വാര്‍ത്തകള്‍

കുടുംബശ്രീ നഗര സി.ഡി.എസുകളിലെ ഉപസമിതി കണ്‍വീനര്‍മാര്‍ക്കുള്ള പരിശീലന പരിപാടി 'ചലനം 2023' ആദ്യ രണ്ടു ബാച്ചുകളുടെ പരിശീലനം പൂര്‍ത്തിയായി. ഓരോ ബാച്ചിനും നാല് ദിവസം വീതം ആകെ അഞ്ചു ബാച്ചുകള്‍ക്കാണ് പരിശീലനം നല്‍കുക. കുടുംബശ്രീ മുഖേന നഗരമേഖലയില്‍ നടപ്പാക്കുന്ന വിവിധ ഉപജീവന പദ്ധതികളുടെയും സാമൂഹിക ജനക്ഷേമ പദ്ധതികളുടെയും പ്രവര്‍ത്തനങ്ങള്‍ ഊര്‍ജിതമാക്കാന്‍ ഉപസമിതി കണ്‍വീനര്‍മാരെ പ്രാപ്തരാക്കുകയാണ് ലക്ഷ്യം. സാമൂഹിക വികസനം, അടിസ്ഥാന സൗകര്യ വികസനം എന്നിവയുടെ ഉപസമിതി കണ്‍വീനര്‍മാര്‍ക്കുളള പരിശീലനം ഇന്നലെ (22-2-2023) പൂര്‍ത്തീകരിച്ചു.

നഗര സി.ഡി.എസുകളില്‍ കുടുംബശ്രീ പദ്ധതി പ്രവര്‍ത്തനങ്ങള്‍ ശക്തമാക്കുന്നതോടൊപ്പം ഓരോ അയല്‍ക്കൂട്ട കുടുംബാംഗത്തിനും പദ്ധതികളുടെ ഗുണഫലങ്ങള്‍ ലഭ്യമാക്കുന്നതു ലക്ഷ്യമിട്ടു കൊണ്ട് ഫെബ്രുവരി 14നാണ് 'ചലനം 2023' പരിശീലന പരിപാടി ആരംഭിച്ചത്.  സാമൂഹിക വികസനം, അടിസ്ഥാന സൗകര്യ വികസനം,  വാര്‍ഡ് സഭ,തൊഴിലുറപ്പ്, മൈക്രോ ഫിനാന്‍സ് ഉപജീവനം, എന്നിങ്ങനെ വിഷയാധിഷ്ഠിതമായി ഇടപെട്ടു കൊണ്ട് നഗര സി.ഡി.എസുകളുടെ വികസന പ്രവര്‍ത്തനങ്ങളില്‍ സജീവ പങ്കാളിത്തം വഹിക്കുന്നവരാണ് ഉപസമിതി കണ്‍വീനര്‍മാര്‍. സി.ഡി.എസും നഗരസഭയുമായി സംയോജിച്ചു പ്രവര്‍ത്തിക്കുന്നതിന് ഇവരെ പ്രാപ്തരാക്കുകയാണ് ലക്ഷ്യം. ഇതിന്‍റെ ഭാഗമായി ഒരു ബാച്ചില്‍ 129 പേര്‍ വീതം ആകെ 645 പേര്‍ക്ക് പരിശീലനം നല്‍കും.

 കുടുംബശ്രീ പദ്ധതികള്‍ സംബന്ധിച്ച വിശദമായ ക്ളാസുകളും സംശയ നിവാരണത്തിനായി ചോദ്യോത്തര വേളയും ഉള്‍പ്പെട്ടതാണ് പരിശീലന പരിപാടി. ഉപസമിതികളുടെ പ്രസക്തിയും പ്രാധാന്യവും, കുടുംബശ്രീക്ക് ലഭ്യമാകുന്ന വിവിധ ഫണ്ടുകള്‍, സി.ഡി.എസിന്‍റെ തനതു പ്രവര്‍ത്തനങ്ങള്‍ എന്നിവ സംബന്ധിച്ചും വിശദമായ പരിശീലനം ലഭ്യമാക്കും. ക്ളാസ് റൂം പരിശീലനത്തിനു പുറമേ ജില്ലാ ടൂറിസം പ്രമോഷന്‍ കൗണ്‍സിലുമായി സഹകരിച്ചു കൊണ്ട് എല്ലാ പരിശീലനാര്‍ത്ഥികള്‍ക്കും ഔട്ട് ഡോര്‍ പരിശീലനവും നല്‍കുന്നുണ്ട്. കുടുംബശ്രീ സംസ്ഥാന മിഷനില്‍ വിവിധ പ്രോജക്ടുകള്‍ കൈകാര്യം ചെയ്യുന്ന സ്റ്റേറ്റ് പ്രോഗ്രാം മാനേജര്‍മാര്‍, സിറ്റി മിഷന്‍ മാനേജര്‍മാര്‍, കുടുംബശ്രീ കോര്‍ ട്രെയിനിങ്ങ് ടീം അംഗങ്ങള്‍ എന്നിവരാണ് പരിശീലനത്തിന് നേതൃത്വം നല്‍കുന്നത്. ഗ്രാമീണ പഠന കേന്ദ്രം എക്സിക്യൂട്ടീവ് ഡയറക്ടര്‍ എന്‍.ജഗജീവന്‍, കുടുംബശ്രീ നാഷണല്‍ റിസോഴ്സ് ഓര്‍ഗനൈസേഷന്‍ ചീഫ് ഓപ്പറേറ്റിങ്ങ് ഓഫീസര്‍ സജിത് സുകുമാരന്‍, കുടുംബശ്രീ പ്രോഗ്രാം ഓഫീസര്‍ എ.ജഹാംഗീര്‍, മുന്‍ പ്രോഗ്രാം ഓഫീസര്‍ പി.കേശവന്‍ നായര്‍ എന്നിവര്‍ പരിശീലന പരിപാടിയില്‍ വിവിധ വിഷയങ്ങള്‍ അവതരിപ്പിച്ചു.
 
