അട്ടപ്പാടി ആദിവാസി സമഗ്ര വികസന പദ്ധതിയുടെ ഭാഗമായി ബാല വിഭവ കേന്ദ്രത്തിന്റെ ആഭിമുഖ്യത്തില്‍ ബാലഗോത്രസഭാംഗങ്ങളായ കുട്ടികള്‍ക്ക് വേണ്ടി വേനല്‍ പറവകള്‍’ വേനല്‍ ക്യാമ്പ് സംഘടിപ്പിച്ചു. മൂന്ന് പഞ്ചായത്തുകളിലെ വിവിധ ഊരുകളിലെ ബാല ഗോത്രസഭകളില്‍ അംഗങ്ങളായ 400 കുട്ടികള്‍ ക്യാമ്പില്‍ പങ്കെടുത്തു. കക്കുപടി ബി.ആര്‍. അംബേദ്കര്‍ ട്രെയിനിങ് സെന്ററിലായിരുന്നു എട്ട് ദിനം നീണ്ടുനിന്ന ക്യാമ്പ്.
ആശയ വിനിമയ കല, നേതൃത്വ പാടവം, പഴമയുടെ പാട്ടുകള്‍, എന്നി വിഷയങ്ങളില്‍ നിഖില്‍, ജോസ്‌ന, അരുണ്‍ ചന്ദ്രന്‍ തുടങ്ങിവര്‍ ക്ലാസ്സുകള്‍ നയിച്ചു. ജനപ്രതിനിധികള്‍, പഞ്ചായത്ത് സമിതി, ഊരുസമിതി ഭാരവാഹികള്‍, കുടുംബശ്രീ പ്രവര്‍ത്തകര്‍ തുടങ്ങിവര്‍ പങ്കെടുത്തു.
മേയ് 9 ന് നടന്ന ചടങ്ങിൽ പഞ്ചായത്ത് സമിതി പ്രസിഡന്റ് ചന്ദ്ര ഏലച്ചുവഴി ക്യാമ്പ് ഉദ്ഘാടനം ചെയ്തു. കുടുംബശ്രീ അട്ടപ്പാടി പ്രത്യേക പദ്ധതി പ്രോജക്ട് ഓഫീസര്‍ ശ്രീ. മനോജ് ബി.എസ് മുഖ്യാതിഥിയായി. ബിനില്‍ കുമാര്‍ സ്വാഗതവും സുധീഷ് മരുതലം നന്ദിയും പറഞ്ഞു.