മിഷന്‍ കോര്‍ഡിനേറ്റര്‍മാരായ രമേഷ് ജി, മിനി സി.ആര്‍, സി.ഡി.എസ് അധ്യക്ഷ വിനീത പി എന്നിവര്‍ ആശംസിച്ചു. കുടുംബശ്രീ പ്രോഗ്രാം ഓഫീസര്‍മാരായ ശ്രീകാന്ത് എ.എസ് സ്വാഗതവും  ഡോ.ഷാനവാസ് നന്ദിയും പറഞ്ഞു.