ഉപജീവന ഉപസമിതി കണ്‍വീനര്‍മാര്‍ക്കുള്ള  മൂന്നാമത്തെ ബാച്ചിന്‍റെ പരിശീലനം മാര്‍ച്ച് ആറു മുതല്‍ ഒമ്പത് വരെ സംഘടിപ്പിക്കും.  വാര്‍ഡ് സഭ, തൊഴിലുറപ്പ് ഉപസമിതി കണ്‍വീനര്‍മാര്‍ ഉള്‍പ്പെടുന്ന നാലാമത്തെ ബാച്ചിന്‍റെ പരിശീലനം മാര്‍ച്ച് 11 മുതല്‍ 14 വരെയും 16 മുതല്‍ 19 വരെ മൈക്രോ ഫിനാന്‍സ് ഉപസമിതി കണ്‍വീനര്‍മാര്‍ക്കുള്ള പരിശീലനവും സംഘടിപ്പിക്കും.  

കുടുംബശ്രീ രജത ജൂബിലിയോടനുബന്ധിച്ച് സംഘടിപ്പിക്കുന്ന സംസ്ഥാനതല വ്ളോഗ്, റീല്‍സ് മത്സരത്തില്‍ എന്‍ട്രികള്‍ സമര്‍പ്പിക്കാനുള്ള തീയതി മാര്‍ച്ച് ആറ് വരെ നീട്ടി. കുടുംബശ്രീ മുഖേന നടപ്പാക്കുന്ന പദ്ധതികള്‍, പ്രവര്‍ത്തനങ്ങള്‍, സംരംഭങ്ങള്‍ എന്നിവ അടിസ്ഥാനമാക്കി തയ്യാറാക്കിയ വ്ളോഗ്, റീല്‍സ് തുടങ്ങിയവയാണ് മത്സരത്തിനായി പരിഗണിക്കുന്നത്.

മികച്ച വ്ളോഗിന് ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് യഥാക്രമം 50,000 രൂപ, 40,000 രൂപ, 30,000 രൂപ ക്യാഷ് അവാര്‍ഡായി ലഭിക്കും. റീല്‍സ് വിഭാഗത്തില്‍ ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് യഥാക്രമം 25,000, 20,000, 15,000 രൂപയുമാണ് ക്യാഷ് അവാര്‍ഡായി ലഭിക്കുക. വിജയികള്‍ക്ക് ക്യാഷ് അവാര്‍ഡിനൊപ്പം ട്രോഫിയും സര്‍ട്ടിഫിക്കറ്റും നല്‍കുന്നതാണ്. കൂടാതെ രണ്ട് വിഭാഗത്തിലും ലഭിക്കുന്ന മികച്ച എന്‍ട്രികള്‍ക്ക് പ്രോത്സാഹന സമ്മാനവും ഉണ്ടായിരിക്കും.

മത്സരം, നിബന്ധനകള്‍ എന്നിവ ഉള്‍പ്പെടെയുള്ള വിശദ വിവരങ്ങള്‍ക്ക് സന്ദര്‍ശിക്കുക
 www.kudumbashree.org/reels2023

സംസ്ഥാനത്ത് കുടുംബശ്രീയുടെ കീഴിലുള്ള മൂന്നു ലക്ഷം അയല്‍ക്കൂട്ടങ്ങള്‍ക്കും കുടുംബശ്രീ സംരംഭകര്‍ക്കും നിലവില്‍ ലഭ്യമായി വരുന്ന ബാങ്കിങ്ങ് സേവനങ്ങള്‍ കൂടുതല്‍ മെച്ചപ്പെടുത്തുക എന്നതു ലക്ഷ്യമിട്ട് കുടുംബശ്രീയും സ്റ്റേറ്റ് ലെവല്‍ ബാങ്കേഴ്സ് കമ്മിറ്റിയും സംയുക്തമായി ഏകദിന ശില്‍പശാല സംഘടിപ്പിച്ചു.

അയല്‍ക്കൂട്ട അംഗങ്ങള്‍ക്ക് സുസ്ഥിര വരുമാനം നല്‍കാന്‍ നിലവിലുള്ള ഉപജീവന പദ്ധതികള്‍ക്ക് ഊന്നല്‍ നല്‍കുന്നതിന്‍റെ ഭാഗമായി സാമ്പത്തിക പിന്തുണയും സാമ്പത്തിക സാക്ഷരതയും നല്‍കുന്ന പ്രവര്‍ത്തനങ്ങള്‍ക്ക് അടുത്ത സാമ്പത്തിക വര്‍ഷം കൂടുതല്‍ ഊന്നല്‍ നല്‍കുമെന്ന് കുടുംബശ്രീ എക്സിക്യൂട്ടീവ് ഡയറക്ടര്‍ ജാഫര്‍ മാലിക് പറഞ്ഞു. പുതുതായി രൂപീകരിച്ച ഓക്സിലറി ഗ്രൂപ്പ് അംഗങ്ങളെ മെച്ചപ്പെട്ട തൊഴില്‍ മേഖലകളിലേക്ക് കൊണ്ടു വരുന്ന പ്രവര്‍ത്തനങ്ങള്‍ക്കും തുല്യ പ്രാധാന്യം നല്‍കുന്നുണ്ട്. സൂക്ഷ്മസമ്പാദ്യ പദ്ധതിയും അതുമായി ബന്ധപ്പെട്ട പ്രവര്‍ത്തനങ്ങളുമാണ് കുടുംബശ്രീയുടെ അടിത്തറ. അശാസ്ത്രീയമായ വായ്പാ ഇടപാടുകള്‍ ഒഴിവാക്കുന്നതിനും സാമ്പത്തിക ഇടപാടുകളില്‍ കൃത്യതയും സൂക്ഷ്മതയും കൈവരിക്കുന്നതിനും അയല്‍ക്കൂട്ട അംഗങ്ങള്‍ക്കായി സാമ്പത്തിക സാക്ഷരതാ ക്യാമ്പെയ്ന്‍ സംഘടിപ്പിക്കുമെന്നും എക്സിക്യൂട്ടീവ് ഡയറക്ടര്‍ സ്വാഗത പ്രസംഗത്തില്‍ പറഞ്ഞു.  

സംസ്ഥാനത്തെ വിവിധ ബാങ്കുകളിലായി 8029 കോടി രൂപ അയല്‍ക്കൂട്ടങ്ങളുടേതായുണ്ട്. ഇതില്‍ നിന്നും ആന്തരിക വായ്പ നല്‍കിയ ശേഷം ബാക്കിയുള്ള തുകയ്ക്ക് സേവിങ്ങ്സ് ബാങ്ക് അക്കൗണ്ട് ഇനത്തില്‍ നല്‍കുന്ന പലിശയാണ് ലഭിക്കുന്നത്. ഈ നിക്ഷേപത്തിന് കൂടുതല്‍ പലിശ ലഭ്യമാക്കുന്നതു സംബന്ധിച്ച നിര്‍ദേശവും കുടുംബശ്രീ ഉന്നയിച്ചിട്ടുണ്ട്. ഇക്കാര്യം റിസര്‍വ് ബാങ്കിന്‍റെ നിലവിലെ മാര്‍ഗ നിര്‍ദേശ പ്രകാരം നടപ്പാക്കാന്‍ കഴിയുമോയെന്ന കാര്യം പരിഗണിക്കുമെന്ന് കാനറാ ബാങ്ക് ഡെപ്യൂട്ടി ജനറല്‍ മാനേജരും എസ്.എല്‍.ബി.സി പ്രതിനിധിയുമായ ശ്രീകുമാര്‍ പറഞ്ഞു. ഇതു കൂടാതെ കുടുംബശ്രീ അയല്‍ക്കൂട്ടങ്ങള്‍ക്ക് ലിങ്കേജ് വായ്പ വേഗത്തില്‍ ലഭ്യമാക്കുന്നതിന് ബാങ്കുകള്‍ നേരിടുന്ന വെല്ലുവിളികള്‍, സ്വയം തൊഴില്‍ വായ്പ നേടുന്നതില്‍ നിലവിലെ സംരംഭകരും പുതുതായി രൂപീകരിച്ച ഓക്സിലറി ഗ്രൂപ്പ് അംഗങ്ങളും നേരിടുന്ന ബുദ്ധിമുട്ടുകള്‍, അയല്‍ക്കൂട്ടങ്ങള്‍ക്ക് പുതിയ അക്കൗണ്ടുകള്‍ തുറക്കുന്നതിനും ലിങ്കേജ് വായ്പ നല്‍കുന്നതിനും നിലവിലുള്ള നടപടിക്രമങ്ങളിലെ ഇളവ്, വായ്പാ നടപടികള്‍ വേഗത്തിലാക്കാന്‍ ബാങ്കിങ്ങ് കറസ്പോണ്ടന്‍റ്മാരുടെ സേവനം എന്നിവ സംബന്ധിച്ചും കുടുംബശ്രീയും വിവിധ ബാങ്ക് പ്രതിനിധികളുമായി ചര്‍ച്ച നടത്തി.

കുടുംബശ്രീ ഡയറക്ടര്‍ അനില്‍.പി.ആന്‍റിണി സ്വാഗതം പറഞ്ഞു. പ്രാദേശിക സാമ്പത്തിക വികസനം ലക്ഷ്യമിട്ട് കുടുംബശ്രീ മുഖേന സംസ്ഥാനത്ത് നടപ്പാക്കുന്ന വിവിധ ഉപജീവന പദ്ധതികള്‍, സംരംഭകര്‍ക്ക് ബാങ്ക് വായ്പ ആവശ്യമുള്ള പദ്ധതികള്‍, കേന്ദ്ര പദ്ധതികള്‍ എന്നിവ സംബന്ധിച്ച് കുടുംബശ്രീ സ്റ്റേറ്റ് പ്രോഗ്രാം മാനേജര്‍ അനിഷ് കുമാര്‍ അവതരണം നടത്തി. എന്‍.ഐ.ആര്‍.ഡി നാഷണല്‍ റിസോഴ്സ് പേഴ്സണ്‍ പി.മോഹനയ്യ, എന്‍.ആര്‍.എല്‍.എം-എന്‍.ഐ.ആര്‍.ഡി മിഷന്‍ മാനേജര്‍ അഭിഷേക് ഗോസ്വാമി എന്നിവര്‍ സംസാരിച്ചു. വിവിധ ബാങ്ക് പ്രതിനിധികള്‍, കുടുംബശ്രീ പ്രോഗ്രാം ഓഫീസര്‍മാര്‍, സ്റ്റേറ്റ് പ്രോഗ്രാം മാനേജര്‍മാര്‍ തുടങ്ങിയവര്‍ പങ്കെടുത്തു.  

ഫോട്ടോ-അടിക്കുറിപ്പ്- കുടുംബശ്രീയും എസ്.എല്‍.ബി.സിയും സംയുക്തമായി സംഘടിപ്പിച്ച ഏകദിന ശില്‍പശാലയില്‍ കുടുംബശ്രീ എക്സിക്യൂട്ടീവ് ഡയറക്ടര്‍ ജാഫര്‍ മാലിക് സംസാരിക്കുന്നു. പി.മോഹനയ്യ, ശ്രീകുമാര്‍, അഭിഷേക് ഗോസ്വാമി എന്നിവര്‍ സമീപം  

കുടുംബശ്രീ രജത ജൂബിലിയോടനുബന്ധിച്ച് സംഘടിപ്പിക്കുന്ന സംസ്ഥാനതല വ്ളോഗ്, റീല്‍സ് മത്സരത്തില്‍ എന്‍ട്രികള്‍ സമര്‍പ്പിക്കാനുള്ള തീയതി ഫെബ്രുവരി 21 വരെ നീട്ടി. കുടുംബശ്രീ മുഖേന നടപ്പാക്കുന്ന പദ്ധതികള്‍, പ്രവര്‍ത്തനങ്ങള്‍, സംരംഭങ്ങള്‍ എന്നിവ അടിസ്ഥാനമാക്കി തയ്യാറാക്കിയ വ്ളോഗ്, റീല്‍സ് എന്നിവയാണ് മത്സരത്തിനായി പരിഗണിക്കുന്നത്.

മികച്ച വ്ളോഗിന് ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് യഥാക്രമം 50,000 രൂപ, 40,000 രൂപ, 30,000 രൂപയും ക്യാഷ് അവാര്‍ഡായി ലഭിക്കും. മികച്ച റീല്‍സ് തയ്യാറാക്കി ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് യഥാക്രമം 25,000, 20,000, 15,000 എന്നിങ്ങനെ ക്യാഷ് അവാര്‍ഡും ലഭിക്കും. ഇതു കൂടാതെ രണ്ട് വിഭാഗത്തിലും ലഭിക്കുന്ന മികച്ച എന്‍ട്രികള്‍ക്ക് പ്രോത്സാഹന സമ്മാനവും ഉണ്ടായിരിക്കും. വിജയികള്‍ക്ക് ക്യാഷ് അവാര്‍ഡിനൊപ്പം ട്രോഫിയും സര്‍ട്ടിഫിക്കറ്റും ലഭിക്കുന്നതാണ്.

മത്സരം, നിബന്ധനകള്‍ എന്നിവ ഉള്‍പ്പെടെയുള്ള വിശദ വിവരങ്ങള്‍ക്ക് സന്ദര്‍ശിക്കുക www.kudumbashree.org/reels2023

'വാണിജ്യാടിസ്ഥാനത്തില്‍ സുസ്ഥിരവും സുരക്ഷിതവുമായ ബ്രോയിലര്‍ ചിക്കന്‍ ഉല്‍പാദന മാര്‍ഗങ്ങള്‍-കേരള ചിക്കന്‍ സ്റ്റേക്ഹോള്‍ഡര്‍മാര്‍ക്ക്' എന്ന വിഷയത്തില്‍ കുടുംബശ്രീയും മൃഗസംരക്ഷണ വകുപ്പും സംയുക്തമായി  ഹോട്ടല്‍ ഗ്രാന്‍ഡ് ചൈത്രത്തില്‍ ഫെബ്രുവരി 1ന്‌ സംഘടിപ്പിച്ച ഏകദിന ശില്‍പശാല  കുടുംബശ്രീ എക്സിക്യൂട്ടീവ് ഡയറക്ടര്‍ ജാഫര്‍ മാലിക് ഉദ്ഘാടനം ചെയ്തു. ബ്രോയിലര്‍ കോഴിയിറച്ചിയിലെ ആന്‍റിബയോട്ടിക് അവഷിപ്തം കുറയ്ക്കുക, വാണിജ്യാടിസ്ഥാനത്തിലുള്ള ഇറച്ചിക്കോഴി വളര്‍ത്തല്‍ സുസ്ഥിര വരുമാന മാര്‍ഗമായി മാറ്റുക എന്നിവയ്ക്കായി അംഗീകൃത പ്രവര്‍ത്തന നടപടിക്രമത്തിന്‍റെ കരട് തയ്യാറാക്കുക എന്ന ലക്ഷ്യത്തോടെയാണ് ശില്‍പശാല സംഘടിപ്പിച്ചത്. ഇതിന്‍റെ അടിസ്ഥാനത്തില്‍ മികച്ച നിര്‍ദേശങ്ങള്‍ ഉള്‍പ്പെടുത്തി കുടുംബശ്രീയും മൃഗസംരക്ഷണ വകുപ്പും സംയുക്തമായി അംഗീകൃത പ്രവര്‍ത്തന നടപടി ക്രമത്തിന്‍റെ കരട് തയ്യാറാക്കും. ഇതു ലഭ്യമാകുന്നതോടെ വിപുലമായ ബ്രോയ്ലര്‍ മാനേജ്മെന്‍റ്, കര്‍ഷകര്‍ക്ക് സുസ്ഥിര തൊഴിലും വരുമാനവും എന്നിവ ഉള്‍പ്പെടെ സമഗ്രമായ വികസനം സാധ്യമാകും.  

ആന്‍റിബയോട്ടിക്കിന്‍റെ ഉപയോഗം, ആന്‍റിബയോട്ടിക് വിമുക്ത കോഴിയിറച്ചിയുടെ ഉല്‍പാദനം, ആന്‍റിബയോട്ടിക് ബദല്‍ സമീപനങ്ങള്‍, ഈ ലക്ഷ്യം കൈവരിക്കുന്നതിനുള്ള സാമ്പത്തിക ശേഷിയും ഭാവി വീക്ഷണവും, മാനേജ്മെന്‍റ് രീതികളിലെ മാറ്റം എന്നിവ സംബന്ധിച്ച വ്യക്തമായ മാര്‍ഗ നിര്‍ദേശങ്ങള്‍ ഉള്‍പ്പെടുത്തിയാകും അംഗീകൃത നടപടി ക്രമത്തിന്‍റെ കരട് തയ്യാറാക്കുക. കോഴിക്കുഞ്ഞുങ്ങളുടെ ആരോഗ്യ പരിപാലനം, രോഗനിയന്ത്രണം, പ്രതിരോധ കുത്തിവയ്പ്പ്, അജൈവ വസ്തുക്കള്‍ മൂലമുണ്ടാകുന്ന രോഗനിയന്ത്രണം, രോഗവാഹികളെ നിയന്ത്രിക്കുന്നതിനുള്ള മാര്‍ഗങ്ങള്‍, തീറ്റ, വെള്ളം എന്നിവയുടെ ഗുണനിലവാരം പരിശോധിക്കുന്നതിനുളള ശാസ്ത്രീയ സംവിധാനങ്ങള്‍ എന്നിവ സംബന്ധിച്ച നിര്‍ദേശങ്ങളും കരടില്‍ ഉള്‍പ്പെടുത്തും.

ഫാമിലെ ജൈവസുരക്ഷ ഉറപ്പു വരുത്തുന്നതിനുള്ള നടപടികള്‍,  ഫലപ്രദമായ മാലിന്യ നിര്‍മാര്‍ജനവും മാംസ സംസ്ക്കരണവും, കര്‍ഷകര്‍ക്ക് കോഴിവളര്‍ത്തലില്‍ ശാസ്ത്രീയ പരിശീലനം,  സുരക്ഷിതവും ഭക്ഷ്യയോഗ്യവുമായ കോഴിയിറച്ചിയുടെ ഉല്‍പാദനം, സുസ്ഥിര വിപണി, വിവിധ സര്‍ട്ടിഫിക്കേഷനുകള്‍ എന്നിവ ഉള്‍പ്പെടെ വിപുലമായ ബ്രോയിലര്‍ മാനേജ്മെന്‍റും കര്‍ഷക ക്ഷേമവും ഉള്‍പ്പെടെയുള്ള കാര്യങ്ങളും വിശദമായി പരിശോധിച്ചിട്ടുണ്ട്. ഇതോടൊപ്പം ഈ രംഗത്ത് പ്രവര്‍ത്തിക്കുന്ന കര്‍ഷകര്‍ക്ക് സുസ്ഥിര തൊഴിലും വരുമാനവും ഉറപ്പു വരുത്താന്‍ സഹായകമാകുന്ന നിര്‍ദേശങ്ങളും കരടില്‍ ഉള്‍പ്പെടുത്തുന്നതിനാണ് തീരുമാനം.  

വിപണിയില്‍ ലഭ്യമാകുന്ന ആന്‍റിബയോട്ടിക് അവഷിപ്തങ്ങളടങ്ങിയ മാംസത്തിന്‍റെ ഉപഭോഗം പൊതുജനാരോഗ്യത്തിന് ആഗോള തലത്തില്‍ ഭീഷണി ഉയര്‍ത്തുന്ന സാഹചര്യത്തിലാണ് ഉല്‍പാദന പ്രകിയയിലും വിതരണ ശൃംഖലയിലും സ്വീകരിക്കേണ്ട അംഗീകൃത പ്രവര്‍ത്തന നടപടി ക്രമം തയ്യാറാക്കുന്നതിന് കുടുംബശ്രീയും മൃഗസംരക്ഷണ വകുപ്പും സംയുക്തമായി തീരുമാനിക്കുന്നത്.

ശില്‍പശാലയില്‍ മൃഗസംരക്ഷണ വകുപ്പ് ഡയറക്ടര്‍ ഡോ.ഏ.കൗശികന്‍ സ്വാഗതം ആശംസിച്ചു. ഡോ.അരവിന്ദ്, ഡോ.ബിനോയ് ചാക്കോ, ഡോ.ഹരികൃഷ്ണന്‍ എസ്, ഡോ.സൂര്യ ശങ്കര്‍, ഡോ.ജെസ്സ് വര്‍ഗിസ്, ഡോ.പുണ്യമൂത്തി, ഡോ.ശ്രീനിവാസ് ഗുപ്ത, ഡോ.നൗഷാദ് അലി, ഡോ.ടോണി ജോസ്, ഡോ.നടരാജന്‍, ഡോ.ഈപ്പന്‍ ജോണ്‍, ഡോ.റാണാ രാജ്, ഡോ.ചന്ദ്ര പ്രസാദ്, ഡോ.സ്വപ്ന സൂസന്‍ എബ്രഹാം, ഡോ.സെല്‍വ കുമാര്‍, ഡോ.ബിജുലാല്‍, ഡോ.സജീവ് കുമാര്‍, ഡോ.സുനില്‍, ഡോ.അനുരാജ്, ഡോ.സുധി ആര്‍ എന്നിവര്‍ വിവിധ വിഷയങ്ങളെ കുറിച്ച് സംസാരിച്ചു. കുടുംബശ്രീക്കൊപ്പം കേരള ചിക്കന്‍ പദ്ധതിയുടെ ഭാഗമായി പ്രവര്‍ത്തിക്കുന്ന കെപ്കോ, ബ്രഹ്മഗിരി ഡെവലപ്മെന്‍റ് സൊസൈറ്റി, മീറ്റ് പ്രൊഡക്ട്സ് ഓഫ് ഇന്ത്യ എന്നീ സ്ഥാപനങ്ങളുടെ പ്രതിനിധികളും ശില്‍പശാലയില്‍ പങ്കെടുത്തു.

പ്രമുഖ മാധ്യമ പ്രവര്‍ത്തകനും ഏഷ്യാനെറ്റ് ന്യൂസ് എഡിറ്ററുമായിരുന്ന ടി.എന്‍ ഗോപകുമാറിന്‍റെ ഓര്‍മ്മയ്ക്കായി ഏഷ്യാനെറ്റ് ന്യൂസ് നല്‍കുന്ന ഈ വര്‍ഷത്തെ ടി.എന്‍.ജി അവാര്‍ഡ് കുടുംബശ്രീക്ക്. സ്ത്രീകളുടെ സ്വയം പര്യാപ്തതയ്ക്കും ശാക്തീകരണത്തിനും നല്‍കിയ സമഗ്ര സംഭാവനകള്‍ പരിഗണിച്ചാണിത്. രണ്ടു ലക്ഷം രൂപയും ഫലകവും പ്രശസ്തി പത്രവും അടങ്ങുന്നതാണ് പുരസ്കാരം.

  ഏഷ്യാനെറ്റ് ന്യൂസ് എഡിറ്റോറിയല്‍ ബോര്‍ഡാണ് ആറാമത്തെ പുരസ്കാരത്തിനായി കുടുംബശ്രീയെ  തിരഞ്ഞെടുത്തത്. ഫെബ്രുവരി നാലിന് തൃശൂര്‍ കേരള സാഹിത്യ അക്കാദമി ഹാളില്‍ നടക്കുന്ന ചടങ്ങില്‍ പ്രശസ്ത നര്‍ത്തകിയും ആക്ടിവിസ്റ്റുമായ മല്ലിക സാരാഭായി പുരസ്കാരം സമ്മാനിക്കും. വിദ്യാഭ്യാസ മന്ത്രി ഡോ.ആര്‍.ബിന്ദു മുഖ്യാതിഥിയായിരിക്കും.  
                         

കുടുംബശ്രീ രജത ജൂബിലി ആഘോഷങ്ങള്‍ക്ക് കരുത്തു പകര്‍ന്ന 'ചുവട്-2023' അയല്‍ക്കൂട്ട സംഗമം നാടെങ്ങും തരംഗമായി. സ്ത്രീശാക്തീകരണ രംഗത്ത് പുതിയ ദൂരവും വേഗവും ലക്ഷ്യമിട്ട് കരുത്തുറ്റ ചുവടുകള്‍ ഉറപ്പിച്ച അയല്‍ക്കൂട്ട സംഗമം കുടുംബശ്രീയുടെ ചരിത്രത്തിലെ സുവര്‍ണ അധ്യായമായി മാറിയ ദിനമായിരുന്നു ഇന്നലെ(26-1-2023)
   
രാജ്യം 74-ആമത് റിപ്പബ്ളിക് ദിനം ആഘോഷിക്കുന്ന ദിനത്തില്‍ അയല്‍ക്കൂട്ട സംഗമം സംഘടിപ്പിച്ചത് പ്രവര്‍ത്തകര്‍ക്ക് ഇരട്ടി മധുരമായി. ഹരിത ചട്ടം പാലിച്ച് പ്രകൃതിസൗഹൃദ ഉല്‍പന്നങ്ങള്‍ കൊണ്ടലങ്കരിച്ച അലങ്കരിച്ച വേദികളായിരുന്നു മിക്കയിടത്തും. നേരത്തെ നിര്‍ദേശിച്ചതു പ്രകാരം രാവിലെ തന്നെ അയല്‍ക്കൂട്ടങ്ങളിലേക്ക് അംഗങ്ങള്‍ എത്തിത്തുടങ്ങി. ഏഷ്യന്‍ ഭൂഖണ്ഡത്തിലെ തന്നെ ഏറ്റവും വലിയ സ്ത്രീകൂട്ടായ്മയെന്ന ഖ്യാതി നേടിയ കുടുംബശ്രീയുടെ കുടക്കീഴില്‍ 46 ലക്ഷം വനിതകള്‍ അണിനിരന്നു. രാവിലെ എട്ടു മണിക്ക് സംസ്ഥാനത്തെ മൂന്നു ലക്ഷം അയല്‍ക്കൂട്ടങ്ങളില്‍ ദേശീയ പതാക ഉയര്‍ന്നതോടെ ഓരോ അയല്‍ക്കൂട്ടങ്ങളും സ്വന്തമായി രചിച്ച് ഈണം നല്‍കിയ സംഗമ ഗാനം അവതരിപ്പിച്ചു. അതിനു ശേഷം അംഗങ്ങള്‍ക്ക് ആവേശം പകര്‍ന്ന് തദ്ദേശ സ്വയംഭരണ വകുപ്പ് മന്ത്രി നല്‍കിയ അയല്‍ക്കൂട്ട സംഗമ സന്ദേശം എല്ലാ അയല്‍ക്കൂട്ടങ്ങളിലേക്കും എത്തി.

ഇരുപത്തിയഞ്ച് വര്‍ഷത്തെ പ്രവര്‍ത്തനാനുഭവങ്ങളുടെ അടിസ്ഥാനത്തില്‍ അയല്‍ക്കൂട്ട കുടുംബാംഗങ്ങളുടെ ജീവിതത്തിലും പൊതുസമൂഹത്തിലും കുടുംബശ്രീ സൃഷ്ടിച്ച മാറ്റങ്ങളെ കുറിച്ചായിരുന്നു പ്രധാനമായും ഇന്നലെ അയല്‍ക്കൂട്ട തലത്തിലെ ചര്‍ച്ച. പുതിയ കാലത്തിന്‍റെ ആവശ്യകതയ്ക്കനുസരിച്ച് പദ്ധതി പ്രവര്‍ത്തനങ്ള്‍ ആവിഷ്ക്കരിക്കാനും കുടുംബശ്രീയെ നവീകരിക്കുന്നതിനുമുള്ള മികച്ച നിര്‍ദേശങ്ങള്‍ അയല്‍ക്കൂട്ടങ്ങളില്‍ നിന്നും ഉയര്‍ന്നു വന്നത് ഏറെ ശ്രദ്ധേയമായി. ഇതോടൊപ്പം ആരോഗ്യം, പൊതു ശുചിത്വം, വൃത്തിയുള്ള അയല്‍ക്കൂട്ട പരിസരം, അയല്‍ക്കൂട്ട കുടുംബങ്ങളുടെയും പ്രദേശത്തിന്‍റെയും വികസന ആവശ്യങ്ങള്‍ എന്നീ വിഷയങ്ങളും ചര്‍ച്ച ചെയ്ത് റിപ്പോര്‍ട്ട് തയ്യാറാക്കി.

മന്ത്രിമാരായ എം.ബി രാജേഷ് പാലക്കാട് സൗത്ത് സി.ഡി.എസിലെ തേജസ്, ആര്‍ ബിന്ദു വയനാട് ജില്ലയിലെ മീനങ്ങാടി സി.ഡി.എസിലെ കൈരളി, അഡ്വ. കെ. രാജന്‍ തൃശൂര്‍ ജില്ലയിലെ നടത്തറ സി.ഡി.എസിലെ മൈത്രി മാതാ എന്നീ അയല്‍ക്കൂട്ടങ്ങളില്‍ പങ്കെടുത്തു. കുടുംബശ്രീ എക്സിക്യൂട്ടീവ് ഡയറക്ടര്‍ ജാഫര്‍ മാലിക് കൊല്ലം ജില്ലയിലെ ഈസ്റ്റ് സി.ഡി.എസ് തെക്കേവിള ഡിവിഷനിലെ ഫ്രണ്ട്സ്, ഉദയമാര്‍ത്താണ്ഡപുരം വൈശാലി എന്നീ അയല്‍ക്കൂട്ടങ്ങളില്‍ പങ്കെടുത്തു. കൂടാതെ എം.എല്‍.എമാര്‍, ജില്ലാ കളക്ടര്‍മാര്‍ കലാ സാംസ്കാരിക മേഖലകളിലെ പ്രമുഖര്‍ എന്നിവരും അയല്‍ക്കൂട്ട സംഗമത്തില്‍ പങ്കാളികളായി. കുടുംബശ്രീ ഓക്സിലറി ഗ്രൂപ്പ് അംഗങ്ങള്‍, ബാലസഭാംഗങ്ങള്‍, വയോജന അയല്‍ക്കൂട്ട അംഗങ്ങള്‍, ബഡ്സ് സ്കൂള്‍ വിദ്യാര്‍ത്ഥികള്‍, ട്രാന്‍സ്ജെന്‍ഡര്‍ അയല്‍ക്കൂട്ടാംഗങ്ങള്‍, സംസ്ഥാന ജില്ലാ മിഷനിലെ ജീവനക്കാര്‍  എന്നിവരും സംഗമത്തില്‍ പങ്കെടുത്തു.